విరులివిగో చేయరే హరిపూజలు

విరులివిగో చేయరే హరిపూజలు
విరులు వాడును సుమా వేళదాటిన

గుడి తలుపులు తెరచినారు కోమలులార
వడివడిగా రండు చేయవలయు పూజలు
మడి పళ్ళెరముల పూల మంచిపూజలు
పడతులార హరికి చేయవలయు పూజలు

పరమాత్ముని సన్నిధికి బిరబిర చేరి
పరమభక్తి తోడ చేయవలయు పూజలు
హరికి యిష్టమైన పూవు లమరించి పూజలు
తరుణులార చేయవలయు తగినపూజలు

చిరునగవుల జగములేలు శ్రీపతియైన
ధరాసుతాపతికి చేయదగును పూజలు
హరేరామ యనుచు పూవు లమరించి పూజలు
వరారోహలార చేయవలయు పూజలు