2, ఆగస్టు 2021, సోమవారం

జయములు శుభములు సరిజోడుగా

జయములు శుభములు సరిజోడుగా
దయతో కురిపించు తానెపుడు

తననే నమ్మి తననే కొలిచి
తనశుభనామమె తలదాల్చి
తనవారై సతతంబును మెలిగే
తనభక్తాళికి దశరథరాముడు

కలుముల లేముల కష్టసుఖంబుల
తలపులు నీపై నిలుపుకొని
కొలిచెడు వారికి కూరిమి చూపుచు
అలవోకగ శ్రీహరి మన రాముడు

హరేరామ యని హరేకృష్ణ యని
నిరంతరము ధ్యానించు తన
పరమభక్తులను పరమప్రీతితో
అరయుచు  శ్రీహరి అయోధ్యరాముడు