వినదగిన మాటొకటి వినవయ్య

వినదగిన మాటొకటి వినవయ్య నీవు
కనదగిన సత్యమే కనవయ్య

చేయరానివి చేయ  చిక్కులు పడ్డావొ
మోయరాని నింద లంటేను వినుము
మాయదారి బుధ్ధి మంచిచేయదు నీకు
హేయమైన గతియె పట్టేను

మంచిదారిని నీవు మనసార నడచితే
మంచి నీకెప్పుడు జరిగేను నీవు
పంచిన మంచి నీ ప్రాణమే కాచు నీ
అంచితంబగు పుణ్య మబ్బేను

శ్రీరామునే నీవు చిత్తాన నమ్మితే
నారాయణుండని తోచేను వాడు
కారుణ్యమున నిన్ను కాచేను నీకు
పారమార్థిక మింత దొరికేను