జనులారా నాపేరిది యని యెందుకు తలచేరో

జనులారా నాపేరిది యని యెందుకు తలచేరో

మును పెన్ని పేర్లతోడ మనుజులు నను పిలిచిరో

అందమైన తనువు లెన్ని వందలు నే దాల్చితినో

అందమైన పేరు లెన్ని వందలు ధరియించితినో

ముందుగ మది నూహింపుడు బుధ్ధిమంతులార మీ

రందర కపు డవగతగమగు నసలుసిసలు సత్యము

చక్కనైన పేరుండునె జంతుతతికి దేనికైన

యెక్కడైన నుండిన నది యెంచిచూడ నొక్క నరుడు

నిక్కువముగ ప్రేమతోడ నిలిపినదే కాని జగతి

తక్కుంగల వాటికెల్ల తగును జాతి వాచకమే

నరునకైన పేరనగా నరుడొక్క డిచ్చెనదే

అరయగ పేరేది యైన వ్యవహరించుట కొరకే

వరుసగ నాకిట్టి పేర్లు వందలువందలుగ నాయె

బిరుదులైన పేరులైన పిచ్చిమాట లేను సుమా

నరుల పేర్లు తలచినంత నొరుగున దేమియును లేదు

హరి పేర్లను తలచినంత తరుగును పాపములు మీకు

హరేరామ హరేకృష్ణ హరేనారసింహ యనుచు

నిరంతరము తలచితిరా నిశ్చయముగ కలుగు ముక్తి

అందరును నావారే ననుకోవయ్యా

 

అందరును నావారే ననుకోవయ్యా హరి

నందరిలో పెద్దబంధు వనుకోవయ్యా

ఆదుకొనే వాడు బంధు వనుకోవయ్యా హరి

యాదుకొన్నటుల నెవ్వ రాదుకొందురయ్యా

చేదోడై యెవరుండిన చెంతనెవరు లేకుండిన

ఆదుకొనుచు సన్నిహితుం డగుచు హరి యుండడా

ఆశ్రయము నిచ్చు బంధు వనుకోవయ్యా హరి

నాశ్రయించి జగము లున్నవనుచు తెలియవయ్యా

ఆశ్రయించ నెవరుండిన నస లెవ్వరు లేకుండిన

నాశ్రిత సంరక్షకుడై హరి చక్కగ నుండడా

పిలిచినపుడు పలుకువాడె పెద్దబంధుయయ్య యిన

కులతిలకా యనగానే పలుకు శ్రీరాముడయా

ఇల నీతో నెవరుండిన నెవ్వరు నిల లేకుండిన

కలనైనను నిను వీడక ఘనుడు హరి యుండడా

తప్పక మనకున్న దొక దగ్గర దారి

తప్పక మనకున్న దొక దగ్గర దారి యే
తిప్పలును లేని యొక తిన్ననైన దారి

హరిపాదసేవనమే యాదారి
హరినామస్మరణమే యాదారి
హరికంకితమగుటయే యాదారి
మరి వేరేదియు లేదు మంచిదారి

హరిభక్తులు జనుచుండు నాదారి
అరుగరాని దితరులకు నాదారి
పురుషోత్తము నింటికే పోవుదారి
మరి వేరేదియు లేదు మంచిదారి

హరేరామ యనుటయే యాదారి
హరేకృష్ణ యనుటయే యాదారి
హరిని కీర్తించుటయే యాదారి
మరి వేరేదియు లేదు మంచిదారి

శివమయము కాని దేది జీవుడా

శివమయము కాని దేది జీవుడా పరమ

శివుడు లేని చోటు లేదు జీవుడా

చెట్టు పుట్ట లన్నిటిలో శివుడు కలడు జీవుడా

గట్టు గుట్టు లన్నిటిలో కలడు శివుడు  జీవుడా

పిట్ట పశువు లోన తానె వెలుగు శివుడు జీవుడా

పట్టరాని శివునివెలుగు భావించర జీవుడా

శివుని కాక యితరములను చింతించే జీవుడా

శివుని నీవు తెలియుటెట్లు చెప్పవయ్య జీవుడా

శివచింతన కలిగి నీవు జీవించిన జీవుడా

శివుని యనుగ్రహము నీకు సిధ్ధించును జీవుడా

శివుని నీవు మనసారా చింతిచిన జీవుడా

శివుడిచ్చును భవతారక చింతామణి జీవుడా

శివుడిచ్చిన రామమంత్ర సిధ్ధి వలన జీవుడా

చివరకు  కైవల్యపదము చేరగలవు జీవుడా

దేవుడే దిక్కు

దేహధారు లందరకును దేవుడే దిక్కు సం
దేహమేల నెల్లప్పుడు దేవుడే దిక్కు

చేవచెడి యున్న వేళ దేవుడే దిక్కు స

ర్వావస్థల జీవుల కాదేవుడే దిక్కు

దేవతలకు నైనను దేవుడే దిక్కు ఆ

దేవేంద్రున  కైనను దేవుడే దిక్కు

భూవలయ మందైనను దేవుడే దిక్కు ఆ

దేవభూమి యందైనను దేవుడే దిక్కు

వేవురిలో నుండినను దేవుడే దిక్కు మరి

నీవొక్కడ వైయున్నను దేవుడే దిక్కు

జీవునకు సంసారమందు చేరిన దాది

త్రోవకాన రాని దైన దేవుడే దిక్కు

చావైనను రేవైనను దేవుడే దిక్కు ఆ

దేవదేవుడైన రామదేవుడే దిక్కు

దశరథనందన పాహి

దశరథనందన పాహి
దశముఖమర్దన పాహి

పాహి వార్ధక్యమే పట్టుకొన్నది తనువు

  బడలియున్నది దైవమా

పాహి నీనామమును పలుకుటకే తక్క

  పసచెడె నీ తనువున

పాహి శ్రీరామ యిక పదిమందికిని బరువు

  వసుధపై నిది యుండుట

పాహి శ్రీనాథ భవతారక యీయునికి

  వలన లాభము లేదురా

పాహి శ్రీరఘురామ పడినచిక్కులు చాలు

  పరమాత్మ రక్షించవే

పాహి శ్రీపతి నిన్ను ప్రార్ధించు చున్నాను

  త్వరపడ విది యొప్పునా

పాహి శ్రీజానకీరమణ నామొరలేవి

  పట్టించుకోవేమయా

పాహి శ్రీరామ సంసారబాధలు చాలు

 భక్తుడ నను బ్రోవవే

పాహి పాహి యంటే పలుకకుండుట నీకు

  పాడి కాదుర రాఘవా

పాహి పాహి యనిన భక్తులెందర మునుపు

  బాగుగ దయజూడవో

పాహి పాహి దీనబాంధవ నీయందె

  యూహలన్నియు నిల్పితి

పాహి పాహి రామ దేహధారుల కెల్ల

  పరమగతివి నీవెగా

   

హరినామామృత మానగ నొల్లని

హరినామామృత మానగ నొల్లని
నరునకు మోక్షము నాస్తి సుమా

హరి లేనే లేడను వారలతో

పొరబడి స్నేహంబును చేయుటచే

నిరంతరంబుగ నీచవాక్యముల

హరిపై రువ్వుచు నపహసించుచును

హరిపారమ్యము నాక్షేపించుచు

మరి యింకొక్కని పరదైవత మని

తరచుగ మ్రొక్కుచు తమోగుణంబున

హరిలో వెదకుచు నవగుణంబులను

హరికాదు కదా సిరిముఖ్యం బని

దురాశ నటునిటు తిరుగుచు బ్రతుకును

కరగించుచు శ్రీకరుడగు హరినే

మరచి చరించెడు మతిహీనుం డగు

హరిపై భక్తియె యలవడ నీయని

పురాకృతముచే పుట్టిన దాదిగ

తరించవలెనను తలపే కలుగక

పొరబడి యైనను హరి యన నేరక

గురువులు కొందరు గుఱుతెఱుగకయే

తరచుగ దుర్బోధలు చేయుటచే

పరాత్మరుని యెడ పరాంగ్ముఖత్వము

తిరమై దుర్మతపరుడై తిరుగుచు

హరేరామ యని  హరేకృష్ణ యని 

నరుడ న్నంతనె నవ్వుచు వైళమ

వరంబులిచ్చెడు కరుణామయు డగు

హరి యున్నా డని యాత్మ నెఱుంగక

శ్రీరామ మారాథ్యపాదుకం కారుణ్యవారాన్నిధిం భావయే

శ్రీరామ మారాథ్యపాదుకం కారుణ్యవారాన్నిధిం భావయే

ధీరం హరిం సత్యసారం భవాంభోధిపారం సదా భావయే

శరణాగతత్రాణబిరుదాంకితం వీరవరసేవితం భావయే

సురవైరిగణగర్వశోషణం సురలోకపరిసేవితం భావయే

నిరుపాధికం లోకపరిపాలకం సర్వనిగమార్చితం భావయే

నరనాయకం భక్తవరపోషకం మోక్షవరదాయకం భావయే

సాకేతనాథం సదానందకందం ప్రశాంతాకృతిం భావయే

లోకైకవీరం సదానిర్వికారం త్రిలోకార్చితం భావయే

వైకుంఠవాసం జగత్పూజ్యమూర్తిం భవారాధితం భావయే

శోకాంతకం జన్మచక్రాంతకం సర్వలోకేశ్వరం భావయే

రామం సదా దివ్యమూర్తిం హరీంద్రాది సంప్రార్ధితం భావయే

రామం  సదా జానకీయుక్తమత్యంతరమ్యాకృతిం భావయే

రామం  సదానందరూపం సదాచిద్విలాసం సదాభావయే

రామం  సదాసుప్రకాశం మహామోహప్రధ్వంసినం భావయే 

శ్రీహరినామము చేయండీ

ఊహలపోహలు మానండీ

శ్రీహరినామము చేయండీ

శ్రీహరినామము చేసెడు వారికి

  చింతలు దూరం  బగునండీ

శ్రీహరినామము చేసెడు వారికి

  చిక్కులు బహుదూరంబండీ

శ్రీహరినామము చేసెడు వారికి

  క్షేమము నిత్యం బగునండీ

శ్రీహరినామము చేసెడు వారల

  జీవితమే ధన్యంబండీ

శ్రీహరినామము శివు డనిశంబును

  చింతించునని తెలియండీ

శ్రీహరినామము త్రిలోకములకును

  శిరోధార్యమని తెలియండీ

శ్రీహరినామము చేసినకొలదియు

  జిహ్వకు రుచియని తెలియండీ

శ్రీహరినామము చేయుట వలననె

  దేహికి మోక్షము తెలియండీ

హరేరామ శ్రీహరేరామ యని

  నిరంతరము ధ్యానించండీ

హరేకృష్ణ శ్రీహరేకృష్ణ యని

 నిరంతరము ధ్యానించండీ

హరినామజపానందముతో నిహ

  పరముల సుఖమును పొందండీ

కరుణామయుడగు శ్రీహరికృపచే

  హరిసన్నిధికే చేరండీ

ఎంతకాల మున్నచో నంతకష్టము

 

ఎంతకాల మున్నచో నంతకష్టము ని

శ్చింతగ నరలోకమున జీవించలేము

అనువు జూచి హానిజేయు

  జనుల వలన చింత

తనమనుషులు కాలగతిని

  జనుట వలన చింత

దినదినము కృశించుచుండు

  తనువు నరయ చింత

తనవెనుకనె యమడు తిరుగు

  ననెడు దొక్క చింత

తుదుని యెంటి యైన వేళ

  మెదుకు కొరకు చింత

మెదుకు నొంటి మెసవలేక

  మిక్కిలిగా చింత

అదనుజూచి మీదపడును

  వ్యాధులనెడు చింత 

చింతలిన్న యన్ననగా

   శ్రీరామచంద్రా

యెంతవారికైన తప్ప

  వీపృథివిని దేవ

కొంతగ నీనామజపము

  సంతోషము కాని

సుంతయు భూలోకమందు

  సుఖమేమియు లేదు

శివుడు పెట్టకుండ బువ్వ చేతికి రాదు

శివుడు పెట్టకుండ బువ్వ చేతికి రాదు ఆ
భవుడీయక రామమంత్రభాగ్యము లేదు

వివరముగా చెప్పనేల విరించ్యాదులకును గూడ
భవతారకమంత్రమహిమభావ్యము కాకుండును
శివభక్తిపరాయణులకు చిక్కును హరిమంత్రము
శివశివశివ యనకుంటే జీవితము వృథా

శివుని నుండి పార్వతికి చెందినదా మంత్రము
శివుడు హనుమయై యుపాసించిన హరిమంత్రము
శివుడు భిక్షగా నీయక చిక్కదు భవతారకము
శివుని వేడి బడయలేని  జీవితము వృథా

శివుడు భోళాశంకరుడు జీవులందరకు హితుడు
శివుని పురము చేరి మీరు శివుని మెప్పించవచ్చు
శివసన్నిథి నున్న చాలు శివుడిచ్చును మంత్రము
శివుని చేరమనే వారి జీవితము వృథా

 

 
హరేరామ హరేరామ హరేరామ రామ
నిరంతరము నీపేరే స్మరించేము రామ

సిరులను మేమిన్నాళ్ళును స్మరించితే రామ
స్మరించనే లేదు మమ్ము సిరులో రఘురామ 
సిరుల కొరకు తపించుచు చెడుటకన్న రామ 
హరిస్మరణము మేలన్నది యెరుగమైతి రామ

నరులను మేమిన్నాళ్ళును నడ్డివిరుగ రామ
విరుగబడి కొలువ కొలువ నేమొరిగెను రామ
పరులను సేవించుచు నిల బ్రతుకకుండ రామ
హరిసేవయె మేలన్నది యెరుగమైతి రామ

సుఖము కొరకు నిన్నాళ్ళును చూచిచూచి రామ
మఖవశివబ్రహ్మాదుల మాటలెన్ని రామ
సుఖమన హరిస్మరణదివ్య సుఖమనుచు రామ
సుఖముగా నిన్ను తలప జొచ్చితి మో రామ