అడవిపూలతో దండ

  
అడవిపూలతో దండ నల్లి తెచ్చి రామయ్య
మెడలోన వేసి మురిసె మేదినీసుత

నాకు దండ నల్లి తెచ్చినావు నీవు జానకీ

నీకు దండ నల్లి వేయ నాకు వశంబౌనటే

నాకా పుష్పాపచయపు నాజూకును తెలియదే

ఈ కార్ముకవిద్య తప్ప యేమి చేతు ననెను హరి

అంతలోనె సౌమిత్రియు నరుగుదెంచెను బుధ్ధి

మంతుడైన నతడు తెచ్చె మంచి వనమాలికను

సంతోషపడుచు నంత స్వామి వనమాల సీతా

కాంత కంఠసీమ నుంచి గలగలమని నవ్వెను

చిరునగవుల సౌమిత్రియు సీతారాముల జూచి

విరిదండను దాల్చినాడు వేడుకతో మాయన్న

సరి సరి వనమాల దాల్చె చక్కగా వదిన యన

హరి ధరాత్మజలు దండ లపుడు మార్చుకొన్నారు