31, ఆగస్టు 2021, మంగళవారం

కలకాలము నీపేరు నిలచియుండును

కలకాలము నీపేరు నిలచియుండును రామ
కలకాలము జనులు నిను కొలుచుచుందురు

జలనిధి యున్నంత వరకు జనులిల నున్నంత వరకు
కులగిరు లున్నంత వరకు కువలయ మున్నంత వరకు
జలరుహాక్ష ఆ సూర్యచంద్రు లున్నంత వరకు
నిలచియుండు నీపేరు నిశ్చయమ్ముగ రామ

వరమును లున్నంత వరకు సురవరు లున్నంత వరకు
హరికథ లున్నంత వరకు హరివరు డున్నంత వరకు
పరమపురుష నిజమై హరిపద ముండునంత వరకు 
వరదమగుచు నీపేరు ప్రబలియుండును రామ

పరమభాగవతోత్తములు వాయుసూను విభీషణులు
తరచుగ నినుదలచి లోన మురియుచుండు నంత వరకు
హరుడు నీ‌నామజపము మరువకున్నంతవరకు
తిరమగుచును నీపేరు తేజరిల్లును రామ