ఏమిరా చిన్నారి రామా

ఏమిరా చిన్నారి రామా యెందు కలిగి నావురా
నీమనంబున నొవ్వుకలిగిన నేను తాళలేనురా

గోముగా కైకమ్మ నీకు గోరుముద్దలు పెట్టదా
ప్రేమగా మహరాజు తొడపై పెట్టుకొని లాలించడా
తామసించి లక్ష్మణుడు నీ తప్పులెన్ని పలికెనా
ఏమిరా శ్రీరామచంద్రా యెందు కలిగి నావురా

నిన్ను పిలిచి సుమిత్ర ప్రేమగ నేడు ముద్దులు పెట్టదా
నిన్ను గురువు వశిష్ఠు లించుక నిష్ఠురంబుగ పలికిరా
నిన్ను దుష్ఠులు నల్లవాడని నేడు వెక్కిరించిరా
చిన్ని తండ్రీ రామచంద్రా  చిన్నబోవ నేలరా

కలువరేకుల కనులకాటుక కరిగి కాలువ లాయెరా
కళను చంద్రుని మించు ముఖమున కాంతి తరిగిపోయెరా
అలిగి మౌనము దాల్చి యుండక అమ్మతో మాటాడరా
పలుకరా శ్రీరామచంద్రా అలుక లిక చాలించరా