అన్నలారా నమ్ము డున్నాడు శ్రీరాము
డామాట నిజమని విన్నవింతు
ఉన్నాడు నారాము డున్నాడు వానికై
యున్నాను నేనని విన్నవింతు
ఉన్నాడు నాప్రక్క నున్నాడు నారాము
డన్నివేళల నని విన్నవింతు
ఉన్నాడు నీవందు వున్నచో చూపించు
మన్న నశక్తత విన్నవింతు
ఉన్నచో మాకేల నెన్నడు కనుపించ
డన్నచో నేమందు మిన్నకుందు
అన్నవేళల యోగిబృందంబునకు చాల
సన్నిహితుండని విన్నవింతు
అన్నివేళల భక్తకోటుల కత్యంత
సన్నిహితుండని.విన్నవింతు
అన్నివేళల శరణమన్నవారికి చాల
సన్నిహితుండని విన్నవింతు
అన్నిజన్మము లందు హరి నాకు మిక్కిలి
సన్నిహితుండని విన్నవింతు
