నరుడెట్లు పొందురా యరుదైన ముక్తిని
పరమపదంబునే మరినీవు కోరుచో
హరినామ మెందుకు మరచి చరింతువు
హరినామకీర్తనాపరుడై చరించరా
హరినామమే భవతరణైక మార్గము
పరమపదంబునే మరినీవుకోరుచో
హరిసేవ చేయక యదియెట్లు కల్గును
హరినే స్మరించుచు హరిసేవ చేయరా
తరియింపగా నిదే సరియైన మార్గము
శ్రీరామనామమే నోరారచేయరా
శ్రీరామసేవనే శిరసావహించరా
శ్రీరాముడే హరి నీరాత మార్చురా
కారుణ్యమూర్తి నీకందించు ముక్తిని
