కులుకుచు నాగుండెలోన కూరుచున్న వాడవు

 
కులుకుచు నాగుండెలోన కూరుచున్న వాడవు నీ
వులుకుపలుకు లేకుండగ నుండనేలరా 

నేల నాలుగు చెరగులను నేను నీదు కీరితినే
మేలుగాను చాటుచుండ మెచ్చికోలుగ
వీలైతే యొక్కమాట వీలుకాదొ చిరునగవు
చాలు కదా దయచేయగ జాలవేమిరా

ఇన్ని జన్మములను దాల్చి యింత కాలముగను నేను
నిన్ను పొగడుచుండ నీవు మిన్నకుందువా
కన్నతండ్రి వనుచు కదా నిన్ను నేను పొగడుచుంటి
కన్నబిడ్డ ననుచును మమకారము లేదా

ఇంత గురుతు నిచ్చి మరియు నంత ముద్దు చేసి యిపుడు
సుంత కరుణ జూప వింత పంతమేలరా
చింతలన్ని చెదరగొట్టి శ్రీరామా కావుమన్న
వింతగాను నీవు వినియు విననియటు లుందు వేరా