రాములోరి గుడిచిలుక యున్నది

 

రాములోరి గుడిచిలుక యున్నది రామరామ యనుచున్నది

రాములోరి గుడితోట లోని యొక రావిచెట్టుపై నున్నది

వచ్చేపోయే భక్తుల తీరును బాగుగ గమనిస్తున్నది

పిచ్చిపిచ్చి కోరికల వారల వెఱ్ఱిని గమనిస్తున్నది

ముచ్చట పడుచు కొందరు హరికై వచ్చుట గమనిస్తున్నది

హెచ్చగు నార్తిని కొందరు వచ్చుట నిదిగో గమనిస్తున్నది

రామదర్శనము కొఱకు జ్ఞానుల రాకను గమనిస్తున్నది

రాములవారికి జరిగేసేవల ప్రేమగ గమనిస్తున్నది

రాముని పొగడే రామభక్తుల రాకను గమనిస్తున్నది

రాముని తిట్టే రాలుగాయిల రాకను గమనిస్తున్నది

వాడవాడలను శ్రీరఘురాముని భజనలు గమనిస్తున్నది

ఆడుచు రమణులు రామకీర్తనలు పాడుట గమనిస్తున్నది

పాడేపాటల రాముని లీలావాహిని గమనిస్తున్నది

వేడుకగా జగమంతట రాముని విభవము గమనిస్తున్నది