లోకమేల లోకులతో నీకు పనియేల

లోకమేల లోకులతో నీకు పనియేల

శ్రీకరుడగు రాముడు నీచెంతనున్న వేళ

తెలియనగు ప్రపంచమెల్ల తెలియు నింద్రియంబుల

కలవంటిది నిజము కాదు కనుక స్థిరబుధ్ధియై

కలరూపు గ్రహించనెంచి కమలాక్షు మదినెంచి

పిలువ పిలువ వచ్చి వాడు పలుకరించు వేళను

మాయామయజగము నందు మసలుట నిక మాని

ధ్యేయమైన నాత్మతత్త్వమే యెంచిన వాడవు

మాయకవల నుండు నారాయణుడే నేడు

హాయిగాను నీవాడై యలరించెడి వేళను

భవచక్రము నందు జచ్చి పడిన బాధలు చాలు

సవినముగ భవము లింక చాలునని వేడుచు

భవముదాట హరిమార్గము పట్టినట్టి నీకు

అవిరళముగ దారి జూప హరి తోచిన వేళను

హరినామ మింతదని యననేర్తుమా

హరినామ మింతదని యననేర్తుమా

మహదైశ్వర్యమై మనకబ్బెనే గాక

అతిమధుర మైన దీహరినామము

అతిసులభ మైన దీహరినామము

ప్రతి మనిషి గుండెలో ప్రతిక్షణము మార్మోగ

వ్రతముకా దగినదీ హరినామము

అతిసుఖద మైన దీహరినామము

అతిమహిమ నొప్పు నీహరినామము

అతిశయంబుగ జీవు లందరకు నానంద

మతివేలముగ నిచ్చు హరినామము

శ్రీహరేరామ యన చెలగే నిది

శ్రీహరేకృష్ణ యన చెలగే నిది

ఊహింప భవదుఃఖ మాహరింపగ జాలు

నాహా శివార్చిత హరినామము

ఇటులేల చేసితివో యినకులేశ్వరా

ఇటులేల చేసితివో యినకులేశ్వరా

కటకటా ఈదేహి కష్టమే కష్టము

ఘోరభవబంధముల గూర్చి యోచించగ

వైరాగ్యదివ్యసంపదనైన తగినంత

శ్రీరామ నాకీయ చింతించ వైతివే

ఔరౌర యీదేహి కొక దారి యున్నదా

నేరుపున నీసేవ నిరతంబు సేయగా

కోరు చిత్తమును నోచు కొనిన దేహంబును

శ్రీరామ నాకీయ చింతించ వైతివే

నీరేజదళనేత్ర నిన్నే మనగ వచ్చు

నోరార నీపాట నూరూర పాడగల

తీరైన చక్కని తీయన్ని జిహ్వైన

శ్రీరామ నాకీయ చింతించ వైతివే

కారణం బేదైన కష్టమే యిదినాకు

నేనుండేదా యిటుల నేనుండేదా

నేనుండేదా యిటుల నేనుండేదా రామ

నేనుండేదా హాయిగా నుండేదా

నీయందే శ్రధ్ధ నిలిపి నీయందే బుధ్ధి నిలిపి

నీయందే తెలివి నిలిపి నేనుండేదా

నీయందే శాస్త్ర మరసి నీయందే సత్య మరసి

నీయందే  జ్ఞాన మరసి నేనుండేదా

నీయందే మనసు కలిగి నీయందే ఆశ కలిగి

నీయందే ప్రేమ కలిగి నేనుండేదా

నీయందే విశ్వ మెరిగి నీయందే సర్వ మెరిగి

నీయందే నన్నెరింగి నేనుండేదా

నీయందే రక్తి నొంది నీయందే భక్తి నొంది

నీయందే శక్తి నొంది నేనుండేదా

నీయందే యునికి నరసి నీయందే మనికి నరసి

నీయం దానంద మరసి నేనుండేదా

హరేరామ హరేకృష్ణ హరేవాసుదేవ

హరేరామ హరేకృష్ణ హరేవాసుదేవ శ్రీ

హరే పరమానంద అంబుజనాభ

హరే దశరథాత్మజ హరచాపఖండన

హరే నందకుమారక గిరిధర గోవింద

హరే సురవైరిగర్వహరణవిజయశీల

పరాకేల ననుబ్రోవ పతితపావన

హరే రామచంద్ర మునియాగ సంరక్షక

హరే కృష్ణచంద్ర సర్వాత్మక గోవింద

హరే వసుంధరాభారహరణశుభదశీల

పరాకేల ననుబ్రోవ పతితపావన

హరే భక్తజనావన హరే ధర్మరక్షక

హరే పాపవిషవపదావానల గోవింద

హరే సదామునిమోక్షవితరణకృపాశీల

పరాకేల ననుబ్రోవ పతితపావన

పాడండీ హరిని గూర్చి ఆడండీ హరికొరకే

పాడండీ హరిని గూర్చి ఆడండీ హరికొరకే

వేడండీ హరి నొకనే వేడుకతో మీరు

పాడదగిన వా డింకొక భగవంతు డనగ లేడు

వేడదగిన వా డింకొక విభుడెవ్వండును లేడు

ఆడించే ఆటగాడు హరికన్యుం డన లేడు

వేడుకగా హరియే మీవాడై యున్నాడు

వాడు మిమ్ము సత్కృపతో పాలించుచు నున్నాడు

వాడు మీకు సమస్తమును ప్రసాదించు చున్నాడు

వాడు మీకు సమీపమున వర్తించుచు నున్నాడు

వాడు మీకు మోక్షమిచ్చు వాడై యున్నాడు

హరేరామ యనుచును మీ రాడండీ పాడండీ

హరేకృష్ణ యని వేడ్కగ నాడండీ పాడండీ

మరొక్కరిని తలపోయగ మనకేల చెప్పండీ

హరికై మీరాడి పాడి యానందము పొందండీ

సతులారా శోభన పాడరమ్మ??

ఈరోజున ఒకటపా కంటబడింది.
చూడరమ్మ సతులారా శోభన పాడరమ్మ

దయచేసి సంప్రదాయసాహిత్యాన్ని గురించిన రచనలు చేసేవారు కొంచెం జాగరూకులై ఉండండి. 

అప్పటి సాహిత్యకారుల రచనలను తెలిసో తెలియకో దిద్ది ప్రకటించే ముందు తమకు ఆపని చేసేందుకు తగిన అధికారమూ సాధసంపత్తీ ఉన్నాయా అన్నది బాగా వివేచన చేసుకొని కాని ఆమహానుభావుల వ్రాతలలో తప్పులు దిద్దే సాహసం చేయకండి. 

అన్నమయ్య సాహిత్యాన్ని గురించి, అది ఒక ఆరువందల యేండ్ల క్రిందటి భాషాస్వరూపంగా, కవిత్వధోరణిగా ముందు అవగాహనలో ఉంచుకోండి.  వాటి గురించి తగినంత సాధికారికంగా తెలియనిదే ఆయననే తప్పులు దిద్దే పని చేయకండి.

"అదివో అల్లదివో హరివాసము" అన్న దానిని  "అదిగో అల్లదిగో శ్రీహరివాసము" అని మార్ఛి పాడే అతితెలివి ప్రచారంలో ఉంది! ఎవరీ పని చేసారో తెలియదు. అన్నమయ్య అదిగో బదులు పొరపాటున అదివో అనలేదండీ. అక్కడ శ్రీ అని చేర్చి యతిభంగం చేసారే అసలు ఆయన యతిప్రాసలను నియమంగా పాటిస్తారని తెలుసుకోలేకపోయారు కదా! తప్పుడుపాఠం ప్రచారం కావటం దురదృష్టం. ఎవరిదో దురహంకారం ఫలితం.

ఈకీర్తనలో ఈటపాలో సతులాల అన్నమాటను సతులారా అనిదిద్దారు. సోబాన అన్న దానిని శోభన అని దిద్దారు!

"సతులారా", "శోభన పాడరమ్మ" అని కాదండీ "సతులాల", "సోబాన పాడరమ్మ" అనే సాహిత్యం. తితిదే వారి ప్రచురణను పరిశీలించండి.

ఓపికలేదా? ఈప్రయత్నాలు మానుకోండి. తెలిసీతెలియని విధంగా వ్రాసి పెద్దల సాహిత్యాన్ని అవమానించకండి, దాన్ని భ్రష్టు పట్టించకండి. 

పైగా "కలశాబ్ది" పదాన్ని "కళాశాబ్ధి" అని మార్చటం ఘోరాతిఘోరవిషయం! ఏమివ్రాస్తున్నారో ఆవ్రాసేవారికి అవగాహన లేదే! దారుణం.

అక్కడ ఆటపాను ఇంక చదువలేదు. చదువలేను కూడా! ఇంకేమి తప్పులున్నాయో!

ఈమాటలు కొన్నింటిని టపాకు ఒక కామెంటుగా పంపాను. ఐనా అందరికీ అందుబాటుగా ఉండాలని ఒక టపా రూపంలోనూ బ్లాగులో ఉంచుతున్నాను.

జనకజామనోభిరామ సాకేతరామ

జనకజామనోభిరామ సాకేతరామ

వినుము నేను నీకు చేయు విన్నప మొకటి

నా కడింది పుణ్యమునకు నీకు బంటు నైతిరా

నీకు గాక వేరెవరికి నేను విన్న వింతురా

లోకవృత్తములను గూర్చి నాకు చింత లేదురా

శ్రీకర యీజీవికి నీ సేవచాలు వినవయా

నీ వభయము నిచ్చెదవని నిన్ను చేరితిని కదా

నీ వాడను భక్తుడనని నిత్య మందునే కదా

నీవు తీర్చలేని కోర్కె నేను కోరనే కదా

భావజారివినుత రామ బాగుగ వినవయ్యా

నాకు కలుగు ముందటిగతి నీకెరుకే లేవయా

నాకరమును విడవనుచు నాకు వరము నీవయా

నాకమైన నరకమైన నాకు భయము కాదయా

నాకదియే చాలునయా నామొర వినవయ్యా

నిజమేమో గోపబాల నీకే యెరుక

నిజమేమో గోపబాల నీకే యెరుక యింక

ఋజువులేల మధురకేగు విజయశీల

ఎపుడు తిరిగి వచ్చెదవో యెవ్వరి కెరుక నీ

కృప యెన్నడు కలుగునో కృష్ణ ముకుంద

అపకారిని కంసరాజు నణచి ప్రజలకు నా

యుపకారము చేసి వచ్చుటున్నదా నిజముగా

తలిదండ్రుల చెరబాపగ తరలుట తగును నె

చ్చెలు లెదురు చూచెదరని తలచుట తగును

కొలువ నృపులు మధురలోన  నిలుచుట తగును నీ

తలపు మాకు గోపబాల తెలియకున్న నిజముగా

క్షేమముగా తిరిగిరమ్ము కృష్ణా యనుచు హరి

మేమెల్లరమును నిన్ను మిగుల దీవించి

ఆమధురకు పంపుచుంటి మది మరిచెదవో మా

ప్రేమలనే తలచి మరల విచ్చేతువొ నిజముగా

హరినామ మేదైన నది మంత్రమే

హరినామ మేదైన నది మంత్రమే

హరిమంత్ర మేదైన నారాధ్యమే

హరినామమును బలుకు టది పూజయే

హరికథలను చదువు టది పూజయే

హరిభక్తులను జేరు టది పూజయే

హరి శరణజొచ్చుట యది పూజయే

హరిపూజ నొనరించ నది యజనమే

హరిభజన చేసిన నది యజనమే

హరికీర్తనము జేయ నది యజనమే

హరిప్రీతిగా జేయు నది యజనమే

నరునకు హరిభక్తి యరుదైనదే

మరియును కలియందు మానక హరినామ

స్మరణ మబ్బిన చాలు మరి ముక్తియే

అరిది హరేరామ యన ముక్తియే

నరుని జేరితే బంధము హరిని జేరితే మోక్షము

నరుని జేరితే బంధము

  హరిని జేరితే మోక్షము

అరయ నిజంబిది స్పష్టము

  మరి నీ కిందే దిష్టము

కాలము కలిగించును బంధంబులు

 ఘనముగ నీ విల కలిగిన నాడే

కాలము కరిగించును బంధబులు

  చాలని దేహము విడచిన నాడే

కాలము కల్పించెడు బంధంబులు

   కాయముతోనే కలుగును తొలగును

చాలు నరులతో చచ్చుబంధములు

   సంపాదించుము హరితో బంధము 

సతులు బంధములు సుతులు బంధములు

  అతిశయముగ చుట్టములు బంధములు

అతిప్రేముడిగల హితులు బంధములు

  అతిగ మెచ్చు స్నేహితులు బంధములు

క్షితిని కొందరు మోహబంధములు

   ప్రతిగ కొందరు ద్వేషబంధములు

మతిమంతులు బంధము లివి వలదని

 మదిని కోరుదురు హరితో బంధము 

నరులకు నరులకు మధ్య బంధములు

  నమ్మగ రానివి మాయబంధములు

హరే రామ యన హరితో బంధము

  సరగున కలుగును తొలగని బంధము

హరే కృష్ణ యన హరితో బంధము

  సరగున కలుగును తొలగని బంధము

మరియొక విధమున హరితో బంధము

  నరునకు కలుగదు నమ్మకమైనది

శ్రీరామ శ్రీరామ శ్రీరామ యనువాడు

శ్రీరామ శ్రీరామ శ్రీరామ యనువాడు 

  చెడిపోడు చెడిపోడు చెడిపోడు

శ్రీరామ యనిగూడ చెడిపోతి ననువాడు

  సృష్టిలో నిందాకనే లేడు

శ్రీరామ శ్రీరామ యనుచున్న నాసాధ్వి

   శ్రీరాముని గాంచి సిధ్ధిపొందె

శ్రీరామ శ్రీరామ శ్రీరామ యని పక్షి

  చెందెనే మోక్షమును సూటిగాను

శ్రీరామ నామమును చెవుల వినిన పక్షి

  చెందెనే స్వస్థతను తక్షణమ్ము

శ్రీరామ చింతనమె శ్రీరామ దర్శనమె

  శ్రీరామ శ్రవణమె చాలు కనుక

శ్రీరామ శరణమని వేడిన వాయసము

  చెందెనే శీఘ్రముగ ప్రాణభిక్ష

శ్రీరామ శరణమని వేడిన కపిరాజు

  చెందెనే రాజ్యమును శీఘ్రముగను

శ్రీరామ శరణమని చేరి రావణభ్రాత

  చెందె నభయము రాజ్యసిధ్ధి గూడ

శ్రీరాముని శరణుజొచ్చు వా రందరకు

  సిరు లభయములను కీర్తి తిరము కనుక

శ్రీరామ శ్రీరామ శ్రీరామ యని భజన

  చేయుటకు మించినది సుఖము లేదు

శ్రీరామ శ్రీరామ శ్రీరామ యని సతము

  చింతించు జీవి కిక చింత లేదు

శ్రీరామ శ్రీరామ శ్రీరామ యను వాని

  చెందకుండెడు నట్టి సిధ్ధి లేదు

శ్రీరామ శ్రీరామ శ్రీరామ యని పల్కు

  జీవికిక గర్భనరకంబు లేదు

నందాత్మజ మప్రమేయం

నందాత్మజ మప్రమేయం

వందామహే సతతం

గోపీమానసచోరం

శ్రీపతి మతిశయవీరం

గోపాలం నతదిక్పాలం

తాపసజనమందారం

సుందరగోపకుమారం

బృందావనసంచారం

నిందితదైత్య‌సమూహం గో

విందం పరమానందం

వ్యక్తావ్యక్యస్వరూపం

ముక్తజనార్చితతత్త్వం

ముక్తివితరణసుశీలం స

ద్భక్తజనావననిపుణం

హరికృపయే మన కానందము

హరికృపయే మన కానందము శ్రీ

  హరికృపయే మన కాధారము

హరికృపయే మన కైశ్వర్యము శ్రీ

  హరికృపయే మన కతిముఖ్యము

హరికృప కలిగిన నఖలైశ్వర్యము

  లాతని ముంగిట నిలుచునుగా

హరికృప కలిగిన నది యిది కావలె

  నను కోరికలే కలుగవుగా

హరికృప కలిగిన నవనీశులకును

  నాతడు సంపూజ్యుండగుగా

హరికృప కలిగన నఖిలజగంబుల

  నతడికి యెదురే కలుగదుగా

హరేరామ యని నిరతము పలికే

  నరులకు హరికృప కలుగునుగా

హరేకృష్ణ యని మురియుచు పలికే

  నరులకు హరికృప నిత్యముగా

హరికృప కన్నను నఖిలవిశ్వమున

  అడుగదగినదే కలుగదుగా

హరికృప కలిగిన నాతడు క్రమ్మర

  నవనిని గలుగుట కలుగదుగా

పరమేశ్వరుడే నాగురువు

గురువంటే నాగురువే గురువు

పరమేశ్వరుడే నాగురువు

గురువులకే తొలిగురువై వెలసిన

పరమేశ్వరుడే నాగురువు

హరినామము నాచెవిలో చెప్పిన

పరమేశ్వరుడే నాగురువు

పరమపదమునకు దారిని చూపిన

పరమేశ్వరుడే నాగురువు

హరిజపమును నాకలవడ జేసిన

పరమేశ్వరుడే నాగురువు

హరికథలను గిరిసుతతో బలికిన

పరమేశ్వరుడే నాగురువు

హరిభక్తుల నాదరముగ జూచే 

పరమేశ్వరుడే నాగురువు

హరేరామయని యనిశము పలికే

పరమేశ్వరుడే నాగురువు

హరిభక్తులలో నగ్రగణ్యుడగు

పరమేశ్వరుడే నాగురువు

నీవాడ నీవాడ రామయ్యా

నీవాడ నీవాడ రామయ్యా

నావాడవై యుండు రామయ్యా

నీవాడనే కాని రామయ్యా 

  నేనెవరి వాడను రామయ్యా

నీవిచ్చునది కాక రామయ్యా

  నేనేమి కోరెదను రామయ్యా

నీమాట వినకుండ రామయ్యా 

  నేనెందు బోదునో రామయ్యా

నీమంత్రమే కాక రామయ్యా

  నేనేమి జపియింతు రామయ్యా

నీపాటలే గాక రామయ్యా 

  నేనేమి పాడుదును రామయ్యా

నీపలుకులే గాక రామయ్యా

  నేనేమి గణియింతు రామయ్యా

నీయనుమతిని గాక రామయ్యా

  నేనేమి చేయుదును రామయ్యా

నీయానచే గాక రామయ్యా

  నేనేల ధరనుందు రామయ్యా

నీభక్తులే గాక రామయ్యా

  నేలపై హితులెవరు రామయ్యా

నీభూరికృప గాక రామయ్యా

  నేనేమి వలచెదను రామయ్యా

నరులార మీరెరుగ నాల్గు మాటలు

నరులార మీరెరుగ నాల్గు మాటలు చెప్ప

  హరియానతిని గొని పలుకుచుంటి

హరిరాజ్యమున నుండు హరిభటుడను నేను

  హరియాన తలదాల్చి ధర జేరితి

హరి మెచ్చుకొను నటుల ధరపైన నేనిపుడు

  హరికార్యనిర్వహణ మం దుంటిని

హరినామమును నేను ధరియించి జిహ్వపై

  హరిమహిమ చాటుచును తిరుగుచుంటి

హరికీర్తనలు నేను మరువక జేయుచును

  హరిభక్తులకు పంచిపెట్టుచుంటి

నరులకు హరిపట్ట తిరమైన సద్భక్తి

  నాటించుటకు కృషి చేయుచుంటి

నరునకు హరేరామ యను మంత్రజపనిష్ఠ

  అందించు ఫలము వివరించుచుంటి

నరునకు హరేకృష్ణ యను మంత్రజపనిష్ఠ

  అందించు ఫలము వివరించుచుంటి

హరిసేవలో మీరు తరియించ దలచుచో

  హరిమెచ్చునని మీకు చెప్పుచుంటి

హరిభక్తివిరహితులగు వార లెన్నటికి

  తరియించలే రనుచు తెలుపుచుంటి

హరిభక్తిపరిపూర్ణులగు వారు చెడిపోవు

  టనుమాట లేదనుచు నుడువుచుంటి

హరి నాదు సేవలకు నానందపడుచుండు

  నని నమ్మి హరికొరకు బ్రతుకుచుంటి

హరినామజపపరాయణులార హరి మీకు

  పరమపద మిచ్చునని పలుకుచుంటి

  

హరహర యటువంటి మాట యసలుండునా

హరహర యటువంటి మాట యసలుండునా

హరిభక్తుడ వింక లోపమన్న దుండునా

హరినామము నాశ్రయించి నది నిజమైతే

మరి రసనకు నన్యులనామములు చేరునా

హరిపాదము లాశ్రయించి నది నిజమైతే

మరి వేరొక్కనికి మ్రొక్క మనసు వచ్చునా

హరిభక్తుల నాశ్రయించు నది నిజమైతే

మరి పామరజనుల చేరు మాట యుండునా

హరిపూజల నాచరించు నది నిజమైతే

హరికన్యుల పూజించుట యన్న దుండునా

అరయ రామభక్తుడ వను నది నిజమైతే

పరమశివుడు నాగురువని పలుకకుందువా

హరిజపమున నీవు పండినది నిజమైతే

తరియించక మరల నీవు ధరకు వత్తువా

బాధ తమకేలా

బాధ యేదైనను తమకేలా హరి

భక్తు లైనా రది చాలు కదా

బాధ విద్యల కొరకు తమకేలా హరి

  భక్తి మీకబ్బిన చాలు కదా

బాధ సత్కీర్తికై తమకేలా భగ

  వంతుడు మెచ్చిన చాలు కదా

బాధ కాసుల కొరకు తమకేలా హరి

  వలసిన విచ్చిన చాలు కదా

బాధ ఆయువు కొరకు తమకేలా కర్మ

  బంధము విచ్చిన చాలు కదా

బాధ తపములు చేయ తమకేలా భగ

  వంతుని స్మరణయె చాలు కదా

బాధ ఖలులను దిట్ట తమకేలా సమ

  వర్తికి విడచుట చాలు కదా

బాధ మోక్షమెపుడని తమకేలా హరి

  భక్తియే జీవన్ముక్తి కదా

బాధ గురువుల జోలి తమకేలా రామ

  భద్రుడు గురువుగ చాలు కదా

శ్రీరమారమణ హరి నారాయణా

శ్రీరమారమణ హరి నారాయణా

శ్రీరామ సీతారామ నారాయణా

క్షీరవారాన్నిధిశయన నారాయణా

నారదాదిమునిసన్నుత నారాయణా

ఘోరాసురకులవిదార నారాయణా

భూరికృపాపరాయణా నారాయణా

వారిజాతదళేక్షణ నారాయణా

వారిరాశిబంధనచణ నారాయణా

ఘోరపాపశమననామ నారాయణా

క్రూరదశకంఠహరణ నారాయణా

ధారాధరనీలవపూష నారాయణా

ధీర దీనజనోధ్ధరణ నారాయణా

పూరితనిజభక్తకామ నారాయణా

ఘోరజన్మచక్రాంతక నారాయణా

ఏమి చేయుచున్నారో యింతులారా

 
ఏమి చేయుచున్నారో యింతులారా బాల

  రాముని గన రాజుగారు రానున్నారే

బంగారపు తొట్టెలలో పరిమళోదకములు నింపి

  అభ్యంగన మాచరించు డబ్బాయి కిపుడు

అంగరాగంబుల నపురూపబాలునకు

   శృంగారముసేయరే శ్రీరామునకు

బంగారుపతకాలు బహుముత్యముల పేర్లు

   రంగుమణిహారా లలంకరించరే

బంగారు చిరుగద్దె బాలరాముని జేర్చి

   భామినీమణులిపుడు దృష్టితీయరే

బంగారువన్నె మంచి కంచిపట్టుపంచెను
  బాలరామునకు కట్టబెట్టరె చెలులు
ముంగురులను ద్రువ్వి మంచి బంగారు కిరీటము 
    బంగారుతండ్రి కిపుడు పెట్టరె చెలులు
బంగారపు గిన్నెలలో అందాలరామునకు 
    అందించరే పాయసాన్నము లిపుడు
సింగారముచేసి మన చిన్నిరామయ్య నిక
    చేర్చరే తల్లికడకు చేడియ లార

  

బహుకోటిశ్రీరామభక్తవర్యులు

బహుకోటిశ్రీరామభక్తవర్యులు

విహరించు భరతభూమి వేదభూమి

బహుదేవతావిహార పావనభూమి

బహుధాన్యపుష్పఫలభరితభూమి

ఈభూమిపై బుట్టి యెంతయు గర్వంబుగా

  యినకులేశ్వరు గొల్చు నత డెట్టివాడో

ఈభూమిపై బుట్ట యెన్నెన్నో జన్మలుగా

  యెంతో తపియించువా డత డెట్టివాడో

ఈభూమిపై నున్న సద్భక్త వరులారా

  మీభావమేమో మాకు తెలుపుడీ

ఈభూమిపై బుట్టి యీశ్వరుడగు రామునే

  యెవ్వాడు పూజించ డత డెట్టివాడో

ఈభూమిపై నిలచి యీశ్వరు డన నెవడని

  యేమేమో పలుకువా డత డెట్టి వాడో

ఈభూమిపై నున్న సద్భక్త వరులారా

  మీభావమేమో మాకు తెలుపుడీ

ఈభూమిపై నేడు కల్లదైవాల గోల

   యెంతయు చెలరేగు టదియేమి కర్మమో

ఈభూమిపై శివుడు ధ్యానించు రామునే

  యీసడించు వారుపుట్టు టేమి కర్మమో

ఈభూమిపై నున్న సద్భక్త వరులారా

  మీభావమేమో మాకు తెలుపుడీ

హరిని ప్రేమించుటయే యసలైన పూజ

హరిని ప్రేమించుటయే 

  యసలైన పూజ

హరిని సేవించుటయే 

  యసలైన పూజ

హరినామము నుడువుటయే

  యమర రసన చేయు పూజ

హరి కీర్తన లాలకించు

  టరయ చెవులు చేయు పూజ

హరిదర్శన పరవశమే

  యక్షు లాచరించు పూజ

హరికి సదా మ్రొక్కుటయే

  కరము లాచరించు పూజ

హరిక్షేత్రములకు జనుటే

  చరణంబులు చేయు పూజ

హరిని తలచి మురియుటయే

  అంతఃకరణంపు పూజ

హరితత్త్వము ధ్యానించుటె

  నరుని మనసు చేయు పూజ

హరిమయమై యుండుటయే

  ఆత్మార్పణ మైన పూజ

హరేరామ హరేకృష్ణ

  యనుటయె వాగ్రూప పూజ

హరిభక్తుల గూడుటయే

  నరునినడత చేయు పూజ

హరిసన్నిధి విడువ కునికి

   అమితమధురమైన పూజ

హరిని చేర తహతహయే

  యరయ జీవాత్మ పూజ

వినివిని లోకవృత్తములు

వినివిని లోకవృత్తములు నా

మనసిది వికలమై పోయినది

అనియని చాల ననృతములు నా

మనసిది పాపమయమే యైనది

చెడిన మనసిది శివశివ యనునా

పడిపడి శ్రీహరిభజన చేయునా

కడు భక్తిని దుర్గమ్మను కనునా

అడుగడుగున మాయను బడు గాక

హరేరామ యనమన్నా వంటే

హరేకృష్ఢ యనమన్నా వంటే

చిరాకుపడునే పరాకుపడునే

బిరాన నెటకో వెడలిపోవునే

హరి తలచిన నిది యణకువ నేర్చును

హరేరామ యన హాయిగ నేర్చును

హరికృప నెరుగక నడలెడు మనసిది

మరిమరి చింతల మయమై యుండును

శ్రీరామచంద్రునకు హారతులీరే

శ్రీరామచంద్రునకు హారతులీరే

శ్రీరామమనోహరికిని హారతులీరే

మారకోటిసుందరునకు హారతులీరే శృం

గారమూర్తి రామునకు హారతులీరే

భూరికృపామూర్తి హరికి హారతులీరే ఘన

వారాన్నిధిబంధనునకు హారతులీరే

సారసాక్షి సీతమ్మకు హారతులీరే బం

గారు తల్లి సీతమ్మకు హారతులీరే

వారిజాక్షు నంగనకు హారతులీరే గుణ

వారాన్నిధి సీతమ్మకు హారతులీరే

వీరిద్దరి కిపుడు సతులు హారతులీరే తని

వారా తలిదండ్రులకు హారతు లీరే

మీరందరు వేడుకతో హారతులీరే మన

సారా మన దేవుళ్ళకు హారతులీరే

చింతించ బోకండి చింతించ బోకండి

చింతించ బోకండి చింతించ బోకండి

  శ్రీరాము డున్నాడు చింతించ బోకండి

ఎంతెంత కష్టాల నణగించుటకు నైన

  ఈరాము డున్నాడు చింతించ బోకండి

ధరమీద తనువొండు ధరియించి యెవరైన

  తప్పకుండగ బాధ లనుభవించగ వలయు

నరులార శ్రీరామ నరనాథు దరిజేరి

  చరణంబులను పట్టి శరణమన్నదె చాలు

కరుణాళువగు వాడు ఘనవిక్రమము వాడు

 గ్రక్కున ప్రేమతో నక్కున మిముజేర్చి

శరణాగతత్రాణబిరుదాంకితుడు మీకు

  శరణంబు దయచేసి సుఖములు సమకూర్చు

వరదాయకుడు వాడు పరమాత్ముడే వాడు

  సురకోటికిని తానె  శరణ మిచ్చెడి వాడు

నిరవద్యు డగువాడు నిరుపమానుడు వాడు

   సరిసాటియే లేని వరవిక్రమము వాడు

దరిజేసి శరణన్న తప్పొప్పు లేమాత్ర

  మరయకుండగ వేగ తలను కాచెడువాడు

అరవిందళనేత్రు డాదినారాయణుడు

   సరసుడు మనకు ప్రసన్నుడై యున్నాడు

చెప్ప వయ్య తండ్రీ శ్రీరఘురామా

చెప్ప వయ్య తండ్రీ శ్రీరఘురామా

ఇప్పుడు నేననే మాట ఒప్పా తప్పా

హరిభక్తికి నోచుకొనని దది యొక జన్మా

హరినామము పలుకకుండు నది యొక నోరా

హరిరూపము చూడకుండు నది యొక కన్నా

హరిసేవలు చేయకుండు నది యొక కరమా

హరిపైనే నిలువకుండు నది యొక మనసా

హరినెరుగక తిరుగుచుండు నతడొక మనిషా

హరిభక్తుల కలియకుండు నది యొక బ్రతుకా

హరిసన్నిధి కోరకుండు నత డొక జీవా

మెండైన భక్తి కలిగి యుండు సజ్జనునకు

మెండైన భక్తి కలిగి యుండు సజ్జనునకు

చండభానుసత్కుల మండన రామ

హరినామము పలుక రసన కాసక్తి మెండు

హరిరూపము చూడ కనుల కాసక్తి మెండు

హరికీర్తన వినగ చెవుల కాసక్తి మెండు

హరికథలను చదువ మనసు కాసక్తి మెండు

హరిక్షేత్రము లందు తిరుగ నాసక్తీ మెండు

హరిభక్తుల కూడిమాడ నాసక్తి మెండు

హరిభజనల చేయుచుండ నాసక్తి మెండు

హరికీర్తిని చాటించగ నాసక్తి మెండు

హరిపూజలు చేయ బుధ్ధి కాసక్తి మెండు

హరిసేవలు చేయ తనువు కాసక్తి మెండు

హరి సన్నిధి నుండ జీవి కాసక్తి మెండు

హరిని చేరుకొనగ నాత్మ కాసక్తి మెండు