రాముడు రాడా రాముడు లేడా

 
రాముడు రాడా రాముడు లేడా
స్వామికి నాపై జాలే లేదా

ఎందుకు నన్నీ యిలపై కంపెను
ఎందుకు కష్టము లిన్నిటి నిచ్చెను
ఎందుకు మొరవిన నిచ్చగించడో
ఇందే మర్మం బిముడి యున్నదో

తన యాదేశమె తలపై దాల్చితి
తన కార్యములకె ధరకరు దెంచితి
తన పారమ్యమె ధర కెరిగించితి
తన కేమిటి కని దయరాదాయెను

పెక్కు జన్మముల పిలిచి యలసితిని

పెక్కు విధంబుల పిలిచి యలసితిని

ఒక్క మారయిన దక్కడు చూపుకు

ఒక్క మారయిన చక్కగ పలుకడు

కనబడితే నే వెనుదవిలెద నని

కనరాకున్నా డనుకొన వలెనా

కనరాకున్నా డని నే నలిగితి

ఘను డదియైనను గమనింపడుగా

కరుణాత్ముండని గట్టిగ పొగడితి

హరి యది వినియును కరుగడు చిత్రము

సరిసరి యిక నీ స్వస్థానమునకు

తిరిగి రమ్మనడు దేవుడు చూడుడు

హరా యనక హరీ యనక మరే మందువో

 

హరా యనక హరీ యనక మరే మందువో

మరే మనిన మోక్ష మబ్బు మాట సున్నరా

హరహర శివ శంభో యని యార్తితో పిలిచితే

పరమశివుం డగుచు నీకు పలుకునురా దైవము

హరదీక్షాపరుడ వగును నరజన్మము నడిపితే

మరల గర్భనరక మన్న మాట లేదు సత్యము

రామ రామ రామ యని ప్రేమతో పిలిచితే

రామచంద్రు డగుచు నిన్ను రక్షించును దైవము

రామభక్తివిశేషమే ప్రాణముగా బ్రతికితే

భూమి నింక నీ వెన్నడు పుట్ఝబోవు సత్యము

ఎవరెవరినొ యెంచి నీవు యింపుగా పిలిచితే

భువిని నిన్ను కటాక్షించబోదు కదా దైవము

వివర మెరిగి హరిహరులను వేడుకొన్న వారికే

భవబంధవిమోచన మను పలుకు మిగుల సత్యము

హరేరామ యనే శ్రీహరినామము

హరేరామ యనే శ్రీహరినామము
హరేకృష్ణ యనే శ్రీహరినామము

అతిసులభ మైనది హరినామము
అతిసుఖద మైనది హరినామము
అతిమధుర మైనది హరినామము
అతి విమల మైనది హరినామము

పరమసంపత్ప్రదము హరినామము
పరమశాంతిప్రదము హరినామము
పరమతేజఃప్రదము హరినామము
పరమధామప్రదము హరినామము

నిరుపమానధనము హరినామము
పరమయోగిహితము హరినామము
పరమేష్ఠి భావించు హరినామము
పరమశివుడు నుడువు హరినామము

ధర మీద పుట్టించి తైతక్క లాడించి

 
ధర మీద పుట్టించి తైతక్క లాడించి
హరి నీవు మాతోడ నాడేవులే బలే

ఆంతు తెలియగ రాని వింతలు కల్పించి 
అంతంతమాత్రపు నాటకు రుచిపెంచి
చింతలు కల్పించి చిందులు వేయించి
అంతలోనే యెంచి యవలకు పంపించి

వేల వేసంబులు వేయించి పిమ్మట
జాలిని చూపించి చాలించి యాటను
లీలగ వేరొక్క రీతిగ నాడింప
ఆలోచనము చేసి మేలైన విధమెంచి

పామరత్వము బాపి బహు దీవనలు సేసి
రామనామ మిచ్చి రంజుగ పాడించి
నామపారమ్యము నలుగడ చాటింప
భూమిని నీభటుల పొలుపుగ మమ్మిట

గోపాల గోవింద మాంపాలయ

గోపాల గోవింద మాంపాలయ పరి

తాపోపశమనైకదక్షకృపామేఘ

కేశవ మాధవ కిల్బిషమోచన

నాశనరహిత యనాథశరణ్య

దశరథసుత భవతారణనౌకా

శ్రీశ సురాధిపసేవ్యపదాంబుజ

కామితదాయక కరుణాధామా

శ్రీమద్దశరథప్రియధన రామా

పామరపండితభావితనామా

క్షేమంకర హరి శ్రితజనవత్సల

కరధృతభూధర ఘనసుగుణాకర

గురుమఖరక్షక సురరిపుశిక్షక

సురగణతోషక సుజనసుపోషక

హరి నిర్వాణమహాఫలదాయక

కరుణించవలయు నను కాదులే దనక

 

కరుణించవలయు నను కాదులే దనక

పరమభక్తుడనను భావంబు తోడ

నరసింహుడవు నీవు నారాయణుడ వీవు

పరమాత్ముడవు నీవు పట్టాభిరామా

కరుణాళుడవు నీవు వరదాయకుడ వీవు 

సురసేవ్యుడవు నీవు సొంపుమీరగను

కరివరదుడవు నీవు కాలరూపుడ వీవు

పురుషొత్తముడ వీవు భువనైకనాథా

ధరణిజాపతి వీవు సరసహృదయుడ వీవు 

సురవైరికాలుడవు సొంపుమీరగను

రవికులేశుడ వీవు రఘునాథుడవు నీవు

కువలయేశుడ వీవు గోవిందరామా

భవతారకుడ వీవు బాగుగా నామొఱల

నవధరించుచు మిగుల నానందముగను

శ్రీరాం జయరాం సీతారాం

 

శ్రీరాం జయరాం సీతారాం

కారుణ్యాలయ శ్రీరఘురాం

దినకరఘనకుల దీపన రాం

జననుతసద్గుణసంయుత రాం

మునిజనకామిత మోహన రాం

దనుజకులైకవిదారణ రాం

విరించిసన్నుతవిక్రమ రాం

ధరాతలేశ్వర దశరథ రాం

పురాణపూరుష సురేశ రాం

సురారిగర్వవిశోషణ రాం

పవమానాత్మజ భావిత రాం

భవనుత త్రిజగత్పావన రాం

భువనేశ్వర బుధపోషక రాం

ధవళేక్షణ భవతారక రాం

నీవే దిక్కని నిజముగ నమ్మిన

నీవే దిక్కని నిజముగ నమ్మిన

జీవుడ నిక నీ చిత్తము రామా

అతిచపలాత్ముడ నతిమూఢాత్ముడ

నతిదుర్మార్గుడ నతిపాపాత్ముడ

నతిక్రూరాత్ముడ నయ్యును నీయెడ

నతివినయాత్ముడనై యనిశయంబును

దొరకిన జన్మము దురుపయోగముగ

దిరిగితి స్వల్పము లరయుచు ధరపై

మరవరాని నిను మరచి చరించితి

స్ఫురణ కలిగి యిదె శరణం బంటిని

పగవా డైనను పాదము లంటిన

తగిన విధంబుగ దయజూపెదవే

జగదీశ్వర నను సత్వర మేలగ

తగు నని తలపవె దశరథనందన

నిను దక్క వేరెవ్వరిని

నిను దక్క వేరెవ్వరిని నమ్మని
నను బ్రోవ బెట్టేల నాస్వామి

నీవుండ చేజాచి నేనొరుల కడ
నేవేని వేడిన దెన్నడు లేదే
నీవేది యిచ్చిన నేనది గైకొని
భావింతు నదియే పదివే లనుచును
నావంక జూచుటె నగుబాటన్నట్లు
నీవేల నటనలు నేడు సేసేవు

ఎన్నెన్ని జన్మల నెత్తించినావో
ఎన్నండు నందుల కేమన లేదే
తిన్నగా నిచ్చిన దేహము గైకొని
నిన్నలరింపగ నే నాడితినే
అన్నన్నా నేనలసితి నంటేను
విన్నను వినలేదన్నటు లున్నావు

పెద్దపేరే గల వెన్నుడవే నీవు
పెద్దగ సిరులేవి వేడుటలేదే
కొద్దిగ దయజూపి కోదండరామా
అద్దరి ననుజేర్చ మంటినిగాని
ముద్దుగ భక్తాళి మొరలే వినరాని
మొద్దునిద్ధురలో మునిగున్నావో

హరేహరే

హరేరామ హరేరామ రామరామ హరేహరే
హరేకృష్ణ హరేకృష్ణ కృష్ణకృష్ణ హరేహరే

నిరుపమానగుణాకర నీలవర్ణ హరేహరే
పరమయోగిసేవ్యమాన పాదపద్మ హరేహరే

మారజనక నారాయణ మధుసూదన హరేహరే
దూరీకృతభవబంధన తోయజాక్ష హరేహరే

దానవేంద్రమదవిదార మానవేంద్ర హరేహరే
జ్ఞానగమ్య సదానంద శ్రీనివాస హరేహరే

మునిమానసరాజహంస వనజేక్షణ హరేహరే
జనకసుతామనోరమణ జగదధీశ హరేహరే

సనకాదిమునీంద్రవినుత సర్వేశ్వర హరేహరే
వినతాసుతఘనవాహన విష్ణుదేవ హరేహరే

శాపతాపశమననిపుణశాంతమూర్తి హరేహరే
పాపతిమిరవిధ్వంసనభానుమూర్తి హరేహరే

సురనాయక నరనాయక వరదాయక హరేహరే
సురసన్నుత హరసన్నుత పురుషోత్తమ హరేహరే

సంసారనివార రామచంద్రదేవ హరేహరే
కంసాంతక కృష్ణచంద్ర కలుషాంతక హరేహరే

నీవెక్కడ నీవెక్కడ నిన్నే నమ్ముకున్నాను

 

నీవెక్కడ నీవెక్కడ నిన్నే నమ్ముకున్నాను

రావేమీ రావేమీ రామా యెంత పిలిచాను

కనుపాపలు నీకొరకై కలలుకనని దినం లేదు 

వినువీధిని నాపిలుపే వినిపించని దినం లేదు

నినువెదకుచు భూమిపైన నేనడుగని ముని లేడు

కనరాక నీవు దాగ కారణమే కనరాదు

కనవచ్చిన నొక్కసారి కరిగిపోయే దేమి నీకు

నను పలుకరించుటయే నగుబాటా యేమి నీకు

క్షణకాలము ననుకలసిన చాలు నీకు పోయేదేమి

మనసుదీర్చ రారాదా మరిమరి ప్రార్ధింతును

సిరిసంపద లడుగుదునని చింతించగ వలదు నీవు

చిరాయువే యడుగుదునని చింతించగ వలదు నీవు

వరములేమీ వలదు నాకు హరి నీదరిసెనము దక్క

మరి యేదీ వలదు నాకు పరమాత్మా రావయ్యా

మానిత సిధ్ధులు మహిమలు

 

మానిత సిధ్ధులు మహిమలు యశములు

  నేనెపుడైనను కోరితినా

పోనీ సిరిసంపద లైనను ఘన

  భోగము లైనను కోరితినా

నీనామము నా నాలుకపైనే

  నిలువ నీయమని కోరితిని

నీనిజతత్త్వము నిచ్చలు తలచే

  నిలకడ నిమ్మని కోరితిని

నీనిజభక్తుల సత్సాంగత్యము

  నిత్యము నిమ్మని కోరితిని

మానక నీమంగళరూపము నా

  మనసున నిలుపగ కోరితిని

నిరంతరముగా నీసేవలలో

  నిలచియుండుటను కోరితిని

పరమాత్ముడవగు నిను సేవించుచు

  పండిపోవుటను కోరితిని

పరుల నెప్పుడును తలపక నిన్నే

  భావించుటనే కోరితిని

శరణాగతవత్సలుడవు నిన్నే

 శరణము మరిమరి కోరితిని

నిను నే కోరిన వన్నియు నుచితము

  లని తెలిసియు కరుణించవుగా

ఘనుడవు కరుణామయుడ వైనను

  నను కరుణించగ తలచవుగా

ఇనకులతిలకా దశరథతనయా

  యీ బెట్టెందుకు రఘురామా

కొనకంటను నను తిలకించిన నీ

  ఘనతకు లోటగునా రామా