వీడు విరచించునదేమి

వీడు విరచించున దేమి నేడైన రేపైన
వేడు కెల్ల నీదన్న విషయ మెరుగడే

మాయలో మునిగియున్న మానవుడైనట్టి వీని
చేయంది కీర్తనలను చిత్రంబుగను
వ్రాయించుకొను చుందు వయ్య నీ దివ్యకృప
చేయించు కాక వీడు చేయునదేమి

రామయ్య చూడ నీ రమ్యకీర్తనము లెల్ల
నీ మహిమ చాటగ నిశ్ఛయముగను
సామాన్యుడగు వీని సత్పాత్రు జేసెడు
నీ మహితసత్కృపానిర్ణయంబులే

ఎంచి వీని బుధ్ధిలో మంచిగాను చొరబారి
మంచిమంచి భావములు మాటలు నిచ్చి
పంచదార గుళికల వంటి మంచికీర్తనల
నంచితముగ చేయించునది నీవేగా