ఊరు మిక్కిలిగ మెచ్చిన నామం
నోరు మిక్కిలిగ మెచ్చిన నామం
దారిని చక్కగ చూపే నామం
శ్రీరాముని శుభనామం
భక్తిమార్గమున నడిపే నామం
ముక్తి ద్వారమును తెరిచే నామం
శక్తియుక్తుల నిచ్చే నామం
రక్తిని గొలిపే రామనామం
శాపాలన్నీ తీర్చే నామం
తాపాలను తొలగించే నామం
పాపాటవులను కాల్చే నామం
తాపసహితమౌ రామనామం
రాతిని నాతిని చేసిన నామం
కోతిని బ్రహ్మను చేసిన నామం
ఆపశుపతి కడు మెచ్చిన నామం
శ్రీపతినామం రామనామం