3, ఆగస్టు 2021, మంగళవారం

కల్పవృక్షమును వంటకట్టె లడుగవచ్చునా

కల్పవృక్షమును వంటకట్టె లడుగవచ్చునా
అల్పంబులు రామచంద్రు నడుగవచ్చునా

చదువు గట్టెక్కుటకు సాష్టాంగపడువాడా
మొదవుల నిప్పించుమని మ్రొక్కువాడా
పదవులు కావలెనని ప్రాధేయపడువాడా
వదలరా వదలరా పామరత్వము

ధనరాశుల నాశించి మనవులు చేసేవాడా
తనయుల దయచేయుమని పనవువాడా
ఘనత పెంపుచేయు మనుచు గడబిడ చేసేవాడా
మనసులోని పామరత్వమును వదలరా

అరయరా శ్రీరామున కాత్మార్పణము చేయ
నరున కేవి వలయునవి బిరబిరా చేరు
నిరుపయోగముల.వేడ నీకేమి కర్మమురా
పరమాత్ముడు శ్రీరాముని పరమపదమె వేడరా