9, జులై 2021, శుక్రవారం

ఇదియే సత్యము కాదటయ్యా ఇంకేమున్నదిలే

ఇదియే సత్యము కాదటయ్యా ఇంకే మున్నదిలే
కుదురుగ దీని నెఱింగినపిదప కొఱతే మున్నదిలే

ఇది నాతనువని యేమున్నదయా ఇది నీసేవకు పరికరమే
ఇది నాధనమని యేమున్నదయా ఇది నీవిచ్చిన కానుకయే
ఇది నా తలపని యేమున్నదయా హృదయములో నీవేగా
ఇది నాబ్రతుకని యేమున్నదయా ఇది నీ సేవల కంకితమే

ఇది నాసుఖమని యేమున్నదయా ఇది నీలీలా విలాసమే
అది దుఃఖంబని యేమున్నదయా అది నీ లీలా విలాసమే
ఇది మంచిదని యేమున్నదయా యేదైనను నీ విలాసమే
ఇది చెడ్డదని యేమున్నదయా యేదైనను నీ విలాసమే

ఇది నాపలుకని యేమున్నదయా యిటుపలికించున దీవేలే
అది యిదియని యేమున్నదయా అన్నియు నీకళలే
ఇది నాదని యేమున్నదయా యేదయినను నీవిచ్చినదే
సదయా శ్రీరఘురామా ఇటులే చక్కగ సాగిపోదమురా





 






1 వ్యాఖ్య:

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.