దండాలు లచ్చుమయ్య

దండాలు లచ్చుమయ్య దండాలనరే మా

కండగా నీవెప్పుడు నుండాలనరే

నీగుణమును నీశీలము నీచరితము నెంచెదము

యోగిరాజువను బిరుదం బుచితము నీకు

రావణుని సోదరి ధూర్తత్వమునకు కోపగించి

నీవు దాని ముక్కు చెక్కినావు కదయ్యా

ముక్కుమీద కోపము నీకుండు నటయ్యా ఆ

రక్కసులను బట్టి చంపు రామసోదరా

ఆ కామమోహక్రో ధాదులును రక్కసులే

మాకొఱకై ఆదుష్టుల మట్టబెట్టవే

చక్కనయ్య లచ్చుమయ్య మ్రొక్కేము నీకెపుడును

అక్కరలగు వేళల మమ్మాదుకోవయా