రామనామ మిట్టిదనగ రాదు సుమ్మండి సర్వ
కామనలను మనకు తీర్చగలదు సుమ్మండి
అఖిల సంపదల నొసంగు నండి రామనామము
అఖిల భాగ్యముల నొసంగు నండి రామనామము
అఖిల భోగముల నొసంగు నండి రామనామము
అఖిల సౌఖ్యముల నొసంగు నండి రామనామము
అందరకును భయముబాపు నండి రామనామము
అందరకును శాంతినొసగు నండి రామనామము
అందరకును జ్ఞానమొసగు నండి రామనామము
అందరకును మోక్షమొసగు నండి రామనామము
నామనోవినోదమును నామతమును తెలిపెద
ధీమంతుల కిదే తేటతెల్లముగాను
రామునకై పాడుటే నామనోవినోదము
రామునకై యాడుటయే నామతము
రాముని పూజించుటే నామనోవినోదము
రాముని సేవించుటయె నామతము
రాముని ప్రేమించుటయే నామనోవినోదము
రామడు పరదైవతమని నామతము
రామతత్త్వచింతనమే నామనోవినోదము
రామనామప్రచారమే నామతము
ఏమి కావలెను హరినామ ముండగ
నామముండగ రామనామ ముండగ
లోకముల నేలునట్టి శ్రీకరమగు నామము
శోకముల నణగించెడు సురుచిరమగు నామము
భీకరమగు కష్టముల వెడలించెడు నామము
శ్రీకాంతుని నామము నీజిహ్వపై నుండగ
అనిశము గిరిజేశుని భావనను నిలుచు నామము
మునివరులు నిరంతరము పొగడునట్టి నామము
వనజాసన శక్రాదులు కొనియాడెడు నామము
మనసున మార్మోగుచు నిను నడిపించు చుండగ
పాపగిరులపాలి వజ్రపాతమైన నామము
తాపత్రయ మణచెడు శుభదాయకమగు నామము
రూపర భవచక్రమును త్రుంచునట్టి నామము
శ్రీపతి ఘననామము నిను కాపాడు చుండగ
శ్రీరామ నీనామమే చాలు మాకు
తీరేనురా భవబంధాలు
కోపిష్టి యమునితో వాద
మేపగిది గెలిచేము మేము
తేపకును శ్రీరామ యన్న
ఆపాడు యముడేమి చేయు
మాటిమాటికి పుట్టుబాధ
మాటిమాటికి చచ్చుబాధ
ఏటికి పొంద ముమ్మాటికి
నోటనే నీనామ ముండ
నామప్రభావంబు వలన
మేమన్య మేమడుగ బోము
రామ యిక నీవుండు చోటు
మేముండు చోటైన చాలు
లెక్కలన్ని మారిపోయెను నేటితో
చిక్కులన్ని తీరిపోయెను
చక్కనయ్య శ్రీరాముడు
చక్కగ దయ చూడగనే
మిక్కిలి యగు పాపరాశి
యక్కజముగ బుగ్గాయెను
శ్రీరాముని దయచేతను
కోరికలే యణగారెను
ఘోరమైన సంసారము
తీరే దారి తోచినది
ఒక్కని శ్రీరామచంద్రు
చక్కనైన భక్తి తోడ
మిక్కిలి ధ్యానించగనే
ముక్కలాయె భవశృంఖల
చాలునమ్మ సింగారము స్వామి వచ్చు వేళాయె
బాలికా వరము లిచ్చి భక్తకోటికి
చాలదమ్మ సమయము పూలజడ వేయుటకు
నీలాలక మల్లెపూల మాల ముడువవే
తిలకము దిద్దినది చాలు కలికి సుమగాత్రమున
నలద నిమ్ము మేలైన హరిచందనము
వాలుగంటి శ్రీరాముల వారి కిష్టమైన ము
త్యాలమాలికలు మెడను దాల్చవే సఖీ
జనకులు కడు దయామయులు స్వామి వారైతేను
జనని వీవు లోకములకు జానకీసతీ
ఏమేమి యడిగిరో యీనాడు నిజభక్తులు
తామేమి దాశరథులు దయచేసిరో
చాల విశేషములు చెప్ప స్వామి వచ్చినారిదే
లోలాక్షి పడకటింటి లోనికి పోవే
శ్రీరామనామము చేయని మనసొక చీకటికొట్టని తెలియండీ
ఘోరమైన కామాదిపిశాచాల గుహ యను మాటను తెలియండీ
లేని సుఖము సంసారము నందున మానక వెదకుట తప్పండీ
మానవులారా రాముని నామము మాత్రమె సుఖముల గనియండీ
మరువక రాముని నామము తలచే మనుజుడు సుఖి యని తెలియండీ
నరకబాధ లవి వానికి రావను పరమసత్యమును తెలియండీ
పరమసత్యమైన హరినామంబును మరచుట మిక్కిలి తప్పండీ
మరువక శ్రీహరి నామము చేసిన మనకు మోక్షమని తెలియండీ
కడుగడు శ్రధ్ధను రామనామమును కర్తవ్యంబని చేయండీ
అడుగకయే హరి మోక్షము నిచ్చుట అక్షరసత్యము తెలియండీ
జగదీశ్వర లోకమెల్ల చక్కగ నిదురించు వేళ
తగినమంచి సమయమురా ధ్యానంచుకొనగ నిన్ను
యుగములుగా యత్నించుచు నున్నను నాకొకనాటికి
పగటిపూట జనుల దుష్టభావతరంగముల మధ్య
తగుననుచును ఘడియయేని జగము మరచి ధ్యానించగ
భగవంతుడ యెన్నటికిని వశము కాక యున్నదిరా
ఆపనియని యీపనియని యటునిటు తిరుగుచును కొంత
తేపకు నీ ధనములనుచు తిరుగుటలో నొక కొంత
ఆపసోపములకు కొంత కోపతాపములకు కొంత
లోపించగ చిత్తశాంతి లోకేశ్వర ధ్యానమెటుల
అందులకే యర్ధరాత్రి హాయిగ లోకమును మరచి
కందువగు సమయమది కావున నిను నాహృదయ
మందిరమున దరిసించుచు మరిమరి పులకించుచు
నుందునురా రామచంద్ర యుత్సహించి ధ్యానంబున
వినవయ్య నా యింటి పనులు ముగియించుకొని
కనులార నినుజూడ గబగబ వచ్చితిని
ఆలోన నయ్యయ్యొ నయ్యవారును దే
వాలయపు తలుపులను హరిహరి మూసిరే
నీలమేఘశ్యామ నిన్ను దరిసించుటకు
వీలు లేదని తెలిసి చాల క్రుంగితిని
ఏమి చేయుదు నయ్య నెవరి నేమందును
నామనో వేదనకు నయమగు దారేది
రామచంద్రప్రభో యేమిజన్మము నాది
నీమోము చూచుటకు నేను నోచనైతి
యింటిపనులు పగలు యింటిపనులు రాత్రి
యింటిపనులు తెమలు టెన్నడును లేదాయె
యింటిగుమ్ము దాటి యెపుడైన వత్తునో
గంటలు ముగిసెనని గడియపడును గుడికి
మోక్షనగరి నొకమూల కుటీరం
దాక్షిణ్యముతో దయచేయరా
ఆమూల కుటీరమున
రామా రామా యనుచు
నామజపము చేయుదును
స్వామీ వేడుకతోడ
ఆమూల కుటీరమున
కామితము లేమి లేక
ప్రేమతో తలచుచుందు
నీమహిమాతిశయమును
ఆమూల కుటీరమున
నీమహాత్మ్యము వలన
ఏమాత్రమును లేవు
స్వామీ త్రికాలము లవి
జయజయ శ్రీరామ జగన్మోహన భవ
భయహర శ్రీరామ పరమపావన
జయజయ రఘుకులనాయక జనకజావర
జయజయ హరి సకలలోక శాంతిదాయక
జయజయజయ సకలమౌనిజనప్రశంసిత
జయజయ హరి వరదాయక జ్ఞానదాయక
జయజయ సర్వార్తినాశ శరధిబంధన
జయజయ హరి నీలగగనశ్యామ రాఘవ
జయజయజయ భక్తవరద సర్వమోహన
జయజయ హరి కరుణాకర సర్వమంగళ
జయజయ సకలాఘనాశ శాపమోచన
జయజయ హరి ఖలవిదార జలజలోచన
జయజయజయ ఖగవిహర సవనరక్షక
జయజయ హరి పరమపురుష సత్యసుందర
మాయవేసిన వేషముచే మనిషినైతి నేను
మాయవేషము వేసి నీవు మనిషి వైనావు
నీమాయావిలాసమిటు నిగిడించిన సృష్టిలో
ఈమానవుడొకడు పొడమె స్వామి నీ యాటకై
ఏమో ఈయాట యెపుడు భూమిని మొదలాయె
నీమాయ కే యెఱుక నీకే యెఱుక
ఆటను నడిపించువాడ మేటి యాటగాడ
ఆట దారితప్పువేళ ఆటలోన నీవే
సూటిగాను ప్రవేశించి చొక్కమైన తీరు
నాటించియె పోవుదువో నారాయణా
భవతారకరాముడవై ప్రభవించిన నిన్ను
పవలురేలు కొలుచుకొనుచు పాడెదనిట నేను
వివిధమైన తనువులెత్తి వేడుకతో నిటుల
భువిని నీదు నాటకమున పొలుపుగా నటింతు
హరేరామ యనవలెను మీరు హరేకృష్ణ యనవలెను
పరాత్పరా యనవలెను మీరు శరణము హరి యనవలెను
నిరంతరముగా హరినామమునే నిష్ఠగ పలుకగ వలెను
కరుణామయుడగు హరినెప్పుడును మరువకుండ వలెను
సిరిసంపదలును చిరాయువులతో హరిని కొలువవలెను
హరిపదమునకే సంతోషముతో మరలిపోవ వలెను
పరమానందము కలిగించెడు హరి భజన చేయవలెను
తరచుగ శ్రీహరి కథలను చదువుచు ధన్యులు కావలెను
హరి నిజతత్త్వవిచారము చేయుచు నబ్బురపడ వలెను
హరిమందిరములుగా మీహృదయము లమరి యుండ వలెను
హరి మీకనిశము కామితవరములు కురియుచుండ వలెను
హరి మీయోగక్షేమము లెప్పుడు నరయుచుండ వలెను
హరికృపచే మీమిత్ర బాంధవులు పరవశింప వలెను
హరిభక్తులుగా మీరందరు నిల నతిశయించ వలెను
శివశివ యనవలె శ్రీరామ యనవలె
చివరకు బంధవిఛ్ఛేదమ్ము కావలె
హరిహరి యనవలె యపరాధి ననవలె
పరమార్థతత్త్వమ్ము భావించుకొనవలె
తరచుగా తనలోన తాను రమించవలె
మరి జగమంతయును హరిమయ మనవలె
పులకించి హరికీర్తి పొగడుచుండగవలె
కలనైన హరికీర్తనలె పాడుకొనవలె
కలిమాయలను తాను గణియించ ననవలె
తిలకించ హరివిభూతియె సృష్టి యనవలె
హరియంశలే జీవు లందరు ననవలె
హరిహరు లొక్కరే నరులార యనవలె
హరికృప యొక్కటే యాశింతు ననవలె
తిరిగిరాని పదము హరియిచ్చు ననవలె
ఎవ రల్లినారమ్మ యీపూలమాలిక
భువనమోహనుకంఠమున నింత శోభించె
ఏతోటలో పూల నెంచి తెచ్చినారో
సీతమ్మమగని గళసీమలో మాలకు
చేతులారా యెవరు చేసిరో యీమాల
ప్రీతితో శ్రీరామవిభున కర్పించగ
శ్రీపతిమెడలోన చేరి సేవించిన
యీపూలసౌభాగ్య మింత యనగరాదు
యేపుణ్యపురుషుని హృదయపూర్వకసేవ
రూపుగట్టిన మాల లోకేశు మెడ నిండె
ఈమాలికాసేవ యిచ్చు మంగళములు
ఆమహాత్ముని కబ్బు నఖిలసౌఖ్యములును
రామయ్యకృప వలన రావింక భవములు
స్వామి సన్నిథి నుండ జాలు నిక స్థిరముగ