పొగడచెట్టు పరచినది పూలపాన్పు చక్కగ

పొగడచెట్టు పరచినది పూలపాన్పు చక్కగ
చిగురుబోడి సీతతో చేరెనచట రాముడు

సీతా యివి యేమిపూలు చిన్నిచిన్నిపూలు
చేతోముదమైన వీని చెప్పరాని పరీమళము
వీతరాగులకునైన వెర్రి పుట్టించు సుమా
భూతపతికి వీటితో పూజచేయుద మనె

పొగడపూలు పొగడపూలు భూతపతి కింపైనవి
పగలురేలు కురియు నిట్లే వాసనతగ్గని పూలు
నగజాత పూజకు నివి నప్పునట్టి పూవులు
జగదీశుడు హరికి నివి నచ్చునట్టి పూలనె

సీతారామలక్ష్మణులు సేకరించి పొగడలు
మాతగౌరికి శివునకు మాధవదేవునకును
ప్రీతితో చేసినారు విశేషముగ పూజలు
ఖ్యాతికెక్కె నీమువ్వురి గాథ ముల్లోకాల