వినుడోహో రామాయణ వీరగాథ

వినుడోహో రామాయణ వీరగాథ
ఘను డాదినారాయణుని గాథ

వినుడువినుడు రాముడనే వీరుడు కలడు

తనకుతానె సాటి యా దశరథసుతుడు

వినుడువినుడు గొప్పముని విశ్వామిత్రుడు

మనరాముని యజ్ఞరక్షకునిగ చేసెను

వినుడువినుడు తాటక విరుచుకపడగ

ఘనుడు గురువు నుడువ దాని గ్రక్కునజంపె

వినుడువినుడు రాకాసులు వేగ వచ్చిరి

మునిజన్నము పాడుచేయు మూర్ఖబుధ్ధులు

వినుడువినుడు భస్మముగ వేగ నొక్కని

వనరాశిని తూలనొకని బాణములేసె

వినుడువినుడు  అదృశ్యయౌ వనిత అహల్య
మునిశాపము తొలగ రామమూర్తిని పొగడె

వినుడువినుడు జనకునింటి వింటిని విరచి

మునిశిష్యుడు పెండ్లాడె జనకాత్మజను

వినుడువినుడు జామదగ్న పిడుగైరాగ

వనజాక్షుని వలన గర్వభంగము నొందె

వినుడువినుడు రాముడంత జనకజ తోడ
తనపురమున కేగియందు ఘనముగ నుండె