25, జనవరి 2019, శుక్రవారం

తమకంబు మీఱ నిన్ను తలచేనో


తమకంబు మీఱ నిన్ను తలచేనో హరి
సుమధురముగ చాల పొగడ జూచేనో

సకలసుగుణరాశి రామ సుకుమార ఓ
వికచోత్పలనయన చంద్రబింబవదన
రకరకముల మిక్కిలి రసవంతముల
అకళంకముల కీర్తనముల నమరించేనో

చవులుపుట్టు చరిత రామచంద్ర నీది నా
కవనమందు ప్రతిబింబించి చెవులకింపై
యవధరించు వారి కెల్ల నమిత భక్తి
చివురించగ కీర్తనముల చేయువాడనో

తారకనామ రామ నిన్ను తలచువారి యే
కోరికైన నేల తీరకుండు నయ్య
ధారుణి నే నిలచునంత తడవు నిన్ను
సారెకు కీర్తించి నిన్ను చేరుకొందురా