నీయందు మాబుధ్ధి

కాంభోజి

నీయందు మాబుధ్ధి నిలచి యుండు నటుల

జేయుమా సర్వేశ శ్రీరామచంద్ర

మాయచే కాయముల మతిమాలి ప్రేమించి

నీయందు బుధ్ధినే నిలుపగ లేము

మాయదారి మాయ నీయునికినే గప్పి

వేయగా నిన్నెరుగు విధమేది దేవుడా

మాయలోనే పుట్టి మాయలోనే పెరిగి

మాయలోనే చచ్చు‌ మాబోంట్లకు

మాయ యొక టున్న దను మాట తెలియుట యెట్లు

తోయంబులకు వెలి తోచునా చేపలకు

ధ్యేయుండ వగు నిన్ను తెలియనీయదు మాయ

మాయింద్రియము లందు మసలుట చేత

నీయాన గొని యాడు నీమాయ తొలగితే

ఓయయ్య నిను విడచి యుండునా మాబుధ్ధి