సీతారాములను బడసి చెన్నొందె నడవి

సీతారాములను బడసి చెన్నొందె నడవి
సీతారాములను విడచి చిన్నబోయె నగరి

వారు నివసించు చోటు వైకుంఠ మగును
వారిని నిరసించు చోటు వల్లకా డగును
వారు కదా విశ్వమునకు కారణమగు వారు
వారు కదా పోషకులు బ్రహ్మాండములకు

ఆ రావణకుంభకర్ణాదులను దునుమంగ
కారణార్థమై పుడమికి వారిద్దరు వచ్చిరి
వారడవులు చేరకుండ పనితీరు విధమేది
శ్రీరాముని వనవాసము చిత్రమైన నాటకము

శాప మది కొంత తీరు జయవిజయుల కిపుడు
తాపమది తీరు నింక ధర్మాత్ములు సురలకు
శ్రీపతి చారిత్ర్యమింక చెలగు ముక్తిప్రదమై
పాపపంకశోషకమై పావనమై నిత్యము