లోకమెల్ల చక్కగ నిదురించు వేళ

జగదీశ్వర లోకమెల్ల చక్కగ నిదురించు వేళ

తగినమంచి సమయమురా ధ్యానంచుకొనగ నిన్ను

యుగములుగా యత్నించుచు నున్నను నాకొకనాటికి

పగటిపూట జనుల దుష్టభావతరంగముల మధ్య

తగుననుచును ఘడియయేని జగము మరచి ధ్యానించగ

భగవంతుడ యెన్నటికిని వశము కాక యున్నదిరా

ఆపనియని యీపనియని యటునిటు తిరుగుచును కొంత

తేపకు నీ ధనములనుచు తిరుగుటలో నొక కొంత

ఆపసోపములకు కొంత కోపతాపములకు కొంత 

లోపించగ చిత్తశాంతి లోకేశ్వర ధ్యానమెటుల

అందులకే యర్ధరాత్రి హాయిగ లోకమును మరచి

కందువగు సమయమది కావున నిను నాహృదయ

మందిరమున దరిసించుచు మరిమరి పులకించుచు

నుందునురా రామచంద్ర యుత్సహించి ధ్యానంబున