రామచంద్ర నన్ను నీవు రక్షించక తప్పదయ్య

రామచంద్ర నన్ను నీవు రక్షించక తప్పదయ్య

నామనసున నిన్ను నిలిపి నడచుచుంటి గాన

 

మన్నింపుము చేయి నొచ్చు మాటలొండు రెండు వ్రాయ

నిన్ను పొగడుకొనుట కైన నన్ను కూరుచుండ నీదు

నిన్నొక రొకమాట యన్న నన్ను బదులు వ్రాయనీదు

అన్నన్నా యింత చెడ్ద దాయె జూడ కాల మిపుడు

 

నడచుచున్న కాల మరయ నాకు చేటు చేయుచుండె

ఎడబాయెగ జేసె సతిని యిల్లువదలి తిరుగజేసె

పడద్రోసెను రెండు మార్లు  పగబట్టిన యటుల తుదకు

నడువలేని స్థితికి దెచ్చె నారాయణ చూడవయ్య

 

తాపములను తొలగించెడు దాశరథీ శరణు శరణు 

పాపములను తొలగించెడు పరంధామ శరణు శరణు

ఈపాట్లిక చాలు చాలు నీశ్వర బహుకృపామయా 

కోపగించుకొనక నీవు కొంచెము దయజూప వలయు