నిజమేమో గోపబాల నీకే యెరుక

నిజమేమో గోపబాల నీకే యెరుక యింక

ఋజువులేల మధురకేగు విజయశీల

ఎపుడు తిరిగి వచ్చెదవో యెవ్వరి కెరుక నీ

కృప యెన్నడు కలుగునో కృష్ణ ముకుంద

అపకారిని కంసరాజు నణచి ప్రజలకు నా

యుపకారము చేసి వచ్చుటున్నదా నిజముగా

తలిదండ్రుల చెరబాపగ తరలుట తగును నె

చ్చెలు లెదురు చూచెదరని తలచుట తగును

కొలువ నృపులు మధురలోన  నిలుచుట తగును నీ

తలపు మాకు గోపబాల తెలియకున్న నిజముగా

క్షేమముగా తిరిగిరమ్ము కృష్ణా యనుచు హరి

మేమెల్లరమును నిన్ను మిగుల దీవించి

ఆమధురకు పంపుచుంటి మది మరిచెదవో మా

ప్రేమలనే తలచి మరల విచ్చేతువొ నిజముగా

నందాత్మజ మప్రమేయం

నందాత్మజ మప్రమేయం

వందామహే సతతం

గోపీమానసచోరం

శ్రీపతి మతిశయవీరం

గోపాలం నతదిక్పాలం

తాపసజనమందారం

సుందరగోపకుమారం

బృందావనసంచారం

నిందితదైత్య‌సమూహం గో

విందం పరమానందం

వ్యక్తావ్యక్యస్వరూపం

ముక్తజనార్చితతత్త్వం

ముక్తివితరణసుశీలం స

ద్భక్తజనావననిపుణం

కళ్ళు రెండు చాలవే

కళ్ళు రెండు చాలవే వేయి

కళ్ళున్నను జాలవే

కాళ్ళకు గజ్జెలు కట్టి
ఆడే కృష్ణుని జూడ
కళ్ళు రెండు చాలవే

వ్రేళ్ళ కుంగ్రాలు మెరయ

క్రేళ్ళుబ్బు హరి జూడ

కళ్ళు రెండు చాలవే

పిల్లనగ్రోవి బట్టి

గొల్ల కన్నెల మధ్య

చల్లని నగవులతో

అల్లన నాడుచున్న

నల్లనయ్యను జూడ

కళ్ళు రెండు చాలవే

బుల్లి నెమలి యీక

కుళ్ళాయి మీద మెరయు

ఫుల్లాంబురుహ నయను

ఉల్లము రంజిల్లగను

కళ్ళార జూతు మన్న

కళ్ళు రెండు చాలవే

మురళి నూదరా కృష్ణా

మురళి నూదరా కృష్ణా

మురళి నూదరా

పరమ మనోహరము నీ

మురళి పాటరా

భువనమోహనము నీ మురళిపాట

శ్రవణసుభగమైన నీ చక్కనిపాట

కువలయాక్షు లందరు కోరెడుపాట

సవరించి నీ మురళిని సాగించు పాట

విన వచ్చె నదే మింటి పైన నా చంద్రుడు

వినగ నెమ్మదించిన యమున నటు చూడు

విన వచ్చి వేచిన గోపికలను చూడు

వినిపించి మురళిపాట వేడుక చూడు

పూపొదలు వేచియున్న  మురళిపాట

యీపొలతుల ప్రాణమైన యింపగుపాట

గోపాలక యమృతమై కురిసెడు పాట

ఓప లేమింక పాడ నుద్యమించరా

నందనందన వందనం

నందనందన వందనం

బృందారకజనవందిత

నీలమేఘశ్యామ కాళియమర్దన

కేళీ సమ్ముదితసురపాళీ గోపాళీ

బాలలీలాహతబహుసురవైరీ

బాలగోపాల యదుబాల సుశీల

లీలాకృతభువనజాల కృపాల

వాల గోపీజనలోల గోవింద

కాలయవనకాల కాలస్వరూప

పాలితాఖిలభక్తజాల సుశీల

గోవుల కాచేవు చిన్నోడా

గోవుల కాచేవు చిన్నోడా నీది యేవూరయ్యా గోపయ్యా

యేవూరంటేను చిన్నమ్మీ మాది మీవూరేనే గోపమ్మా

మావూరైతేను చిన్నోడా మీది యేవీధయ్యా గోపయ్యా

యేవీధంటేను చిన్నమ్మీ మాది మీవీధేనే గోపమ్మా

మావీధైతేను చిన్నోడా మీది మరి యెవరిల్లయ్యా గోపయ్యా

మీవాళ్ళిల్లేను చిన్నమ్మీ మాది నీవెరిగినదే గోపమ్మా

నేనెరుగుదునా చిన్నోడా చెప్పు నీవారెవరో గోపయ్యా

మీనందరాజే చిన్నమ్మీ నిజము మానాన్నగారు గోపమ్మా

మీనాన్నగారే చిన్నోడా అవ్వ మానందరాజు గోపయ్యా

ఔనే అవ్వేమి చిన్నమ్మీ కండ్లకానదొ మాఠీవి గోపమ్మా'

ఆనుచున్నది ఠీవి చిన్నోడా వట్టి అల్లరి చేతల గోపయ్యా

ఆనేది యల్లరి చిన్నమ్మీ కండ్ల కానదు మాలీల గోపమ్మా

లీలలు విన్నాము చిన్నోడా తెలియలేకున్నామో గోపయ్యా

యేలాగు తెలియును చిన్నమ్మీ దాని నెఱుగరు సురలును గోపమ్మా

సురదుర్లభుడవా చిన్నోడా చాల చోద్యమెవ్వడవు గోపయ్యా

మరి యింకెవ్వాడ చిన్నమ్మీ నేను హరినే సత్యము గోపమ్మా

హరిదేవుడవా చిన్నోడా కృష్ణ యంజలించెదను గోపయ్యా

సరిసరి మ్రొక్కిన చిన్నమ్మీ నీవు తరియించినావు గోపమ్మా

నందనందన

వందనములు వందనములు నందనందన న
న్నెందుల కేడ్పింతువయ్య నందనందన

పొందితిరా కష్టములను నందనందన నేను
పొందితిరా వేదనలను నందనందన
పొందితిరా చెడుగెంతో నందనందన నీకు
వందనములు కావు మింక నందనందన

పొందితినా సంపదలను నందనందన నేను
పొందితినా భోగములను నందనందన
పొందితినా గర్వములను నందనందన నీకు
వందనములు కావు మింక నందనందన

ఉందువు శ్రీరాముడవై నందనందన నాదు
డెందంబున నెపుడు నీవు నందనందన
వందనములు రాముడందు నందనందన కృష్ణు
డందు నిన్ను కావు మింక నందనందన

పాహి పాహి

పాహి పాహి కృష్ణ మాం
పాహి కృష్ణ కృష్ణ 

పాహి నందనందన మాం
పాహి భక్తచందన

పాహి గోపవేషక మాం
పాహి దీనపోషక

పాహి గోగణప్రియ మాం
పాహి గోపికాప్రియ

పాహి ధర్మరక్షక మాం
పాహి లోకరక్షక

పాహి దైత్యనాశన మాం
పాహి కంసశాసన

పాహి దురితమోచన మాం
పాహి భవవిమోచన

నల్లనయ్య

గొల్లవాడ లెల్ల తిరిగి నల్లనయ్య చాల
కల్లోలము సృష్టించెను నల్లనయ్య

కొల్లగొట్టి వెన్నలన్ని నల్లనయ్య మా
చల్లకుండ పగులగొట్టె నల్లనయ్య మా
చెల్లె లడ్డగించితే నల్లనయ్య బుగ్గ
గిల్లి పారిపోయె నీ నల్లనయ్య

వెన్నలన్ని మెక్కి పోయి వేణువూద ఆ
పొన్న చెట్టు నెక్కె నీ చిన్ని దొంగ సం
పన్ను లింటి బిడ్డడైన బరితెగించి పాలు
వెన్న లన్ని కొల్లగొట్టు వేడు కేమి

అల్ల రెంత చేయ నేమి నల్లనయ్య మా
కెల్లరకును ముద్దువచ్చు నల్లనయ్య ఒక
పిల్లంగోవి చేత బట్టి నల్లనయ్య భువన
మెల్లను రంజింపజెయు నల్లనయ్య

కసరవచ్చునా

కొంటె కొంటె మాట లిట్లు  గోవిందా నీ
వంటె నేనూరు కో నయ్య జాగ్రత

కుంటిసాకు లెందుకే గొల్లభామా నే
నంటె నీకు ప్రాణమే వయ్యారి భామా నా
కంటబడగ వేచి యున్న కలికీ నేను
కంటబడగ వంక బెట్టి కసరవచ్చునా

గొంటుదనము మానవే గొల్లభామా నా
కంటె నాథు డెవ్వడే వయ్యారిభామా 
ఉంటి నేను తోడుంటే యువిద నీవు
కంటగించుకొని నన్ను కసరవచ్చునా 

కొంటె మాట లేమిటే గొల్లభామా నే
నంటున్నది తప్పా వయ్యారిభామా న
న్నంటుకొన్న కైవల్య మెంటే మోము
గంటునెట్టుకొని నిన్ను కసరవచ్చునా

శ్రీకృష్ణా

సంసారబాధావిదారా కృష్ణా సర్వేశ్వర శ్రీకృష్ణా 

సుమధురసుందరహాసా కృష్ణా శుధ్ధపరబ్రహ్మ కృష్ణా 

కమలాయతేక్షణ కమలామనోహర ఘనపీతాంబర కృష్ణా

గోపగోపికాజీవన కృష్ణా గోకులసుందర కృష్ణా 

పాపతిమిరభాస్కర శ్రీకృష్ణా పరమేశ్వర శ్రీకృష్ణా 

కంసాదిదానవసంహార కృష్ణా కలుషాంతక శ్రీకృష్ణా 

హింసావిదూరా కృష్ణా పరమహంసార్చిత శ్రీకృష్ణా 

పాలితాఖిలజగజ్జాలా కృష్ణా పరమపావనా కృష్ణా 

నీలమేఘసుశ్యామా కృష్ణా నిరుపమసుందర కృష్ణా 

కురుకులవనదావానల కృష్ణా నరసఖ హరి శ్రీకృష్ణా 

నరసింహాచ్యుత నారాయణ హరి కరుణాంతరంగ కృష్ణా 

భక్తవత్సలబిరుదాంకిత కృష్ణా పతితపావనా కృష్ణా 

ముక్తివితరణశుభశీలా కృష్ణా భూభారాంతక కృష్ణా 

మధురభాషల చిన్ని కృష్ణ

మధురభాషల చిన్ని కృష్ణ నీవు

    మథురకు పోవద్దు కృష్ణ

మథురలో పనియుందే భామా నేను

    మథురకు పోవలె భామా

మదురలో కంసుడు కృష్ణా నిన్ను

     మననిచ్చునా వద్దు కృష్ణా

వధియింతు కంసుని భామా నేను

    మథురకు పోవలె భామా

కథలుకథలుగ వింటి కృష్ణా వాడు

     కఠినాత్ముడట చిన్ని కృష్ణా

వ్యథలకు మూలము భామా వాని

      కథ తేల్చ బోవలె భామా

ఆధముడు వానితో కృష్ణా నీవు

       ఆటలాడుట యేల కృష్ణా

విధి శంకరులు సాక్షి భామా వాని

     విరిచివచ్చెద గొల్లభామా

శ్రీకృష్ణ కృష్ణ కృష్ణ

శ్రీకృష్ణ కృష్ణ కృష్ణ శృంగారమూర్తి కృష్ణ

లోకేశ కృష్ణ కృష్ణ శోకాపనయన కృష్ణ 

గోవింద కృష్ణకృష్ణ గోపాల కృష్ణ కృష్ణ

దేవాధిదేవ కృష్ణ దివ్యప్రభావ కృష్ణ

శ్రీవిష్ణుదేవ కృష్ణ శ్రీరుక్మిణీశ కృష్ణ

సేవింతుమయ్య నినుభక్తితోడ శ్రీకృష్ణ కృష్ణ కృష్ణ 

జగదీశ కృష్ణ కృష్ణ సర్వేశ కృష్ణ  కృష్ణ 

నిగమాంతవేద్య కృష్ణ  నిర్మోహ కృష్ణ  కృష్ణ 

ఖగరాజవాహ కృష్ణ కంసారి కృష్ణ కృష్ణ

అగచాట్లుబాపి మమ్మేలవయ్య హరి కృష్ణ  కృష్ణ కృష్ణ 

పరమేశ కృష్ణ కృష్ణ బ్రహ్మాండనాథ కృష్ణ 

గిరిధారి కృష్ణ కృష్ణ కరుణాంతరంగ కృష్ణ 

సురవైరినాశ కృష్ణ గురుమూరి కృష్ణ కృష్ణ 

హరి మాకుతొలగ సంసారబాధ వరమిమ్ము కృష్ణ కృష్ణ 

వీడేమి చేసేనమ్మా

వీడేమి చేసేనమ్మా వీడు

నేడేమి చేసేనమ్మా

నిన్న కడివెడు పాలు వెన్నమీగడలన్ని

తిన్నంతతిని అన్నీ తన్నిపోయేనమ్మ

కన్నులు గప్పివచ్చు వెన్నదొంగను బట్ట

ఎన్ని చేసినగాని యన్నీ వృథయై పోయె

అన్ని యిండ్లను దూరి యన్నిపాలనుత్రాగి

అన్ని దుత్తలలోని వెన్నలు తినుటేమి

నిన్న మాయింటికి రాలేదన్న సుదతి లేదే

ఎన్నడు నిట్టివి వింతలు విన్నదే లేదోయమ్మ

తిన్నగ వాని పండువెన్నెల వంటినవ్వు

కన్నులజూచి మురియుచున్నాము వాని రాక

అన్నులమిన్నలార ఆనందమే గొలుప

ఎన్నకతప్పు లందరమున్నాము కాదటమ్మ

నందబాల

నందబాల ప్రజ్ఞానఘనా
నందరూప మునిజనా
నందకారక కోటిమన్మథ
సుందరాకా‌ర

చేత మురళిని బట్టి నీవు
చిద్విలొసముగను రార
పూతనాసంహారక కృష్ణ
పురుషసింహమ మా
చేతులార నీకు పూజలు
చేయవలచి వేచినాము
నీతి కాదుర దాగియుండుట
నిన్ను వేడెదము

బేలలము మేము గోప
బాలికలమురా యశోదా
బాలక నిన్నిపుడు వెదుకగ
జాలకున్నాముర కరు
ణాలవాల జాలమేల
నీలగగనశ్యామ రార
కాలిగజ్జెలందెలు మ్రోయ
బాలగోపాల

వద్దనరాదురా బాలగోపాల

వద్దనరాదురా బాలగోపాల ముద్దు

ముద్దుగ నే చిన్నిముద్దు లిచ్చుచు నుండ

సుద్దులెన్ని చెప్పిన సుంత వినని వేళ

గద్దించితే నీవు కాటుకన్నులు

రుద్దుచు నిలువ విలోకించి యక్షుల

నద్దగ వచ్చితే అటునిటు తిరుగుచు 

ఆటలాడిన నీవు అలసివచ్చిన వేళ

పాటపాడుచు నేను బంగరుకొండ

మీటుగాగను నీకు మెఱుగుముద్దల వెన్న

పాటించి తినిపించ వచ్చినవేళ

చద్దిమూటను నీవు చంకను బెట్టుక 

బుద్దిగజన సురభుల వెంట ప్రేమతో

వద్దకు పిలచి నాబాహుపంజరమున

ముద్ధుగ బంధించ భువనమోహన రూప

చేరి కొలువవమ్మ నీవు చిత్తమలరగ

చేరి కొలువవమ్మ నీవు చిత్తమలరగ

ధారాధరశ్యాము డిదే దయచేసెను

నల్లపిల్లివలెను తా నిల్లిల్లు తిరుగునని

ఎల్లిదముగ పలికి నీ విల్లు వెడలించ

చల్లనైన మనసున్న స్వామి కనుక నేడు

మెల్లగాను నీ గడపను మెట్టినాడమ్మా

కల్లలాడుచున్నా డని కసరికొట్టి నీవు

నల్లనయ్య మనసునొవ్వ పెల్లునదిట్టి

ఎల్లి రాకు మీ వనుచు నెంతమాటన్నను

పల్లవోష్ఠ వా డిదిగో వచ్చినాడమ్మా

అటు కటువులాడి పంపి యిటు కనుల నీరిడి

కటకట పడుచుంటి వీవు కమలలోచన

యిటులౌదు వని యెఱిగి యెంతో దయ చూపి

కుటిలాలక వచ్చెను నీ గోవిందుడమ్మా

కోటలు వేడను పేటలు వేడను

కోటలు వేడను పేటలు వేడను

మాటే కద యిమ్మంటినిరా

తనివితీరగను నిను సేవించిన 

తనువును మనసును మనుజులకిచ్చి

మనజాలను గావున నీపదముల

నను వ్రాలగ నిమ్మని యడిగితిని

వరాలమూటలు పంచే వాడా

మరేల నాకొక మాటీయవురా

హరి నే వేడితి  ధరపై పుట్టువు

మరింక లేదను మాటేకదా

నరుల కష్టముల నెఱిగిన వాడా

నరుడై వెలసిన నారాయణుడా

కరుణామయుడా కాదనకీరా

హరి శ్రీకృష్ణా యడిగిన మాట 

నీలిమేఘ మొకటి నిలువునామముబెట్టి

 

నీలిమేఘ మొకటి నిలువునామముబెట్టి 

నేలకు దిగివచ్చె నెమలిఫించము గట్టి

వాలెనె నాముందు బాలా నిన్నటి రాత్రి

ఏలాగు వివరింప జాలుదునే యపుడు

చాలసేపటి వరకు కాలమే తెలియని

మేలైన స్థితి కలిగె నీలాలక వినుము

దానాలు ధర్మాలు దండిగ జేసిన

వేనవేలేండ్లుగ మౌనియై యుండిన

తాను రాడట మనసు తనకంకితము జేసి

ధ్యానించినందుకే యవతరించేనట

తనువునాదను భ్రాంతి మనసున లేదాయె

మనసు నాదను భ్రాంతి మటుమాయమైపోయె

విను మేను వాడగుచు విహరించినది నిజము

తనదాయె నాయాత్మ ధన్యనైతిని చెలియ

బదులీయ వేమిరా మదనగోపాల

బదులీయ వేమిరా మదనగోపాల

వదనారవిందము వాడిన దేమంటే

త్వరపడుచును నాకై తహతహతో నీవు

బిరబిర తనమందిరమును వీడగ

చురచుర చూపుల సుదతి యెవ్వతె గాని

మరియాద మీఱి పలుమాటలు పలికెనా

పరమభక్తులు నీకు పాండవు లవ్వారి

సిరుల కసూయనే చెంది కౌరవులు

దొరకొనిరా యేమి దుండగముల కిపుడు

మరి యది కాదేని మాటాడవేరా

చనవున నే కొంటెతనమున నేమైన

మనసునొవ్వగ బలికితిని కాదు కద

మనసిజమోహన మధుసూదనా యీ

దినమున నీమోము తీరిటులున్న దేమి