నిను దక్క వేరెవ్వరిని నమ్మని
నను బ్రోవ బెట్టేల నాస్వామి
నీవుండ చేజాచి నేనొరుల కడ
నేవేని వేడిన దెన్నడు లేదే
నీవేది యిచ్చిన నేనది గైకొని
భావింతు నదియే పదివే లనుచును
నావంక జూచుటె నగుబాటన్నట్లు
నీవేల నటనలు నేడు సేసేవు
ఎన్నెన్ని జన్మల నెత్తించినావో
ఎన్నండు నందుల కేమన లేదే
తిన్నగా నిచ్చిన దేహము గైకొని
నిన్నలరింపగ నే నాడితినే
అన్నన్నా నేనలసితి నంటేను
విన్నను వినలేదన్నటు లున్నావు
పెద్దపేరే గల వెన్నుడవే నీవు
పెద్దగ సిరులేవి వేడుటలేదే
కొద్దిగ దయజూపి కోదండరామా
అద్దరి ననుజేర్చ మంటినిగాని
ముద్దుగ భక్తాళి మొరలే వినరాని
మొద్దునిదురలో మునిగున్నావో
కామెంట్‌లు లేవు:
కామెంట్‌ను పోస్ట్ చేయండి
ఆమోదించిన వ్యాఖ్యలు ప్రచురితం అవుతాయి.