ఇడిగో శ్రీరాముడు

ఇడిగో శ్రీరాముడు - ఇందీవరశ్యాముడు
కడుపావననాముడు - కారుణ్యధాముడు

ధరాసుతాసమేతుడై ధరనేలెడు వాడు

పురవైరి వలన నెపుడు పొగడబడెడు వాడు

శరణన్నవారి నెల్ల కరుణించెడు వాడు

హరియే ఈరాముడు  పరమపురుషుడు

ధర్మావతారుడగుచు ధరనుండిన వాడు

కర్మబంధములు బాపి కటాక్షించు వాడు

దుర్మదులగు దనుజులను దునిమినట్టి వాడు

నిర్మోహుడు రాముడు నిరుపమానుడు

మునివరుల హృదయపద్మముల నుండెడువాడు

మునులు నెంతే మోహించిన రూపము వాడు

మునుల తపంబులు మెచ్చి మోక్షమిచ్చు వాడు

వనజనయను డీరాముడు పరమపురుషుడు