నోరారా హరినామము నుడివిన చాలు సంసారమనే మాయతెర జారిపోవును

నోరారా హరినామము నుడివిన చాలు సం

సారమనే మాయతెర జారిపోవును

మాటకిని హరినామము మధురముగ గాను కడు

ధాటిగాను సూటిగాను నోటిగూటి చిలుక

పాటించి వ్రతము గాను పాడుచుండ గాను

నేటి నుండా మాయతెర మాటయె లేదు 

 

హరే రామ అని నిత్యము నతిసులువు గాను అతి

కూరిమితో పలుకు నోటిగూటిలోని చిలుక

శ్రీరాముని పేరుచెప్పి చించివేసె గాన

ఔరా యింకా మాయతెర అన్నదె లేదు

మాయతెరను రామనామమహిమ తొలగజేయ

హాయిగాను నోటిగూటి యందమైన చిలుక

చేయుచుండ రక్తిమీఱ శ్రీరామజపము

నాయమోఘస్వస్వరూప మదియెఱుకౌను