ఎవరి కెపుడు కలుగునో

ఎవరి కెపుడు కలుగునో యీరామభక్తి
యెవరు చెప్పగలరురా యీభువిలోన

పురాణేతిహాసములను పొలుపుగా చదివినను
నరునకు కుదురకుండు హరిమీద భక్తి
పురాకృతము తగినంత ప్రోద్భల మీయకను
హరి దయ వానిపైన నప్పటికి రాకను

నాలుగు వేదంబులును  నయముగా నేర్చినను
చాలునా హరిభక్తిని సమకూర్చ తనకు
కాలమును తగినంతగ కలిసిరా కున్నపుడు
లీలగా హరిదయయు మేలు చేయనిది

పురాకృతము బాగున్న బోయ వాని కైనను
శ్రీరాముని నామమది చేరును హృదయమున
సురారుల వంశమందు హరిభక్తు డుదయించి
సరాసరి శ్రీరాముని చరణమంట వచ్చు