ధరణీగర్భసముద్భవసీతాతరుణీహృదయాకాశమున
పరిపూర్ణసుధాకరబింబంబన బ్రకాశించు రఘునందన
పరిపాలయమాం కరుణాజలధే మరువక నిను సేవించేము
కరివరదుడగు శ్రీహరివని నిను గట్టిగ మదిలో నమ్మేము
సురగణనాయక శుభసంధాయక మరిమరి నిన్నే కొలిచేము
పరమాత్మా హరి దనుజవిదారక దురితవినాశక మ్రొక్కేము
నరనాథాగ్రణి రావణదైత్యవినాశక నిను సేవించేము
సరసీరుహభవ పశుపతి వాసవ సన్నుత నిన్నే నమ్మేము
పరమభక్తులకు వరములిత్తువని మరిమరి నిన్నే కొలిచేము
పరంధామ హరి మాకోరిక యపవర్గము నడుగుచు మ్రొక్కేము
నిరుపమసుగుణాకర నిరుపాధిక నిత్యము నిను సేవించేము
హరి నిను నమ్మిన జన్మపరంపర ఆగిపోవునని నమ్మేము
పరమయోగిగణహృదయోల్లాసుడవని నిను చక్కగ కొలిచేము
మరియిక పుట్టువులీయకు మాకని మరిమరి వేడుచు మ్రొక్కేము
