చక్కనమ్మా ఓ జానకమ్మా

చక్కనమ్మా ఓ జానకమ్మా ధను
వెక్కిడిన రామునకు దక్కినమ్మా

ఎక్కడిదా శివధను వది యెంతపెద్దదా ధనువు
ఎక్కడెక్కడి వీరుల కది యెత్తరాని ధనువు
ఎక్కడి నుండి వచ్చెనో యీచిన్నవాడు వీ
డక్కజమున నెత్తి విరిచె నందరు పొగడ

చాల గొప్పవాడు వీడు సరసీరుహాక్షుడు
నీలమేఘశరీరుడు నీవా డైనాడు
చాల యదృష్టమే నీది సరసీరుహాక్షి నీ
కేలందు కొన వచ్చెను బాలరాముడు

శివుని ధనువు నెత్తుట యది శ్రీహరికే తగు గాని
భువిని గల సామాన్యుల కెవరికి వీలగును
వివరింపగ వాడు హరియె వేడుకతో మేము
నవనిజవు నీవు సిరివి యందుము నేడు