వీధులవీధుల విహరించుచు హరిగాధలు పాడరె ఘనులారా

వీధులవీధుల విహరించుచు హరిగాధలు పాడరె ఘనులారా

మాధవనామస్మరణగానములు మప్పరె జనులకు ఘనులారా

 

విశ్వాత్ముడు హరి దశరథసుతుడై విచ్చేసిన కథ విశదము చేయుచు

విశ్వామిత్రుని యాగము గావగ వెడలెడు రాముని విక్రమమెంచుచు

విశ్వమోహనుడు హరుని వింటిని విఱచిన కథను వినిపించుచును

విశ్వజనకులు సీతారాముల పెండ్లిముచ్చటలు విస్తరించుచును 

జనకును యానతి మేరకు రాముడు వనముల నుండగ నఱిగిన విధమును

వనముల సీతారాముడు ఖరదూషణుల తీండ్రము నణచిన విధమును

మునుకొని రావణుడను రక్కసుడు జనకజ నెత్తుకపోయిన విధమును

ఘనుడా యినకులపతి పౌలస్త్యుని దునుమి నిజసతిని గూడిన విధమును

 

సీతారాముల చరితము శ్రవణము చేసిన మోక్షము సిధ్ధము సుమ్మని

ప్రీతిగ జనులకు బోధించుచును వేడుక మీఱగ దేశదేశముల

ఖ్యాతిని గాంచిన కమలానాథుని కరుణను చాటుచు కలయదిరుగుచు

భూతలమున సద్భక్తులు జీవన్ముక్తు లన్నది మిక్కిలి చాటుచు