అందగాడ చిఱునగవులు నేడు చిందించుచు

అందగాడ చిఱునగవులు నేడు చిందించుచు నా

డెందమునకు రాకుందు వెందుకో

ముప్పొద్దుల నిను బహువిధములుగా పొగడకుండ నొక

ముద్దయు గొంతున దిగకుండును నీ వెద్ది తలచి యింత

పెద్దతడవు నా మనసున తోచక పెడమో మిడితివిరా

వద్దువద్దు రఘురామ పరాత్పర భావమునకు రారా

చిన్నాచితక తప్పులు తెలియక చేసితి నేమో

అన్నన్నా నీ వంతమాత్రమున నగుపడ ననరాదు

వన్నెకాడ నీ చల్లని చూపుల వెన్నెల బడయక నే

నెన్నడుంటి నా భావంబునకు నికనైను రారా

రామచంద్ర నిను వేడుక మీఱగ రమ్మందునయా

స్వామీ యన్యుల నటు పిలువనని చక్కగ నీకెఱుకే

పామరుడను నా దొసగుల నెంచక భక్తిని గమనించి

నా మనవిని విని నాభావమునకు నయముగ రావయ్యా