పూజించిన శ్రీహరినే పూజింపుము

 
పూజించిన శ్రీహరినే పూజింపుము నీవన్యుల
పూజించిన సత్ఫలములు పుట్టుట కలదా

శివుని శంకరుని హరుని సేవింతును నేనంటే
శివుని శ్రీహరియు సతము సేవించు గద యంటే
భవహరు డాశివు డొకడే వల దన్యుల జోలంటే
శివునే పూజింపుమా శ్రీహరియే శివుడు

శ్రీమాతను లలితాంబను సేవింతును నేనంటే
కామితార్ధప్రదాయిని కదా శ్రీదేవి యంటే
ఆమెను భవతారిణినే ఆరాథించెద నంటే
రాముడే లలితమ్మ భేదమేమి పూజింపుము

రాముడు లలితాంబ రాజశ్యామల శ్రీకృష్ణుడు
రాముడు నారాయణుండు రాముడే శివుడు
ఏమేమో పేర్లు పెట్టి యెవనిగా నెంచిన
ప్రేమతో నాపూజలు  శ్రీహరికే చెందును

అక్కరయే లేనివెన్నొ మిక్కిలిగా పలికేవు

అక్కరయే లేనివెన్నొ మిక్కిలిగా పలికేవు
దిక్కుమాలిన నాలుకా దేవుని పిలిచేవా

కొందరిని నీవేమో కొసరికొసరి పిలిచేవు
కొందరిని పలుకరించ కుతూహలము  చూపేవు
అందరితో నిచ్చకము లాడుచునే తిరిగేవు
ఎందుకే హరిని పలుకరించుటే మరచేవు

కొందరిని గూర్చి బలే గొప్పగా పొగిడేవు
కొందరిని పొగడుటకై కుతూహలము చూపేవు
కొందరిని ప్రతిఫలమును కోరి నీవు పొగిడేవు
ఎందుకే హరియశంబు నించుకయు పొగడవు

హరేరామ యని పలుకుట యంతచేదా యేమి
హరేకృష్ణ యనగ మధురమని తోచదా యేమి
హరినామము విడచి నీవక్కరలేని వన్నియును
తరచుగా వదరేవు తప్పెరుగని ఓరసనా

కలగిన వేళల హరినామం

 
కలగిన వేళల హరినామం మన
సలసిన వేళల హరినామం

తెలియని చోటుల తెలియని మనుషుల
వలన చిక్కులగు పట్టున నొకచో
తెలిసీతెలియక తిరుగగ నగుచో
తెలివిడి కొరకై దేవుని నామం

నిలకడ చెదిరిన నిందలు కలిగిన
తొలగిన తనవారలె కోపముతో
బలవంతులు తనపై పగబట్టిన
వలసిన బలమా భగవన్నామం

హరేరామ యని హరేకృష్ణ యని
పరమాదరమున పలుకుచు నున్నను
తరచుగ నిష్ఠకు తప్పగ నీయని
వరసాధనమును హరినామంబే

ధీరం కరుణాపారావారం

ధీరం కరుణాపారావారం 

  దూరీకృతసంసారం

కారణకారణ మనిశం వందే  

  శౌరిం సర్వశుభాకారం

శతశతమారాకారం కృష్ణం

  జయజయ నందకిశోరం

ధృతగోవర్ధనశైలం కృష్ణం 

  దైత్యానేకవిదారం

శతక్రతుమదసంహారం కృష్ణం 

  ధృతగోవింద సునామం

ధృతగోగోపకరూపానేకం

  చతురానన బహువినుతం

లోపవిరహిత మనంతం కృష్ణం

   దీపిత యాదవవంశం

శ్రీపతి మతిమతిమంతం కృష్ణం

   తాపత్రయవిధ్వంసం

గోపీమానసచోరం కృష్ణం

  తాపసజనమందారం

పాపారణ్యదవాగ్నిం కృష్ణం 

  రూపితవిష్ణుస్వరూపం

హరేరామ యన్నావా హరేకృష్ణ యన్నావా

హరేరామ యన్నావా హరేకృష్ణ యన్నావా

మరేమనక పోయినా తరించేవులే

హరిభక్తుల జేరి హరికీర్తన జేసి

హరికీర్తన లల్లి మురిసేవులే

హరినామ జపము హరికొరకై తపము

హరికొరకే బ్రతుకై మురిసేవులే

హరిశాస్త్రము లరసి హరిపూజల మెరసి

హరికథలను జదివి మురిసేవులే

హరిలీలల దలచి హరిసన్నిధి వలచి

హరి నదియే వేడి మురిసేవులే

హరిపురమున జేరి హరిసన్నిధి జేరి

హరితోనే ముచ్చట లాడేవులే

హరిసన్నిధి విడచి ధర కికపై నడచి

మరలి రావు నీవు మాకెరు కేలే

రామచంద్ర మహారా జేమడిగిన మన కిచ్చును

రామచంద్ర మహారా జేమడిగిన మన కిచ్చును

ఆ మహారాజు నడుగ నామోక్షమును వచ్చును

రామచంద్ర మహరాజు రాజ్యములో నున్నాము

ఆ మహారాజు కరుణ ననుభవించు చున్నాము

ఆ మహారాజు వలన హాయిగ మనమున్నాము

ఆ మహారాజు దైవ మని తలచుచు నున్నాము

రామచంద్ర మహరాజు రక్షణలో నున్నాము

ఆ మహారాజు మావాడని పలుకుచు నున్నాము

ఆ మహారాజు గొప్పయశము చాటుతున్నారు

ఆ మహారాజు దైవమని తలచుచు నున్నాము

రామచంద్ర మహరాజు కతిభక్తుల మైనాము

ఆ మహారాజు ప్రేమ అనుభవించు తున్నాము

ఆ మహారాజు కన్న నన్యమెరుగ కున్నాము

ఆ మహారాజు దైవమని తలచుచు నున్నాము

రామభక్తశేఖరులారా యేమి కావలెను

రామభక్తశేఖరు లార యేమి కావలెను? శ్రీ
రాముల దయయే చాలును మాకింకేమి కావలెను

రామకార్యచతురు లార యేమి కావలెను? శ్రీ

   రాముల యండయె చాలును మాకింకేమి కావలెను

సిరులును సంపద లర్ధించెదరా సీతానాయకుని?

   సిరులును సంపద లిచ్చును నిత్యము శ్రీపతి నామంబె

సరగున భోగము లడిగెదరా మన సాకేతేశ్వరుని?

   నరులకు భోగము నాల్కను రామనామం బుండుటయె

పరివారంబులు దయచేయుమని ప్రభువుల నడిగెదర?

   హరిసేవకులము సేవకు లన్యులు సరిసరి మాకేల

సరసములైన సదుపాయంబులు స్వామిని యడిగెదర?

   హరినామంబును పేర్కొన సదుపాయములే యెల్లెడల

సరిసరి యేమియు వలదని పలుకుట చక్కగ నుండినను

పరమాత్ముడు వర మిచ్చెద నంటే వలదన రాదు కద?

   పరమాత్ముడు వర మిచ్చెద నంటే వలదన రాదు కద

   మరి యిక నెన్నడు ధరపై పుట్టని వరమిచ్చిన చాలు

 

కొత్త గురువులూ కొత్త మతాలూ కొత్త దైవములు వద్దండీ

కొత్త గురువులూ కొత్త మతాలూ

కొత్త దైవములు వద్దండీ

కొత్తకొత్త వేషాలను వేస్తే

చిత్తుగ చెడిపోయే రండీ

ఎంతగ చదివిన గురుచరితములు

ఏమీ లాభము లేదండి

సంతతమ్ము భాగవతము చదివిన

ఎంతో ఫలితము కలదండీ

ఎంతగ ఆగురుభజనలు చేసిన

చింతలు తీరవు సుమ్మండీ

సంతోషముగా హరిని స్మరించిన

చింతలు తీరును నమ్మండీ

కల్లబొల్లి ఉపదేశాలిచ్చే

కల్లగురువులను విడవండీ

నల్లనయ్య శుభ నామము నిచ్చే

చల్లని గురువును చేరండీ

కల్లగురువుల మహిమలు చాటే

కల్లగ్రంథములు విడవండీ

చల్లని శ్రీహరి మహిమలు చాటే

సద్గ్రంథములే చదవండీ

పరాకునైనను అన్యదైవముల

స్మరించరాదని తెలియండీ

హరేరామ శ్రీహరేకృష్ణ యని

అన్నివేళలను పలకండీ

పరాయి మతాల పాలైపోతే

బాగుపడేది హుళక్కండీ

హరినిస్మరించిన మోక్షము కలదని

నరులారా మది నమ్మండీ

నరుడను వానికి హరియను వానికి నడుమ బంధమేమి

నరుడను వానికి హరియను వానికి

  నడుమ బంధమేమి

హరియే దైవము నరుడే భక్తుడు

   అదియే ధృడబంధం

హరి నెరుగనిచో నరునకు కలిగే 

  హాని యేమిటయ్యా

హరి నెరుగనిచో సంసారములో 

  నరుడు తిరుగునయ్యా

తిరుగుట చేతను సంసారములో

  నరున కేమి కష్టం

సరిసరి దుఃఖసముద్రము కాదా

  సంసారము నరుడా

హరి నెరిగినచో నరునకు లాభం

  బరయ నేమిటయ్యా

హరి నెరిగినచో ఆనందామృత 

  మంది వచ్చునయ్యా

మరి యానందము నందుకొన్నచో 

  జరుగున దేమయ్యా

నరుడిక సంసారంబును దాటును

  హరిని చేరునయ్యా

హరిని చేరుటకు సులభమార్గమును

  గురుడా తెలుపవయా

హరిని భక్తితో సేవించుటయే

  నరుడా మార్గమయా

హరిభక్తికి గల సూక్ష్మోపాయము

  గురుడా చెప్పవయా

హరేరామ శ్రీహరేకృష్ణ యని

  యనుటే మార్గమయా

వేరెవరిని పొగడుదురో వెర్రులారా

వేరెవరిని పొగడుదురో వెర్రులారా మన

శ్రీరామచంద్రు డుండ చింతలు దీర్చ

సిరు లడిగిన సిరు లిచ్చును శ్రీరామచంద్రుడు

పర మడిగిన పర మిచ్చును పరమాత్ముడు కనుక

నిరంతరము బహుప్రేముడి నిజభక్తవరేణ్యులు

వరము లే మడిగినను వలదన కిచ్చు

అడుగకయే శాపముడిపె నహల్యకు నడవిలో

నడగకయే పక్షీంద్రుని కందించె మోక్షంబు

నడుగకయే బ్రహ్మపదవి నందించె సామీరికి

యడిగిన మీమీ కోరిక లన్నియు నిచ్చు

ఇచ్చునట్టి శ్రీరఘుపతి యింత సుముఖుడై యుండ

పుచ్చుకొనగ మొగమాటం బిచ్చట మన కెందుకు

సచ్చరిత్రుడు వదాన్యుడు సాకేతపురనాథుని

ముచ్చటగా చేరి మీరు మోక్షమడుగుడు

రామాష్టకం

 

రామనామం బుండ మన నోట 

రామభక్తులు కలుగ మన తోడు 

రామచంద్రుం డుండ మన పాల 

ఏమి కావలె నింక జనులార 1

రామసేవకు నురుకు తనువుండ

రామతత్త్వము విదితమై యుండ

రామచంద్రుడు హృదయమున నిండ

ఏమి కావలె నింక జనులార 2

రామచంద్రుడు బంధువై యుండ 

రామచంద్రుడు మిత్రుడై యుండ 

రామచంద్రుడు గురువుగా నుండ 

ఏమి కావలె నింక జనులార 3

రామకీర్తన వినెడు చెవులుండ 

రామకీర్తన పాడు నోరుండ 

రామకీర్తన చేయు మనసుండ 

ఏమి కావలె నింక జనులార 4

రాముడే మన సంపదగ నుండ 

రాముడే మన భాగ్యమై యుండ 

రాముడే సర్వస్వమై యుండ

ఏమి కావలె నింక జనులార 5

రామునే సేవించు తనువుండ 

రామునే కామించు మనసుండ

రాముడే మన నాథుడై యుండ 

ఏమి కావలె నింక జనులార 6

రామదర్శన కాంక్ష మనకుండ 

రామదర్శన ప్రాప్తి మనకుండ 

రామదర్శన మెపుడు మనకుండ 

ఏమి కావలె నింక జనులార 7

రాముడే హరి యనుచు లోనెఱిగి

రాముడే శివు డనుచు లోనెఱిగి

రామునే లలితమ్మగా నెఱిగి

ఏ మెఱుగవలె మనము జనులార 8

శ్యామలరాయ ప్రణీతము

రామాష్టక మఖిలసుజనరంజక మగుచున్

కామితఫలదం బగుచున్

భూమిజనుల కొసగు గాక భూరిశుభంబుల్

బాలుడండి

సుందరాకారుడండి చూడండి బాలుడండి

అందరకు నభయమిచ్చునండి రండి

బాలుడండి కృతభువనజాలు డండి లోకావన 

శీలు డమ్మ కొంగుచాటు బాలుడండి

బాలుడండి నిత్యశుభదశీలుడండి కంసదైత్య

కాలుడండి నందగోప బాలుడండి

బాలుడండి మునిజననుతశీలుడండి భక్తజన 

పాలుడండి గోపీజనలోలుడండి

బాలుడండి వేణుగానలోలుడండి కాళియఫణ

జాలరంగదివ్యనటనశీలుడండి

బాలుడండి దధిభక్షణలోలుడండి భవమోచన 

శీలుడండి యనుగ్రహశీలుడండి 

బాలుడండి వీడు మున్ను పట్టాభిరాముడండి

నీలమేఘశ్యాముడండి నేడు బాలకృష్ణుడండి

నిశ్చయముగ శ్రీరామా నీవే కడు ఘనుడవు

నిశ్చయముగ శ్రీరామా నీవే కడు ఘనుడవు

ఆశ్చర్య మేమి నారాయణుడవు నీవు

నిశ్చయముగ యోగీంద్రులు నిన్ను ధ్యానింతురు

నిశ్చయముగ జిజ్ఞాసులు నిన్ను వెదకుచుందురు

నిశ్చయముగ నర్ధార్ధులు నిన్ను కోరుచుందురు

నిశ్చయముగ మౌనీంద్రులు నీకై తపియింతురు

నిశ్చయముగ త్రిలోకముల నీవు నడపుచుందువు

నిశ్చయముగ దేవతలును నిన్ను శరణుజొత్తురు

నిశ్చయముగ లోకులెల్ల నిన్ను పొగడుచుందురు

నిశ్చయముగ నీకు సాటి నీవొక్కడ వగుదువు

నిశ్చయముగ తత్త్వజ్ఞులు నిన్ను దర్శింతురు

నిశ్చయముగ సత్పురుషులు నిన్ను పూజింతురు

నిశ్చయముగ సద్భక్తులు నిన్ను సేవింతురు

నిశ్చయముగ వారికెల్ల నీవు ముక్తినిత్తువు

శ్రీరామనామమె చాలు శ్రీరామనామమె మేలు

శ్రీరామనామమె చాలు 

 శ్రీరామనామమె మేలు

శ్రీరామనామమె కాలు 

 దూరముగా నుంచ జాలు

అబలకు రూపము నిచ్చిన నామము

 అతిశుభకరమగు నామము

శబరికి మోక్షము నిచ్చిన నామము 

 శంభుడు మెచ్చిన నామము

పక్షికి మోక్షము నిచ్చిన నామము

 పరమపదప్రద నామము

పక్షికి రెక్కల నిచ్చిన నామము

 అక్షయ మహిమల నామము

దనుజుల గర్వము నణచిన నామము

 తపసులు వలచెడు నామము

హనుమను బ్రహ్మమును చేసిన నామము

 అతిసులభంబగు నామము

సుజనుల కోర్కెలు తీర్చెడి నామము

 విజయప్రదమగు నామము

కుజనుల బుద్ధికి తోచని నామము

 ఘోరభవాంతక నామము

పోడిమి భువనము లేలెడు నామము 

 వేడుకగొలిపెడు నామము

పాడెడు భక్తుల బ్రోచెడు నామము

 పరమోత్సవమగు నామము

యుక్తంబగు సిరులిచ్చెడి నామము

 రక్తిని గొలిపెడు నామము

భక్తుల నేలెడు బంగరు నామము 

 ముక్తిప్రదమగు నామము 

హరేరామ యని హరేకృష్ణ యని యాడవె ఓమనసా

హరేరామ యని హరేకృష్ణ యని

 యాడవె ఓమనసా

మరే మార్గమున మోక్షము రాదే

 బరాబరిగ మనసా

నిరంతరము శ్రీహరినామములే

 నీవు పలుకవలెనే

నిరుపమానుడగు శ్రీహరికీర్తిని

 నీవు చాటవలెనే

పరమాత్ముండగు శ్రీహరి కొకనికె

 నీవు మ్రొక్కవలెనే

తరచుగ శ్రీహరి చింతన లోనే

 నీవు గడుపవలెనే

నిర్మలచిత్తముతో హరి సేవలు

 నీవు చేయవలెనే

నిర్మత్సరతగ హరి భక్తులతో

 నీవు మెలగవలెనే

నిర్మోహుడవై శ్రీహరి కొరకే

 నీవు బ్రతుకవలెనే

నిర్మథితములై నీకర్మంబులు

 నీఱైపోవలెనే

నీ కేలోకుల పలుకుల ములుకులు

 తాకకుండవలెనే

నీకు శ్రీహరి హరికన నీవని

 నీవు తలచవలెనే

లోకంబున హరికన్యము లేదని

 నీకు తోచవలెనే

లోకేశుండగ శ్రీహరి మోక్షము

 నీకీయగవలెనే

నేనొరుగుట క్రొత్త కాదు నీవెరిగినదే

నేనొరుగుట క్రొత్త కాదు నీవెరిగినదే

నీనిర్దయ క్రొత్త కాదు నేనెరిగినదే

వేనవేల భవములుగా విరిగిపడుచునే యున్నవి 

దీనముగా నాతనువులు దేవదేవా ధరను

దాని కేమి యీతనువును ధర కొరగును నీవుజూడ

పోనీ యికచాలని నను భువనేశ పిలిచెదవా

హరేరామ యంటే చాలునందు రదొక దబ్బరయా

హరేకృష్ణ యంటే చాలు ననుటయు దబ్బరయా

మరి యేమిటి చెప్పవయా మానక నే పొగడుచుండ

సరిసరి నీవేమొ మౌనస్వామి వగుచు నుందువుగా

పదివేల దండాలయా పతితపావనా నాపై

సదయుడవగు నీకు దయే జనియించుట లేదా

మదిని నిన్ను నిలిపి పొగడు మానవుడను భక్తుడనే

యిదియే కడసారి యనుచు యిప్పుడైన పలుకవయా

హరినే నెరనమ్మి లాభ మనుభవించే దెవ్వడో

హరినే నెరనమ్మి లాభ మనుభవించే దెవ్వడో 

హరికి నే నన్యమెరుగ నని పలికే దెవ్వడో 

హరిలీలల దడవి తడవి అబ్బురపడు నెవ్వడో 

హరినే తన మనసులోన నరయగలుగు నెవ్వడో

హరిసేవకు సర్వస్వము నర్పించే దెవ్వడో 

నరవరు డామహాత్మునకు నమస్కార శతము

 

హరిభక్తుల సేవించుచు అతిశయించే దెవ్వడో 

హరికీర్తిని చాటించుచు ధరను గ్రుమ్మరు నెవ్వడో

హరిపాదము లాశ్రయించి పరముగొనే దెవ్వడో

నరవరు డామహాత్మునకు నమస్కార శతము

హరిహరి యనుచు సుఖము ననుభవించే దెవ్వడో 

హరేరామ యనుచు మోక్ష మందుకొనే దెవ్వడో

హరేకృష్ణ యనుచు మోక్ష మందుకొనే దెవ్వడో

నరవరు డామహాత్మునకు నమస్కార శతము

లోకమేల లోకులతో నీకు పనియేల

లోకమేల లోకులతో నీకు పనియేల

శ్రీకరుడగు రాముడు నీచెంతనున్న వేళ

తెలియనగు ప్రపంచమెల్ల తెలియు నింద్రియంబుల

కలవంటిది నిజము కాదు కనుక స్థిరబుధ్ధియై

కలరూపు గ్రహించనెంచి కమలాక్షు మదినెంచి

పిలువ పిలువ వచ్చి వాడు పలుకరించు వేళను

మాయామయజగము నందు మసలుట నిక మాని

ధ్యేయమైన నాత్మతత్త్వమే యెంచిన వాడవు

మాయకవల నుండు నారాయణుడే నేడు

హాయిగాను నీవాడై యలరించెడి వేళను

భవచక్రము నందు జొచ్చి పడిన బాధలు చాలు

సవినముగ భవము లింక చాలునని వేడుచు

భవముదాట హరిమార్గము పట్టినట్టి నీకు

అవిరళముగ దారి జూప హరి తోచిన వేళను

హరినామ మింతదని యననేర్తుమా

హరినామ మింతదని యననేర్తుమా

మహదైశ్వర్యమై మనకబ్బెనే గాక

అతిమధుర మైన దీహరినామము

అతిసులభ మైన దీహరినామము

ప్రతి మనిషి గుండెలో ప్రతిక్షణము మార్మోగ

వ్రతముకా దగినదీ హరినామము

అతిసుఖద మైన దీహరినామము

అతిమహిమ నొప్పు నీహరినామము

అతిశయంబుగ జీవు లందరకు నానంద

మతివేలముగ నిచ్చు హరినామము

శ్రీహరేరామ యన చెలగే నిది

శ్రీహరేకృష్ణ యన చెలగే నిది

ఊహింప భవదుఃఖ మాహరింపగ జాలు

నాహా శివార్చిత హరినామము

ఇటులేల చేసితివో యినకులేశ్వరా

ఇటులేల చేసితివో యినకులేశ్వరా

కటకటా ఈదేహి కష్టమే కష్టము

ఘోరభవబంధముల గూర్చి యోచించగ

వైరాగ్యదివ్యసంపదనైన తగినంత

శ్రీరామ నాకీయ చింతించ వైతివే

ఔరౌర యీదేహి కొక దారి యున్నదా

నేరుపున నీసేవ నిరతంబు సేయగా

కోరు చిత్తమును నోచు కొనిన దేహంబును

శ్రీరామ నాకీయ చింతించ వైతివే

నీరేజదళనేత్ర నిన్నే మనగ వచ్చు

నోరార నీపాట నూరూర పాడగల

తీరైన చక్కని తీయన్ని జిహ్వైన

శ్రీరామ నాకీయ చింతించ వైతివే

కారణం బేదైన కష్టమే యిదినాకు

నేనుండేదా యిటుల నేనుండేదా

నేనుండేదా యిటుల నేనుండేదా రామ

నేనుండేదా హాయిగా నుండేదా

నీయందే శ్రధ్ధ నిలిపి నీయందే బుధ్ధి నిలిపి

నీయందే తెలివి నిలిపి నేనుండేదా

నీయందే శాస్త్ర మరసి నీయందే సత్య మరసి

నీయందే  జ్ఞాన మరసి నేనుండేదా

నీయందే మనసు కలిగి నీయందే ఆశ కలిగి

నీయందే ప్రేమ కలిగి నేనుండేదా

నీయందే విశ్వ మెరిగి నీయందే సర్వ మెరిగి

నీయందే నన్నెరింగి నేనుండేదా

నీయందే రక్తి నొంది నీయందే భక్తి నొంది

నీయందే శక్తి నొంది నేనుండేదా

నీయందే యునికి నరసి నీయందే మనికి నరసి

నీయం దానంద మరసి నేనుండేదా

హరేరామ హరేకృష్ణ హరేవాసుదేవ

హరేరామ హరేకృష్ణ హరేవాసుదేవ శ్రీ

హరే పరమానంద అంబుజనాభ

హరే దశరథాత్మజ హరచాపఖండన

హరే నందకుమారక గిరిధర గోవింద

హరే సురవైరిగర్వహరణవిజయశీల

పరాకేల ననుబ్రోవ పతితపావన

హరే రామచంద్ర మునియాగ సంరక్షక

హరే కృష్ణచంద్ర సర్వాత్మక గోవింద

హరే వసుంధరాభారహరణశుభదశీల

పరాకేల ననుబ్రోవ పతితపావన

హరే భక్తజనావన హరే ధర్మరక్షక

హరే పాపవిషవపదావానల గోవింద

హరే సదామునిమోక్షవితరణకృపాశీల

పరాకేల ననుబ్రోవ పతితపావన

పాడండీ హరిని గూర్చి ఆడండీ హరికొరకే

పాడండీ హరిని గూర్చి ఆడండీ హరికొరకే

వేడండీ హరి నొకనే వేడుకతో మీరు

పాడదగిన వా డింకొక భగవంతు డనగ లేడు

వేడదగిన వా డింకొక విభుడెవ్వండును లేడు

ఆడించే ఆటగాడు హరికన్యుం డన లేడు

వేడుకగా హరియే మీవాడై యున్నాడు

వాడు మిమ్ము సత్కృపతో పాలించుచు నున్నాడు

వాడు మీకు సమస్తమును ప్రసాదించు చున్నాడు

వాడు మీకు సమీపమున వర్తించుచు నున్నాడు

వాడు మీకు మోక్షమిచ్చు వాడై యున్నాడు

హరేరామ యనుచును మీ రాడండీ పాడండీ

హరేకృష్ణ యని వేడ్కగ నాడండీ పాడండీ

మరొక్కరిని తలపోయగ మనకేల చెప్పండీ

హరికై మీరాడి పాడి యానందము పొందండీ

సతులారా శోభన పాడరమ్మ??

ఈరోజున ఒకటపా కంటబడింది.
చూడరమ్మ సతులారా శోభన పాడరమ్మ

దయచేసి సంప్రదాయసాహిత్యాన్ని గురించిన రచనలు చేసేవారు కొంచెం జాగరూకులై ఉండండి. 

అప్పటి సాహిత్యకారుల రచనలను తెలిసో తెలియకో దిద్ది ప్రకటించే ముందు తమకు ఆపని చేసేందుకు తగిన అధికారమూ సాధసంపత్తీ ఉన్నాయా అన్నది బాగా వివేచన చేసుకొని కాని ఆమహానుభావుల వ్రాతలలో తప్పులు దిద్దే సాహసం చేయకండి. 

అన్నమయ్య సాహిత్యాన్ని గురించి, అది ఒక ఆరువందల యేండ్ల క్రిందటి భాషాస్వరూపంగా, కవిత్వధోరణిగా ముందు అవగాహనలో ఉంచుకోండి.  వాటి గురించి తగినంత సాధికారికంగా తెలియనిదే ఆయననే తప్పులు దిద్దే పని చేయకండి.

"అదివో అల్లదివో హరివాసము" అన్న దానిని  "అదిగో అల్లదిగో శ్రీహరివాసము" అని మార్ఛి పాడే అతితెలివి ప్రచారంలో ఉంది! ఎవరీ పని చేసారో తెలియదు. అన్నమయ్య అదిగో బదులు పొరపాటున అదివో అనలేదండీ. అక్కడ శ్రీ అని చేర్చి యతిభంగం చేసారే అసలు ఆయన యతిప్రాసలను నియమంగా పాటిస్తారని తెలుసుకోలేకపోయారు కదా! తప్పుడుపాఠం ప్రచారం కావటం దురదృష్టం. ఎవరిదో దురహంకారం ఫలితం.

ఈకీర్తనలో ఈటపాలో సతులాల అన్నమాటను సతులారా అనిదిద్దారు. సోబాన అన్న దానిని శోభన అని దిద్దారు!

"సతులారా", "శోభన పాడరమ్మ" అని కాదండీ "సతులాల", "సోబాన పాడరమ్మ" అనే సాహిత్యం. తితిదే వారి ప్రచురణను పరిశీలించండి.

ఓపికలేదా? ఈప్రయత్నాలు మానుకోండి. తెలిసీతెలియని విధంగా వ్రాసి పెద్దల సాహిత్యాన్ని అవమానించకండి, దాన్ని భ్రష్టు పట్టించకండి. 

పైగా "కలశాబ్ది" పదాన్ని "కళాశాబ్ధి" అని మార్చటం ఘోరాతిఘోరవిషయం! ఏమివ్రాస్తున్నారో ఆవ్రాసేవారికి అవగాహన లేదే! దారుణం.

అక్కడ ఆటపాను ఇంక చదువలేదు. చదువలేను కూడా! ఇంకేమి తప్పులున్నాయో!

ఈమాటలు కొన్నింటిని టపాకు ఒక కామెంటుగా పంపాను. ఐనా అందరికీ అందుబాటుగా ఉండాలని ఒక టపా రూపంలోనూ బ్లాగులో ఉంచుతున్నాను.

జనకజామనోభిరామ సాకేతరామ

జనకజామనోభిరామ సాకేతరామ

వినుము నేను నీకు చేయు విన్నప మొకటి

నా కడింది పుణ్యమునకు నీకు బంటు నైతిరా

నీకు గాక వేరెవరికి నేను విన్న వింతురా

లోకవృత్తములను గూర్చి నాకు చింత లేదురా

శ్రీకర యీజీవికి నీ సేవచాలు వినవయా

నీ వభయము నిచ్చెదవని నిన్ను చేరితిని కదా

నీ వాడను భక్తుడనని నిత్య మందునే కదా

నీవు తీర్చలేని కోర్కె నేను కోరనే కదా

భావజారివినుత రామ బాగుగ వినవయ్యా

నాకు కలుగు ముందటిగతి నీకెరుకే లేవయా

నాకరమును విడవనుచు నాకు వరము నీవయా

నాకమైన నరకమైన నాకు భయము కాదయా

నాకదియే చాలునయా నామొర వినవయ్యా

నిజమేమో గోపబాల నీకే యెరుక

నిజమేమో గోపబాల నీకే యెరుక యింక

ఋజువులేల మధురకేగు విజయశీల

ఎపుడు తిరిగి వచ్చెదవో యెవ్వరి కెరుక నీ

కృప యెన్నడు కలుగునో కృష్ణ ముకుంద

అపకారిని కంసరాజు నణచి ప్రజలకు నా

యుపకారము చేసి వచ్చుటున్నదా నిజముగా

తలిదండ్రుల చెరబాపగ తరలుట తగును నె

చ్చెలు లెదురు చూచెదరని తలచుట తగును

కొలువ నృపులు మధురలోన  నిలుచుట తగును నీ

తలపు మాకు గోపబాల తెలియకున్న నిజముగా

క్షేమముగా తిరిగిరమ్ము కృష్ణా యనుచు హరి

మేమెల్లరమును నిన్ను మిగుల దీవించి

ఆమధురకు పంపుచుంటి మది మరిచెదవో మా

ప్రేమలనే తలచి మరల విచ్చేతువొ నిజముగా

హరినామ మేదైన నది మంత్రమే

హరినామ మేదైన నది మంత్రమే

హరిమంత్ర మేదైన నారాధ్యమే

హరినామమును బలుకు టది పూజయే

హరికథలను చదువు టది పూజయే

హరిభక్తులను జేరు టది పూజయే

హరి శరణజొచ్చుట యది పూజయే

హరిపూజ నొనరించ నది యజనమే

హరిభజన చేసిన నది యజనమే

హరికీర్తనము జేయ నది యజనమే

హరిప్రీతిగా జేయు నది యజనమే

నరునకు హరిభక్తి యరుదైనదే

మరియును కలియందు మానక హరినామ

స్మరణ మబ్బిన చాలు మరి ముక్తియే

అరిది హరేరామ యన ముక్తియే

నరుని జేరితే బంధము హరిని జేరితే మోక్షము

నరుని జేరితే బంధము

  హరిని జేరితే మోక్షము

అరయ నిజంబిది స్పష్టము

  మరి నీ కిందే దిష్టము

కాలము కలిగించును బంధంబులు

 ఘనముగ నీ విల కలిగిన నాడే

కాలము కరిగించును బంధబులు

  చాలని దేహము విడచిన నాడే

కాలము కల్పించెడు బంధంబులు

   కాయముతోనే కలుగును తొలగును

చాలు నరులతో చచ్చుబంధములు

   సంపాదించుము హరితో బంధము 

సతులు బంధములు సుతులు బంధములు

  అతిశయముగ చుట్టములు బంధములు

అతిప్రేముడిగల హితులు బంధములు

  అతిగ మెచ్చు స్నేహితులు బంధములు

క్షితిని కొందరు మోహబంధములు

   ప్రతిగ కొందరు ద్వేషబంధములు

మతిమంతులు బంధము లివి వలదని

 మదిని కోరుదురు హరితో బంధము 

నరులకు నరులకు మధ్య బంధములు

  నమ్మగ రానివి మాయబంధములు

హరే రామ యన హరితో బంధము

  సరగున కలుగును తొలగని బంధము

హరే కృష్ణ యన హరితో బంధము

  సరగున కలుగును తొలగని బంధము

మరియొక విధమున హరితో బంధము

  నరునకు కలుగదు నమ్మకమైనది

శ్రీరామ శ్రీరామ శ్రీరామ యనువాడు

శ్రీరామ శ్రీరామ శ్రీరామ యనువాడు 

  చెడిపోడు చెడిపోడు చెడిపోడు

శ్రీరామ యనిగూడ చెడిపోతి ననువాడు

  సృష్టిలో నిందాకనే లేడు

శ్రీరామ శ్రీరామ యనుచున్న నాసాధ్వి

   శ్రీరాముని గాంచి సిధ్ధిపొందె

శ్రీరామ శ్రీరామ శ్రీరామ యని పక్షి

  చెందెనే మోక్షమును సూటిగాను

శ్రీరామ నామమును చెవుల వినిన పక్షి

  చెందెనే స్వస్థతను తక్షణమ్ము

శ్రీరామ చింతనమె శ్రీరామ దర్శనమె

  శ్రీరామ శ్రవణమె చాలు కనుక

శ్రీరామ శరణమని వేడిన వాయసము

  చెందెనే శీఘ్రముగ ప్రాణభిక్ష

శ్రీరామ శరణమని వేడిన కపిరాజు

  చెందెనే రాజ్యమును శీఘ్రముగను

శ్రీరామ శరణమని చేరి రావణభ్రాత

  చెందె నభయము రాజ్యసిధ్ధి గూడ

శ్రీరాముని శరణుజొచ్చు వా రందరకు

  సిరు లభయములను కీర్తి తిరము కనుక

శ్రీరామ శ్రీరామ శ్రీరామ యని భజన

  చేయుటకు మించినది సుఖము లేదు

శ్రీరామ శ్రీరామ శ్రీరామ యని సతము

  చింతించు జీవి కిక చింత లేదు

శ్రీరామ శ్రీరామ శ్రీరామ యను వాని

  చెందకుండెడు నట్టి సిధ్ధి లేదు

శ్రీరామ శ్రీరామ శ్రీరామ యని పల్కు

  జీవికిక గర్భనరకంబు లేదు

నందాత్మజ మప్రమేయం

నందాత్మజ మప్రమేయం

వందామహే సతతం

గోపీమానసచోరం

శ్రీపతి మతిశయవీరం

గోపాలం నతదిక్పాలం

తాపసజనమందారం

సుందరగోపకుమారం

బృందావనసంచారం

నిందితదైత్య‌సమూహం గో

విందం పరమానందం

వ్యక్తావ్యక్యస్వరూపం

ముక్తజనార్చితతత్త్వం

ముక్తివితరణసుశీలం స

ద్భక్తజనావననిపుణం

హరికృపయే మన కానందము

హరికృపయే మన కానందము శ్రీ

  హరికృపయే మన కాధారము

హరికృపయే మన కైశ్వర్యము శ్రీ

  హరికృపయే మన కతిముఖ్యము

హరికృప కలిగిన నఖలైశ్వర్యము

  లాతని ముంగిట నిలుచునుగా

హరికృప కలిగిన నది యిది కావలె

  నను కోరికలే కలుగవుగా

హరికృప కలిగిన నవనీశులకును

  నాతడు సంపూజ్యుండగుగా

హరికృప కలిగన నఖిలజగంబుల

  నతడికి యెదురే కలుగదుగా

హరేరామ యని నిరతము పలికే

  నరులకు హరికృప కలుగునుగా

హరేకృష్ణ యని మురియుచు పలికే

  నరులకు హరికృప నిత్యముగా

హరికృప కన్నను నఖిలవిశ్వమున

  అడుగదగినదే కలుగదుగా

హరికృప కలిగిన నాతడు క్రమ్మర

  నవనిని గలుగుట కలుగదుగా

పరమేశ్వరుడే నాగురువు

గురువంటే నాగురువే గురువు

పరమేశ్వరుడే నాగురువు

గురువులకే తొలిగురువై వెలసిన

పరమేశ్వరుడే నాగురువు

హరినామము నాచెవిలో చెప్పిన

పరమేశ్వరుడే నాగురువు

పరమపదమునకు దారిని చూపిన

పరమేశ్వరుడే నాగురువు

హరిజపమును నాకలవడ జేసిన

పరమేశ్వరుడే నాగురువు

హరికథలను గిరిసుతతో బలికిన

పరమేశ్వరుడే నాగురువు

హరిభక్తుల నాదరముగ జూచే 

పరమేశ్వరుడే నాగురువు

హరేరామయని యనిశము పలికే

పరమేశ్వరుడే నాగురువు

హరిభక్తులలో నగ్రగణ్యుడగు

పరమేశ్వరుడే నాగురువు

నీవాడ నీవాడ రామయ్యా

నీవాడ నీవాడ రామయ్యా

నావాడవై యుండు రామయ్యా

నీవాడనే కాని రామయ్యా 

  నేనెవరి వాడను రామయ్యా

నీవిచ్చునది కాక రామయ్యా

  నేనేమి కోరెదను రామయ్యా

నీమాట వినకుండ రామయ్యా 

  నేనెందు బోదునో రామయ్యా

నీమంత్రమే కాక రామయ్యా

  నేనేమి జపియింతు రామయ్యా

నీపాటలే గాక రామయ్యా 

  నేనేమి పాడుదును రామయ్యా

నీపలుకులే గాక రామయ్యా

  నేనేమి గణియింతు రామయ్యా

నీయనుమతిని గాక రామయ్యా

  నేనేమి చేయుదును రామయ్యా

నీయానచే గాక రామయ్యా

  నేనేల ధరనుందు రామయ్యా

నీభక్తులే గాక రామయ్యా

  నేలపై హితులెవరు రామయ్యా

నీభూరికృప గాక రామయ్యా

  నేనేమి వలచెదను రామయ్యా

నరులార మీరెరుగ నాల్గు మాటలు

నరులార మీరెరుగ నాల్గు మాటలు చెప్ప

  హరియానతిని గొని పలుకుచుంటి

హరిరాజ్యమున నుండు హరిభటుడను నేను

  హరియాన తలదాల్చి ధర జేరితి

హరి మెచ్చుకొను నటుల ధరపైన నేనిపుడు

  హరికార్యనిర్వహణ మం దుంటిని

హరినామమును నేను ధరియించి జిహ్వపై

  హరిమహిమ చాటుచును తిరుగుచుంటి

హరికీర్తనలు నేను మరువక జేయుచును

  హరిభక్తులకు పంచిపెట్టుచుంటి

నరులకు హరిపట్ట తిరమైన సద్భక్తి

  నాటించుటకు కృషి చేయుచుంటి

నరునకు హరేరామ యను మంత్రజపనిష్ఠ

  అందించు ఫలము వివరించుచుంటి

నరునకు హరేకృష్ణ యను మంత్రజపనిష్ఠ

  అందించు ఫలము వివరించుచుంటి

హరిసేవలో మీరు తరియించ దలచుచో

  హరిమెచ్చునని మీకు చెప్పుచుంటి

హరిభక్తివిరహితులగు వార లెన్నటికి

  తరియించలే రనుచు తెలుపుచుంటి

హరిభక్తిపరిపూర్ణులగు వారు చెడిపోవు

  టనుమాట లేదనుచు నుడువుచుంటి

హరి నాదు సేవలకు నానందపడుచుండు

  నని నమ్మి హరికొరకు బ్రతుకుచుంటి

హరినామజపపరాయణులార హరి మీకు

  పరమపద మిచ్చునని పలుకుచుంటి

  

హరహర యటువంటి మాట యసలుండునా

హరహర యటువంటి మాట యసలుండునా

హరిభక్తుడ వింక లోపమన్న దుండునా

హరినామము నాశ్రయించి నది నిజమైతే

మరి రసనకు నన్యులనామములు చేరునా

హరిపాదము లాశ్రయించి నది నిజమైతే

మరి వేరొక్కనికి మ్రొక్క మనసు వచ్చునా

హరిభక్తుల నాశ్రయించు నది నిజమైతే

మరి పామరజనుల చేరు మాట యుండునా

హరిపూజల నాచరించు నది నిజమైతే

హరికన్యుల పూజించుట యన్న దుండునా

అరయ రామభక్తుడ వను నది నిజమైతే

పరమశివుడు నాగురువని పలుకకుందువా

హరిజపమున నీవు పండినది నిజమైతే

తరియించక మరల నీవు ధరకు వత్తువా