రామునకు మ్రొక్కరే రమణులార

రామునకు మ్రొక్కరే రమణులార సీతా

రామునకు మ్రొక్కరే రమణులార

 

చారెడేసి కన్నులున్న శ్యామలాంగుడే  సం

సారభయాపహుడైన సారసాక్షుడే

కోరినట్టి వరములిచ్చు గోవిందుడే మన

సార మీరు మ్రొక్కరే సకియలార

 

దేవతలే చేరి మ్రొక్కు దేవదేవుడే ఆ

భావజుని కన్నతండ్రి పరమాత్ముడే

భావింప బ్రహ్మకైన వశముకాని ఈ

దేవునకు మ్రొక్కరే లావుగాను

కోరి కొలుచువారి కితడు కొంగుబంగరే మీ

కోరికలను చెప్పుకొనరె గోవిందునకు

నోరునొవ్వ కీర్తించరె చేరి మ్రొక్కరె ఓ

సారసాక్షులార రామచంద్రమూర్తిని