శ్రీరామనామమె జీవికి రక్ష

శ్రీరామనామమె జీవికి రక్ష శ్రీరామనామమె రక్ష
వేరొక రక్షయె లేదులేదురా శ్రీరామనామమె రక్ష

కారడవులలో చిక్కిన వేళల శ్రీరామనామమె రక్ష
మీరిన పట్టుల కుమతుల చేష్ఠలు శ్రీరామనామమె రక్ష

మారుని గడబిడ మిక్కుటమైతే శ్రీరామనామమె రక్ష
ధారుణి జీవిక దుర్లభమైతే శ్రీరామనామమె రక్ష

చేరిన వేళల కుమతుల కొలువుల శ్రీరామనామమె రక్ష
క్రూరుల సభలం దడుగిడు నప్పుడు శ్రీరామనామమె రక్ష

నేరము చేయక నిందలు కలిగిన శ్రీరామనామమె రక్ష
ప్రారబ్ధముచే బాధలు కలిగిన శ్రీరామనామమె రక్ష

చేరిన వేళల తనువున రోగము శ్రీరామనామమె రక్ష
తీరిన వేళల తనువున కాయువు శ్రీరామనామమె రక్ష

సారెకు తనువుల దూరెడు జీవికి శ్రీరామనామమె రక్ష
దారిలేని భవసాగర మందున శ్రీరామనామమె రక్ష