పదితల లున్ననేమి పదిలమగు బుధ్ధిలేక

పదితల లున్ననేమి పదిలమగు బుధ్ధిలేక
చదువులు గలుగనేమి సరి వివేకము లేక

వరమడిగెడి వేళ వాడు వానరులను నరుల విడచె
నరులు వానరులవలన నాశనమును పొందె
వరగర్వము చేత వాడు బాధించెను లోకంబుల
హరిదాల్చెను నరవేషము నరకెను రావణుని తలలు

పరభామామణుల పట్టి పరిభవించు తుళువ తుదకు
పరసతివ్యామోహమునకు బలిచేసెను బ్రతుకును
నరనాథుడు శ్రీరాముడు నారాయణుడని యెఱుగక
ధరాత్మజను చెఱబట్టెను దానజేసి ధరను కూలె

ఇంద్రాదుల గెలిచె గాని యింద్రియముల కోడె నతడు
ఇంద్రాదులు పొగడ రాము డిలాసుతను గూడెను
సాంద్రకృపామూర్తియైన సాకేత విభుడు రామ
చంద్రమూర్తి స్వఛ్ఛ కీర్తి  శాశ్వతమై వెలుగొందెను