నీకృప రాదేల నీరజనయన నిన్ను
గా కన్యులను దలప గాదు నాకు
వీని వన్నియు కోతివేషాలు రఘురామ
వీనిపై దయజూప వీడేమి యోగ్యుడు
మానుం డనుచు నేడు మారుతి యన్నాడో
వానరుం డామాట పలుకరాదు కద
పెద్దవారల కెదురు వీడు పల్కును రామ
వద్దయ్య దయచూప వద్దు హీనుండనుచు
పెద్దగా నీతో విభీషణుడు పలుకునో
వద్దనవె యామాట వాడనుట తగునె
శరణ మంటే చాలు మరచి మా తప్పులను
కరుణించు ఘనుడవే మరి యొరుల మాటలను
పరిగణించి విడచు వాడవే కావుగా
ధరణిజా రమణ యిక తాత్సార మేలరా
నమ్మికొలిచెడు నాజీవనమును నడపు రామనామం
పాపతి‌మిరసంహారసూర్యక‌రస్పర్శ రామనామం
పాపాటవులను తగులబెట్టు దావాగ్ని రామనామం
భీకరభవవారాన్నిధితారణనౌక రామనామం
శ్రీకంఠాది మహానుభావులు చేయు రామనామం
గర్వితదానవదర్పాపహరణకారి రామనామం
సర్వవిధంబుల సుజనకోటిని సాకు రామనామం
శ్రీయుర్వీసుతప్రాణనాదమై చెలగు రామనామం
వాయుసూనువిభీషణు లెంతో వలచు రామనామం
ధారాధరశ్యామా దశరథరామా
మారాడవేమిరా మంగళనామా
నీనామరూపములను నేను తలపనా
నీనామవైభవమును నేను పాడనా
నీనామసుధారసము నేను గ్రోలనా
దేనికిరా నీయలుక దీనబాంధవా
నీభక్తజనుల కథలు నేను మెచ్చనా
నీభక్తజనుల తోడ నేను చేరనా
నీభక్తుల నొకడనై నేను నిలువనా
శోభించదు నీకలుక చూడవయ్యా
తిరిగి చూడవేమని తిట్టుకొంటినా
కరుణలేదు నీకని కసురుకొంటినా
వరములీయ వేమని పలికియుంటినా
పరమపురుష యీయలుక పాడిగాదురా
ఊరు మిక్కిలిగ మెచ్చిన నామం
నోరు మిక్కిలిగ మెచ్చిన నామం
దారిని చక్కగ చూపే నామం
శ్రీరాముని శుభనామం
భక్తిమార్గమున నడిపే నామం
ముక్తి ద్వారమును తెరిచే నామం
శక్తియుక్తుల నిచ్చే నామం
రక్తిని గొలిపే రామనామం
శాపాలన్నీ తీర్చే నామం
తాపాలను తొలగించే నామం
పాపాటవులను కాల్చే నామం
తాపసహితమౌ రామనామం
రాతిని నాతిని చేసిన నామం
కోతిని బ్రహ్మను చేసిన నామం
ఆపశుపతి కడు మెచ్చిన నామం
శ్రీపతినామం రామనామం
బాలేందుశేఖరుడు పొగడునట్టి రాముని
నీలమేఘశ్యాముని నీవెఱుగవా
రాము డేలిన గడ్డఫై ప్రభవించియును నీవు
రామునే యెఱుగనన రాదు కదరా
రాముని దేవుడని ప్రతివాడును పొగడునే
రామునే తెలియకుండ రాదు కదరా
మాయదారి గురువుల మాటలు నమ్మితివా
మాయదారి చదువుల మైకమబ్బెనా
మాయదారి కుమతముల మత్తులోన పడితివా
మాయనుదాటించు హరి మాట నెఱుగవు
ఇకనైకను కళ్ళుతెఱచి యెఱిగికొనుము రాముని
ప్రకటించుము సద్భక్తిని బాగుపడెదవు
సకలేశ్వరుని హరిని శరణము వేడకయే
ఒక జీవుడు తరియించుట యుండదయ్యా
స్మరణీయం శ్రీహరినామం వి
స్మరణీయం స్మరనామం
సత్యాన్వేషణ సలిపెడు వారికి
సత్సాంగత్యము చాలను వారికి
ధర్మము మేలని దలచెడు వారికి
దైవము నెదలో దలచెడు వారికి
ఇహసౌఖ్యంబుల నెంచని వారికి
కలిమాయలపై కలబడు వారికి
మోక్షార్ధులగు బుధ్ధిమంతులకు
భవతారకమై పరగెడు నామం
శ్రీరఘురాముని చిన్మయనామం
శతకోటి వందనాలు జానకీమాతకు
శతకోటి వందనాలు జానకీవిభునకు
వందనాలు జగదేకవంద్యకు మాజననికి
వందనాలు జగదేకవంద్యుడు మావిభునకు
వందనాలు భక్తలోకపాలకులకు వందనాలు
వందనాలు క్షిప్రవరప్రసాదులకు వందనాలు
హరిసేవాపరాయణు లందరకు వందనాలు
హరిస్మరణానందులకు వందనాలు వందనాలు
హరిభక్తిప్రచారకు లందరకు వందనాలు
హరిపూజలు చేయువార లందరకు వందనాలు
వందనాలు హరినిపొగడు బ్లహ్మాదిదేవతలకు
వందనాలు హనుమదాది భాగవతోత్తములకు
వందనాలు రఘురాముని భక్తులకు వందనాలు
వందనాలు హరతత్త్వము భావించు విబుధులకు
రామపాదములను విడువరాదే బుధ్ధీ శ్రీ
రామున కన్యమును తలపరాదే బుధ్ధీ
పతితపావనుడు వాడు భగవంతుడే బుధ్ధీ
వ్రతముగా సేవింపు మతని పాదాబ్జములు
భూమిజనుల సేవించుచు చెడిపోకే బుధ్ధీ
పామరులను సేవించుట యన పాపమే కద
శివుడు బ్రహ్మేంద్రాదులు పొగడు చిన్మయు బుధ్ధీ
సవినయముగ సేవించవలె చక్కగ నీవు
హనుమదాదుల సేవలందు హరినే బుధ్ధీ
క్షణము విడువక సేవింపవలె చక్కగ నీవు
ఇంతకన్న హితములేదే యిలలో బుధ్ధీ
చెంతనున్న నారాయణుని సేవించవలె
భవతారకము రామపాదద్వయమే బుధ్ధీ
భవబంధకరము లన్యవస్తువులు మనకు
కొండనెత్తెను గోవిందుడు కను
పండువ చేసె గోవిందుడు
మునిగెడు గిరిని మూపున దాల్చెను
పెనుతాబేలై గోవిందుడు
కనుగొన గిరి కొమ్మునను తానే
మొనకెక్కె నిదే ముకుందుడు
జనులను గోవుల సంరక్షించగ
కొనగోట నిదే గోవిందుడు
మునుకొని గోవర్ధన మెత్తెనుగా
మునుపటి వలెనే ముకుందుడు
కొండల వలె నాకుండు కష్టములు
బెండులు కావా వెన్నునకు
అండ గాక కోదండరాము డను
మొండి యయ్యెనే ముకుందండు
రావణు డక్కడ రాము డిక్కడ యిక
రావణుని చంపెడు దేవు డెక్కడ
పట్టమును గట్టుకొని బంగారుగద్దెపై
పట్టమహిషి ధరణిజ ప్రక్కన మెఱయ
పట్టుపీతాంబరము గట్టి రాము డుండిన
వట్టిదే రావణుని వధియించుట
మునివేషధారియై వనములలో జొరబడి
ధనదుని తమ్మునిపై దాడిచేయు నని
మును నీవు చెప్పనది ముదుసలి బ్రహ్మయ్యా
కనుగొన వట్టిమాట యనిరి సురలు
తప్పునా హరిమాట తప్పునా నావ్రాత
తప్పకుండ దాశరథి తరలును వనికి
కుప్పలుగ రక్కసుల గూల్చు రావణుజంపు
తప్పదనుచు పలికె తా బ్రహ్మయ్య
రామనామము నిన్ను రక్షించును శ్రీ
రామనామమె నిన్ను రక్షించును
కామాదిరిపులపై ఖడ్గమ్ము జళిపించి
తామసత్వవ్యాధి ధాటిని తగ్గించి
ప్రేమతో దుష్కర్మపీడ లడగించి
ఆముష్మికముఫైన ననురక్తి కలిగించి
భవచక్రఖండనపారీణమై యొప్పి
భవవార్ధిదాటించు పడవయై యొప్పి
భవరోగశమన దివ్యౌషధంబై యొప్పి
భవలతల్ కోయు కరవాలమై యొప్పి
కలిసర్పవిష మూడ్చు గట్టిమంత్రం బగుచు
వెలలేని సుఖమిచ్చు వేదమంత్రం బగుచు
బలవృధ్ధి కలిగించు భవ్యమంత్రం బగుచు
జలజాక్షు దరిజేర్చు సత్యమంత్రం బగుచు
రామనామమన రుచికలుగుటకు ప్రాప్త ముండవలెను
ప్రాప్తమున్న దొక శప్తవనితకు రామనామమున రుచికలిగె
ప్రాప్తమున్న దొక బోయవానికి రామనామమున రుచికలిగె
ప్రాప్తమున్న దొక కోయవనితకు రామనామమున రుచికలిగె
ప్రాప్తమున్న దొక వానరమునకు రామనామమున రుచికలిగె
ప్రాప్తములేదా సిరు లెన్నున్నను రామనామమున రుచిలేదు
ప్రాప్తములేదా చదు వెంతున్నను రామనామమున రుచిలేదు
ప్రాప్తములేదా ప్రజ్ఞలు గలిగియు రామనామమున రుచిలేదు
ప్రాప్తములేదా వేదాంతికియును రామనామమున రుచిలేదు
రామనామమున రుచికలుగుటకు నేమి చేయవలె నెవడెఱుగు
ఏమి దానములు నేమి ధర్మముల నెంతచేసిన రుచికలుగు
రామనామమున రుచికలుగుటకు రాముని దయయే కారణము
రామునిదయ సంప్రాప్తంబైన రామనామమున రుచికలుగు
మధురమధురమౌ రామనామం మదిలో దలచండీ
విధిగా మీరీ రామనామం విడువక చేయండీ
సదమలమగు ఈ రామనామం చక్కగ చేయండీ
బుధజనహితమౌ రామనామం పొంగుచు చేయండీ
నిధులకునిధియౌ రామనామం నిక్కుచు చేయండీ
మేలొనరించే రామనామం మీరు మరువకండీ
కాలాతీతము రామనామం చాలు మాకనండీ
ప్రొణాధికమీ రామనామం వదలబో మనండీ
బ్రహ్మానందం రామనామం వదలబో మనండీ
ప్రణవం తానే రామనామం వదలబో మనండీ
కథలను నిండిన రామనామం ఘనముగ చాటండీ
విధిశంకరనుత రామనామం విరివిగ చాటండీ
అందరు మెచ్చగ రామనామం అవనిని చాటండీ
భవహరమని ఈ రామనామం.ప్రజలకు చాటండీ
హే రామ పౌలస్త్యమృగసింహ
నారాయణాచ్యుత నరసింహ
నీలమేఘశ్యామ నిరుపమాకార కరు
ణాలవాల యోగిరాజసంపూజ్య
ఘోరపాతకవన క్రూరకుఠార సం
సారపారావార తారణనౌక
నిగమాంతసంవేద్య నిస్తులతత్త్వ ప
న్నగరాజపర్యంక జగదేకశరణ
దానవవిషవనదహనదావాగ్ని ముని
మానసకాసార విహరణహంస
భర్గశక్రవిరించిభావితభావ అప
వర్గప్రద విశ్వవందితచరణ
పరికల్పితానేకబ్రహ్మాండభాండ శ్రీ
ధరణీజాహృద్గగనపరిలసచ్చంద్ర
నరసింహ శ్రీరామ నారాయణాచ్యుత
కరివరదా నను కావవయా
పరమేశ జగదీశ బ్రహ్మాండాధిప
తరణికులోద్భవ ధర్మావతార
ధరణీసుతావర దశముఖవిదార
కరుణించరా నన్ను ఘనశ్యామా
దాసపోషక దైత్యదమన రఘువీర
వాసవాదిసురనుత భాసురవిక్రమ
నీసరి వారెవ్వరు నీరేజాక్షణ
గాసిల్లుచుంటిరా ఘనశ్యామా
జయరామ శ్రీరామ జానకీరామ
భయవిదారక రామ పావననామ
రయమున నన్నేల రావేమి రామ
దయచూప వేలరా దశరథరామ
నీనామమే మందురా నిజము భవరోగమునకు
నీరూపమే విందురా నిజము రెండుకన్నులకు
నీనామరూపములే నిరుపమానములు రామ
నీనామరూపములే నిత్యసత్యములు పృథివి
నీనామరూపములే నిత్యమఖిల జగములేలు
నీనామరూపములే నిత్యానందములు నాకు
నీనామరూపములే ధ్యానించు యోగిగణము
నీనామరూపములే ధ్యానించు సదాశివుడు
నీనామరూపములే ధ్యానించు వాయుసుతుడు
నీనామరూపములే మానక నన్నేలు రామ
నీనామరూపములే దీనకల్పవృక్షములు
నీనామరూపములే జ్ఞానులకు సర్వస్వము
నీనామరూపములే నిర్మోహులు మోహింతురు
నీనామరూపములే జానకీశ నేసేవింతు
రామనామము పలుకనీ ప్రతిచోట ప్రతినోట
రామభజనలు సాగనీ ప్రతియింట ప్రతిపూట
జయజయ శ్రీరామ జగదభిరామ యని
జయజయ రఘురామ జానకిరామ యని
జయజయ రమణీయశాంతవిగ్రహ యని
జయజయ మమ్మేలు స్వామి రామా యని
జయజయ శ్రీరామ జననుతచరిత యని
జయజయ విశ్వేశ సాకేతరామ యని
జయజయ జగదేక సత్యవిక్రమ యని
జయజయ మారామచంద్ర మహాత్మ యని
జయజయ శ్రీరామ జయజయ దేవ యని
జయజయ సర్వేశ జయజయ రామ యని
జయజయ లోకేశ జయము.శ్రీహరి యని
జయజయ పరమాత్మ సదానందా యని
శ్రీరామ యనరా శ్రీరామ యనరా
శ్రీరాము డీయనన్నది లేదురా
శ్రీరామ శ్రీరామ శ్రీరామ యనరా
ఆరాముడే యిచ్చు నానందము
శ్రీరామ శ్రీరామ శ్రీరామ యనరా
ఆరాముడే యిచ్చు నారోగ్యము
శ్రీరామ శ్రీరామ శ్రీరామ యనరా
ఆరాముడే యిచ్చు నైశ్వర్యము
శ్రీరామ శ్రీరామ శ్రీరామ యనరా
ఆరాముడే యిచ్చురా విజయము
శ్రీరామ శ్రీరామ శ్రీరామ యనరా
ఆరాముడే యిచ్చు పరివారము
శ్రీరామ శ్రీరామ శ్రీరామ యనరా
ఆరాముడే యిచ్చు రాజ్యమ్ములు
శ్రీరామ శ్రీరామ శ్రీరామ యనరా
ఆరాముడే యిచ్చు భోగమ్ములు
శ్రీరామ శ్రీరామ శ్రీరామ యనరా
ఆరాముడే యిచ్చురా పూజ్యత
శ్రీరామ శ్రీరామ శ్రీరామ యనరా
ఆరాముడే యిచ్చు సత్కీర్తిని
శ్రీరామ శ్రీరామ శ్రీరామ యనరా
ఆరాముడే యిచ్చు సర్వస్వము
శ్రీరామ శ్రీరామ శ్రీరామ యనరా
ఆరాముడే యిచ్చు నాయుష్యము
శ్రీరామ శ్రీరామ శ్రీరామ యనరా
ఆరాముడే యిచ్చు నపవర్గము
నీవెంత చేసితివి చూడూ లంకేశ
నీలంక యిక వల్లకాడు
నీవెంత అరచినా చూడూ ఓసీత
నీరాము డిచ్చటకు రాడు
రాడు రాడంటేను నీవూ రావణా
రాముడూ రాకుండ పోడు
వాడు వచ్చుట సర్వకల్ల ఓసీత
వచ్చి ననుజంపుట కల్ల
నిన్ను జంపుట కల్లకాదూ ఓదైత్య
నన్ను కాచుట కల్లకాదు
ఎన్నాళ్ళు పాడేవు సీతా ఈపాట
ఎన్నటికి నట్లు కాబోదు
అట్లేల కాదురా మూర్ఖా రాముడే
ఆదినారాయణుడు మూర్ఖ
అట్లు ప్రశంసించి సీతా నీవు న
న్నెట్లు బెదిరింతువే సీతా
బెదిరించుచుంటిరా దుష్టా నీకునై
నుదయించినట్టి మృత్యువును
అదియును చూచెదను సీతా ఏమైన
వదలబోనే నిన్ను నేను
నీవు వదిలెడి దేమి పోరా రాముడే
వదిలించు నీచెఱను రేపు
ఈవాదనల కేమి సీతా చూదాము
నీవాక్యమందు సత్యమ్ము
చిట్టివింటి నెక్కుపెట్టి శ్రీరాముడు ఇదె
కొట్టెద రక్కసులనను బాలరాముడు
నవ్వుచు నొక బాణమేసి శ్రీరాముడు ఇది
నారాయణాస్త్ర మనును బాలరాముడు
బాణమొకటి మంత్రించి శ్రీరాముడు ఇది
బ్రహ్మాస్త్రము పొమ్మనును బాలరాముడు
పలువంకల పుడక దీసి శ్రీరాముడు ఈ
బాణము నాగాస్త్రమను బాలరాముడు
విరివిగ బాణములు వేసి.శ్రీరాముడు అరి
వీరులందరు చచ్చిరను బాలరాముడు
తన్ను మెచ్చు తమ్ములతో శ్రీరాముడు నా
కన్ప వీరు డెవ్వడనును బాలరాముడు
విల్లుడించి చిరునగవుల శ్రీరాముడు
విజయము నాదేననును బాలరాముడు
తనవారని పెఱవారని దశరథసుతు డెంచునా
తనపాదము లంటగనే తప్పక కరుణించును
అదిశుచియని ఇదికాదని అగ్నిదేవు డెంచునా
వదలక తననంటుదాని పట్టి బూది చేయును
సజ్జనులకె పూలు సువాసనలు వెదజల్లునా
పజ్జకెవరు వచ్చినను పరీమళము చిమ్మును
పాము మంచిచెడుల నెంచి పట్టి కాటువేయునా
తామసమున నెదుటనున్న దాని దంష్ట్రకిచ్చును
యోగ్యులకే దప్పికను యుదకములు తీర్చునా
యోగ్యతల నెంచకయే ఊరట కలిగించును
వయసుచూచి వేటగాడు బాణముతో కొట్టునా
దయచూపక దేనినైన తప్పక వధియించును
మంచివారి రోగములకె మందులు పనిచేయునా
అంచితముగ గ్రోలువారి కారోగ్యము నిచ్చును
జయజయ రామ జానకిరామ
భయహర శుభకర పావననామ
దనుజవిరామ జనహితకామ
మునిమఖరక్షకఘననామ
గగనశ్యామ కరుణాధామ
అగణితశోభనగుణధామ
సుందరనామ సురుచిరనామ
సుజనగణార్చితశుభనామ
వికుంఠధామ వీరలలామ
సకలాగమసన్నుతనామ
రవికులసోమ భవనుతనామ
భవవార్నిధితారకనామ
చేయెత్తి దీవించరాదా శ్రీరామ
నాయందు దయజూపరాదా
చింతలువంతలు చేరవు నన్నని
సంతోషము నాస్వంతంబగు నని
సత్సంగత్వము సలిపెద నేనని
దుస్సంగత్వము దూరము నాకని
మరువను నీనామము నెన్నడని
నరులను కొలుచుట నాకు కలుగదని
నీభక్తులలో నిలచెద నేనని
ఏభయములు నాకెన్నడు లేవని
తాపత్రయముల తగులను నేనని
పాపము నాకన బహుదూరంబని
అరిషడ్వర్గము లంటవు నన్నని
పరమార్ధంబును మరువను నేనని
హాయిగ సంపద లమరెడు నాకని
మాయ నాకడకు మరియిక రాదని
పామరు లిక నను భాధపెట్టరని
భూమిని నాకిక పుట్టువు లేదని
పరమపురుష శ్రీహరి పురుషోత్తమ
కరుణాకర రఘువర తప్పెంచకు
నమ్మిన వారల నమ్మకములను
వమ్ముచేయవని యిమ్మహి పెద్దలు
నమ్మబలికి రని నమ్మితిరా నిను
నమ్ముట తప్పా కిమ్మనవేరా
వింటినిలే నీబిరుదము లెన్నో
వింటి నీకథలు వింతలువింతలు
వింటిని నీభక్తవీరుల కథలును
అంటి నమ్మితినని అదినా తప్పా
తప్పా తనువుల దాల్చుట యనునది
తప్పా ననుమాయ గప్పుట యననది
తప్పా నిన్నే తలచుట రామా
తప్పా నీకై తహతహ లాడుట
ఇంతకన్న మంచిమందీ యిలలో లేదండీ
చింతించక యెంతోకొంత యిచ్చి కొనండీ
చేదుమందు కాదండీ చెప్పరాని తీపండీ
వేదనలు తొలగించే పెద్దమందండీ
పేదలనీ ధనికులనీ వివక్షేమీ లేదండీ
ఆదుకొనే యీమందు అందరిదండీ
మీరు డబ్బులిస్తే మందు మేమివ్వ లేమండీ
గోరంతైనా డబ్బుతొ కొనలేరండీ
కూరిమి మీదగ్గరుంటే కొంచెమిస్తే చాలండీ
కోరుకున్నంత మందు కొంచుపొండీ
ఈమందును తిన్నారో యికమీద పుట్టరండీ
ఏమందూ యీహామీ నీయలేదండీ
ఈమందే మంచిమందు ఇదే నాల్కనుంచండీ
రామనామమనే మందు రవ్వంతైనా
నారాము డంటేను నారాము డనుచును నవ్వుచు పోట్లాడిరి
గారముచేయుచు శ్రీరాముబుగ్గల గట్టిగ ముద్దులు పెట్టుచును
బంగారుకొండను నవమాసమ్ములు భరియించి కంటిని నేనని కౌసల్య
అంగనామణీ పుత్రకామేష్టి యందిచె నపురూపఫలమని నరపతి
చెంగునగెంతే చిలిపిబాలకుని శ్రీరామచంద్రుని చంకనజేర్చుచు
నానోములపంట నాకొడుకువీడే నన్నెత్తుకోనీవె యనును కౌసల్య
ఈనల్లనయ్య నాకొడుకు కాడా యెత్తుకోనీవమ్మ యనును కైకమ్మ
కానీవె పిలిచితే యెవరిచంకెక్కునొ కనుగొందమిర్వువ మదియిప్పు డని
కంటిని చూడవె నాకంటివెలుగును యింటికి వెలుగును ఈకొడుకు నను పతి
వింటినిబట్టుట నేర్పెద నేనని ఇంటికి వెలుగును చేసెద నని కైక
మింటిమానికెపుటింటికి వెలుగై మెఱిసే రాముని చంకనజేర్చుచు
హరిమెచ్చితే చాలునండీ మాకు సర్వే
శ్వరుడిమెప్పు చాలదే పదివేలండీ
మంచివాడవురా నీవు మరల పుట్టవద్దని
కొంచెము దయచూపి మమ్ము గోవిందుడే
అంచితముగ మెచ్చి దీవించి తలయూచుటకు
మించిన దేముండును మీరే చెప్పండీ
కొఃచెపు సొమ్ములకై కొరగాని వారిని కడు
మంచి వారలనుచు పోగడ మాకేమిటికి
మంచి ఆత్మతృప్తి నేమి మరి మోక్షధనమేమి
ఎంచి హరి యిచ్చు నింకేమి కావాలండీ
నానామము పలికినదే నాకు చాలని రాముడు
నానామము భవతారక నామ మన్నాడే
ఏనాడును మరువకుండ ఆనామ స్మరణమే
ప్రాణముగా నుందు మన్య భావన లేలండీ
ఎత్తులు వేసి నాకోదండరాముని చిత్తుచేయగలేవు మాయా నా
చిత్తములోనున్న సీతాపతిని నీవెత్తుకుపోలేవు మాయా
కామాది సర్పాలు బుసకొట్టగానె నే కళవళపడనే ఓ మాయా ఆ
కామక్రోధముఖ సర్పాలేమి చేయు రామభక్తులనో మాయా శ్రీ
రాముడే శెషాహిశయనుడౌ వైకుంఠధాముడే ఓ పిచ్చి మాయా ఆ
రాముడే కృపతోడ ఈ నాహృదయమందిరంబున నున్నాడే మాయా
తాపత్రయాగ్నుల దండిగ మండించి దడిపించలేవే ఓ మాయా ఆ
తాపత్రయంబుల జ్వాలలు చేరవు శ్రీపతిభక్తుల మాయా ఈ
తాపాలు శాపాలు పాపాలు కోపాలు ఏపాటివే పిచ్చి మాయా భవ
తాపాంతకుడు రామచంద్రుడు కొలువైన స్థానంబునే సోక మాయా
పతితపావనుడైన కోదండరాముని భక్తుని హృదయ మోమాయా అది
అతిపవిత్రంబైన హరికోవెలయె గాని యన్యంబు కాదే ఓమాయా అం
దతిశయముగ రామచంద్రు డుండును సీతాపతి యతనితో పిచ్చి మాయా నీ
వతిచేసి చెడవద్దు అతిదూరముగ నుండు టది మంచిదే నీకు మాయా
ఘనులార హరిభక్తిధనులారా పరమ స
జ్జనులారా రామభజన చేయుదమా
మునులెల్ల పరమసుగుణశీలుడని పొగడు
యినకులతిలకుని జనకసుతావరుని
మనమెంతో భక్తిగ మనసారపూజించి
వినయమొప్పంగ కీర్తనలను పాడుచు
దేవదేవుని గూర్చి తెలియని వారెవ్వరు
భావించి హరికీర్తి పాడని వారెవ్వరు
ఐనను వారందరిలో ఆతనిదౌ దివ్యమహిమ
మానుగాను తెలిసినట్టి మహానుభావు లెందరు
ఆ నలువకైన తెలియ నతని మహిమ దుర్లభము
గాన చక్కగ నెఱిగి పాడగలమే మాంబోంట్లము
ఐనను వారందరిలో ఆతని నిజతత్త్వంబును
లోనెఱిగిన మహాత్ములీ లోకములో నెందరు
ఆనీలకంఠు డెఱుగు నత డొక్కడే యెఱుగు
గాన నతని తత్త్వమెఱుగ నౌనా మాబోంట్ల కిలను
ఐనను వారందరిలో అపవర్గము నందుకొని
శ్రీనాథుని సన్నిధికి చేరుకొను వారెందరు
గాని మాభక్తి యన్నది కాదు కదా యసత్యము
కాన రామ కృష్ణ యనుచు గానము చేసేము
శ్రీరామనామమే శ్రీరామనామమే
ఆరాటములు తీర్చు నట్టిసాధనము
కడుదుష్టు డైనట్టి కలితోడ పోరాడి
బడలుచుండిన యట్టి వారి కెల్లరకు
కామాదివైరివర్గము తోడ నిక పోరగా
లేమని భయపడు భూమిజనుల కెల్ల
తాపత్రయంబుతో తహతహలాడుచును
యోపక దుఃఖించుచున్న వారల కెల్ల
ప్రారబ్ధవశమున వ్యాధులాధులు వచ్చి
ఆరళ్ళుపెట్టగా నరచు వారల కెల్ల
మాయ తెఱలను చించు మంచిమార్గంబును
రోయుచు బహుడస్సి రోజువారల కెల్ల
భవచక్రమున చిక్కుబడి చాల తిరుగుచు
చివికి యాక్రోశించు జీవు లందరకును
వేళాయె సభకు రామవిభుడు వెడలుటకు
బాలికలార త్వరపడరే మీరు
హరి కలదరె మంచి యంగరాగములను
హరికి తొడగరె స్వర్ణాభరణములను
హరి తల నుంచరే అనర్ఘరత్నమకుటము
హరి కందించరే ఆరాజదండము
మేదిని నేలినట్టి పాదులకను దెచ్చి
మోదముతో హరికి మ్రొక్కుచు దొడగరె
వేదమయున కనుమోదముగ మంగళ
వాదనలు వీణియల పలికించ రమ్మా
హరి కెదురుగ రారె యది మంచిశకునము
హరి వెంట నడువరె యనతిదూరము
హరి దారిలో మీరు విరులను జల్లరే
హరిణేక్షణలార త్వరపడరమ్మా
తనువు చినచెఱసాల ధర పెద్దచెఱసాల
కనుగొన నిజమింతే కాదటయ్యా
కొంద రీచెఱలపై కూరిమితో నుందురు
కొంద రివి యహిత మనుకొను చుందురు
ఎందరివి దాటపో నెంచెదరు చెప్పుమా
వందితాఖిలమునిబృంద రాఘవా
మునుకొని నీనామమును నూతగా గొని
మనుజుడీ చెఱలు రెండును దాటును
వనజాక్ష జానకీవల్లభా రఘురామ
తనకు వేఱొక దారి యన నున్నదా
చెఱసాల కాని దీసృష్టిలో నున్నదా
హరి సన్నిధాన మొక టనునది గాక
మరి హరేరామ యను మంత్రమే కాక
చెఱలువిడు సాధనము జీవికి కలదా
హరిభజన చేదాము రారే జనులార
అది కదా తరియించు దారి
కలిగాడి ఆగడా లడగించు దారి
కమలాక్షుని భజన కాదా జనులార
కమలాక్షుని భజన కాదా
కలుషమ్ము లన్నటిని తొలగించు దారి
కమలాపతి భజన కాదా జనులార
కమలాపతి భజన కాదా
క్రోధాధిశత్రువుల కొట్టి తరిమెడు దారి
గోవిందుని భజన కాదా జనులార
గోవిందుని భజన కాదా
బాధలన్నీపటాపంచలై చను దారి
పరమాత్ముని భజన కాదా జనులార
పరమాత్ముని భజన కాదా
తాపత్రయంబును తగ్గించుటకు దారి
గోపాలుని భజన కాదా జనులార
గోపాలుని భజన కాదా
శాపంబులన్నియును శాంతించుటకు దారి
శ్రీపతి భజనయే కాదా జనులార
శ్రీపతి భజనయే కాదా
భవసాగరము నీది బయటపడుటకు దారి
భావింప హరిభజన కాదా జనులార
భావింప హరిభజన కాదా
వివరింప హరిజేరి విహరించుటకు దారి
భువిని శ్రీహరిభజన కాదా జనులార
భువిని శ్రీహరిభజన కాదా
శ్రీరమారమణ యని శ్రీనివాసా యని
చేయరే హరిభజన నేడే జనులార
చేయరే హరిభజన నేడే
శ్రీరామరామ యని శ్రీకృష్ణకృష్ణ యని
చేయరే హరిభజన నేడే జనులార
చేయరే హరిభజన నేడే
