16, జులై 2021, శుక్రవారం

దేవదేవుడా నీకు తెలియని దేమున్నది

దేవదేవుడా నీకు తెలియని దేమున్నది
భావించును తనవాడని భక్తుడు నిన్ను

ఎవ్వానికి నీదు తత్త్వ మెఱుకగునయ్య
ఇవ్వధను నరులె కా దెంచ విరించికిని
రవ్వంతకు మించి తెలియ రానిదే యది
నవ్వుచు నందరి నేలెడు నారాయణుడా

మోహించని మునిలేని మోహనరాముడా
మోహించని వనితలేని మోహనకృష్ణుడా
మోహించని యౌగిలేని ముక్తిరూప యీ
మోహించుట నాయందే పుట్టలేదుగా
 
నీవిలాసమాత్ర మగుచు నెగడు సృష్టిలో
జీవులందరు చూడ నీ‌ చిత్కళలే కదా
కావున నందరును నిన్ను కలియు వారలే
నీవు తనవాడవనుచు భావించు వారే

1 వ్యాఖ్య:

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.