బంధముల నేనెటుల వదలించేది
తలిదండ్రులు నాలుబిడ్డ లందరి తోడను నాకు
కలవు కద బంధము లవి కాదనవశమా
కలవు సహదరులతో గట్టి వైన బంధములే
కలిగిన యీ బంధములు కల్లలనే యందువా
ఎవరు తల్లిదండ్రులయా ఎవ్వ రాలుబిడ్డలయా
ఎవరు నీ సహోదరు లెక్కడి వీ బంధములు
తవులుకొన్న వివియెల్ల తనువునకే కాదటోయి
తవులుకొన్న వని నీవే దయతో సెలవిచ్చితివి
తనుమాత్రుడ ననుకొన్న తగిలితోచు బంధములు
తనువు కన్న వేరైనది తత్వము నీకున్నది
వినుము శాశ్వతుడవు నీవు విధముతప్పి జీవుడవు
కనుగొంటిని మాయచేత కలిగినవీ బంధములని