ముచ్చటగా నాడుచున్న బొమ్మ పాతబడిన దని
యచ్చముగా నావలెనే యాలోచించేవా
మంచి వేషగాని కొక్క మంచివేష మనుచు లేదు
మంచిదే యెట్టి వేష మైనను గాని
కొంచెమైన సిగ్గులేక కోతివేష మైన వేయు
నంచితముగ రాజువేష మైనను వేయు
ఎట్టి వేష మైన వేసి యెట్టి మాట లైన నాడి
యెట్టి పనుల నైన చేసి యించు కంతయు
కట్టుబడక వేసంబుల కల్లనిజంబులకు తాను
గట్టిగ రంజింపజేయు ఘనుడా రామ
వేసి వేసి వేసంబులు విసువు చెందవచ్చు గాక
వాసిచెడిన ఈబొమ్మను వదలి నీవు
చేసిన వేరొక్కబొమ్మ జేరి యాడ కుండ దరమె
నీసంతసమునకు మరల నేనాడెదను
