24, జులై 2013, బుధవారం

సుదతి జానకి తోడ సుందరుడు

సుదతి జానకి తోడ సుందరుడు
కదలి వచ్చినాడు సుందరుడు
సుందరుడు శ్యామ సుందరుడు
సుందరుడు రామ సుందరుడు

 ప్రజ్ఞానఘనుడైన సుందరుడు
అజ్ఞానవనవహ్ని సుందరుడు
యజ్ఞస్వరూపుడౌ సుందరుడు
యజ్ఞఫలోదయ సుందరుడు

 ఇనవంశవర్థన సుందరుడు
మనసిజమోహన సుందరుడు 
మునిరాజభావిత సుందరుడు
ఘనయజ్ఞరక్షణ సుందరుడు

హరచాపవిదళన సుందరుడు
ధరణిజాపతియైన సుందరుడు
సురలకై వనమేగు సుందరుడు
శరణాగతత్రాణ సుందరుడు

మౌనీంద్రకామిత సుందరుడు
దానవవనదహన సుందరుడు
మానవనాధుడీ సుందరుడు
మానక మమ్మేలు సుందరుడు

 (జూలై 2013)
వీరిచే పోస్ట్ చేయబడింది వద్ద
లేబుళ్లు:

3 కామెంట్‌లు:

  1. SD24 జులై, 2013 6:11 PMకి

    బాగుంది గురువుగారు. సుందరం అంటే గుర్తొచ్చింది. మా ఊరు శివాలయం చూడ్డానికి వెళ్ళేను. అమ్మవార్ని చూడగానే అనిపించిన ఫీలింగ్ - "అమ్మ, లుక్స్ డాజిలింగ్ టుడే" ఏమి అందం! మొహంలో కాస్త కోపం కాస్త నవ్వూ మేళవించి ఉన్నాయి. గొంతులోంచి మాటరాలేదు. మనస్సు స్థంభించిపోయింది. ఆఖరికి "అమ్మా నీ ఇష్టం" అని మాత్రం అనగలిగానేమో. వెనక్కి వచ్చాక మళ్ళీ జీవితం యధాప్రకారంగానే ఉంది. ఇంకా ఎన్ని, ఎలాంటి క్రిమి కీటకాల జన్మలు ఎత్తాలో మరి :-(


    అప్పుడప్పుడు మీ పాత పోస్టులు చదువుతున్నాను మిస్ అయ్యినవి. హనుమంతుల వారిని గుర్తించలేకపోయానే అన్నారు కదా? అందులో శివాలయాని వెళ్ళేరు, రాముడు ముందు కనిపించేడు. హనుమంతుడు సాక్షాత్ శివుడే కాదుటండీ? మీ పాహి రామ ప్రభో కి సంతోషించేడు కాబోలు, ముందు మరి హనుమంతుడ్ని గుర్తు పట్టు తర్వాత చూద్దాం అనుకున్నాడు. బాలకృష్ణుడి నోట్లో బ్రహ్మండం అంతా చూసేక ఇదేమిటీ అని ఆ నందాగనా డింభకుడి కేసి చూసే సరికి ఏమీ గుర్తు లేదుటా ఆవిడకి. ఎందుకూ? అదే విష్ణుమాయ అని చెప్పేడు కదా పోతన? చదివేక ఆ, అని అక్కడే వదిలేస్తాం. ఇప్పుడు చూడండి మరి. అదే మీకు కలలో కనిపించింది.


    శివుడి గుడి అని తెల్సు. హనుమంతుడు శివుడి అవతారం అని తెల్సు. రాముడు ముందు కనిపించి డైరక్షన్ ఇచ్చేడు కూడా. అయినా మీరు - అదీ బాగా తెల్సున్న ముఖమే అని తెలిసి కూడా - గుర్తు పట్టలేకపోయారు. ఇప్పుడు అర్ధం అయిందా అండీ వైష్ణవ మాయ అంటే?


    మెల్లిగా తన దగ్గిరకి రప్పించుకుంటాడు కానీ ఒకే సారి కనపడితే మీరు పాహి రామ ప్రభో ఆపేసి సమాధిలోకి వెళ్ళిపోతారు. ఆయనక్కావాల్సిన పని ఆగిపోదూ? అది అవనీయండి, ఈ లోపున హనుమంతుడ్నే గుర్తు పట్టలేకపోయారు మరి. కొన్ని రోజుల్లో తులసీ దాసుకి కనిపించినటువంటి ఏ రాక్షసుడో కనిపించవచ్చు మళ్ళీ. ఈ సారి అప్రమత్తంగా ఉండండి. హనుమంతుడు తనని తులసీ దాసు గుర్తించట్లేదని ఒక రాక్షసుణ్ణి పంపిచేడుట జాగ్రత్తగా ఉండూ అని చెప్పించడానికి.


    అయినా మన తాపత్రయం గానీ, ఆయన ఇష్టం లేకపోతే ఈ సారి కలలో మీరు మిమ్మల్నే గుర్తు పట్టుకోలేరు మరి చూసుకోండి. :-) కలయో వైష్ణవ మాయయో అంటే ఇప్పుడు అర్ధం అయింది కదా?

    రిప్లయితొలగించండి
    రిప్లయిలు
    1. శ్యామలీయం24 జులై, 2013 9:31 PMకి

      మీ విపుల వ్యాఖ్యకు సంతోష మైనది

      కం. తోయంబులలో చేపకు
      తోయంబుల కవలి జగము తోచని పగిదిన్
      మాయాంబుధిమగ్నుకున్
      మాయకు మించినది తెలియు మాట గలుగునే

      అట్లు మాయకు మించినది తెలియట పురుషకారంబువలన గామి యెఱుంగునది యట్టిది యెఱుకబడుట కేవలంబును జగదీశ్వరుని కృపావిశేషంబున గావలయు గాని యన్యోపాయంబు లప్రయోజనంబులు.
      స్వస్తి.

      తొలగించండి
  2. hari.S.babu12 మార్చి, 2018 1:47 PMకి

    "మరి యొకసారి మరి యొకసారి మరి యొకసారి కననీరా
    పరమ మనోహరమగు నీ చిరునగవు మనసారా"
    అని నిన్ననే కదా అడిగారూ!
    అప్పుడే ఇలా కనిపించాడూ!
    గజేంద్రుడి కన్నా మీరే గొప్ప.

    రిప్లయితొలగించండి

ఆమోదించిన వ్యాఖ్యలే ప్రచురితం అవుతాయి. తరచుగా పరిశీలించటం వీలు కాదు కాబట్టి అప్పుడప్పుడు వ్యాఖ్యలు కనిపించటం ఆలస్యం కావచ్చును. తరచుగా జవాబులు ఇవ్వటం నాకు వీలు కాదు. ఎక్కువగా చర్చించటం అస్సలు వీలుకాదు.

దీనికి సబ్‌స్క్రయిబ్ చేయి: కామెంట్‌లను పోస్ట్ చేయి (Atom)