6, జులై 2021, మంగళవారం

నరుని రక్షించు హరినామస్మరణము

నరుని రక్షించు హరినామస్మరణము
తరణోపాయమిదే తప్ప వేరు లేదు

సవనంంబు లిన్ని చేసి సత్కార్యము లన్ని చేసి
భవసాగర మీదుద మని భావించుట వెఱ్ఱి
నవనీతహృదయుడైన నారాయణు నామమలే
యవిరళముగ జపియించక భవము దాటడు

మంచివిద్య గలవారును మంచితనము కలవారును
కొంచెము చదువైన నేర్చుకొననట్టి వారలును
అంచితముగ రామనామ మందు శ్రధ్ధజూపిన తరి
యించవచ్చు భవసాగర మిది సత్యము

ఒరుల తప్పు లెన్నుటకే యుబలాటపడు నాల్కకు
హరినామము చేయుటయే యలవడెనా మేలు
హరేరామ హరే‌కృష్ణ యని పలుకుచునుండు వాడు 
నిరాటంకముగ భవమును తరియించును


3 వ్యాఖ్యలు:

  1. మా అందరీ చేతకూడా హరినామ స్మరణ చేయిస్తునందుకు 🙏 మా పూజ లో కూడా నీ కీర్తనలే చదువుతున్నాము 🙏🙏

    ప్రత్యుత్తరంతొలగించు
    ప్రత్యుత్తరాలు
    1. అవునా? చాలా సంతోషం. పదిమందీ వీటి మనసారా చదువుకొనటమే పరమార్ధం కదా!

      తొలగించు
  2. శ్యామలీయంవారు,
    మీ బ్లాగ్ విజిటర్స్ కౌంటర్ 928340 చూపుతోంది, గమనించరా?
    కంగ్రాట్స్ సార్.

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.