ఏమందును

ఏమందు నయ్యా నే నేమందును

రామా జగదీశ్వర నే నేమందును

నీనామము వల్లించుచు నిష్ఠగ నేనుంటిని

నానిష్ఠను గమనించని వాని వలె నుంటివి

చిత్తంబున నిన్నెప్పుడు చింతించుచు నుంటిని

బొత్తిగ నది యెరుగనట్లు మోముపెట్టి యుంటివి

నిద్దురలో కూడ నేను నిన్ను పిలుచుచుంటిని

నిద్దురలో నున్నరీతి నీవు పలుకకుంటివి

మానసమున నీపూజలు మానక నేనుంటిని

దేనికయా నాభక్తిని తెలియని యటు లుంటివి

నీకీర్తిని చాటించుచు నేను తిరుగుచుంటిని

నాకష్టము పట్టనట్లు నన్ను చూడ కుంటివి

నీదయనే కోరుకొనుచు నేను వేచియుంటిని

నాదయ అతి దుర్లభమని నవ్వుచు నీవుంటివి