నల్లనయ్య

గొల్లవాడ లెల్ల తిరిగి నల్లనయ్య చాల
కల్లోలము సృష్టించెను నల్లనయ్య

కొల్లగొట్టి వెన్నలన్ని నల్లనయ్య మా
చల్లకుండ పగులగొట్టె నల్లనయ్య మా
చెల్లె లడ్డగించితే నల్లనయ్య బుగ్గ
గిల్లి పారిపోయె నీ నల్లనయ్య

వెన్నలన్ని మెక్కి పోయి వేణువూద ఆ
పొన్న చెట్టు నెక్కె నీ చిన్ని దొంగ సం
పన్ను లింటి బిడ్డడైన బరితెగించి పాలు
వెన్న లన్ని కొల్లగొట్టు వేడు కేమి

అల్ల రెంత చేయ నేమి నల్లనయ్య మా
కెల్లరకును ముద్దువచ్చు నల్లనయ్య ఒక
పిల్లంగోవి చేత బట్టి నల్లనయ్య భువన
మెల్లను రంజింపజెయు నల్లనయ్య