ఏమందువు రామా

ఏమందువు రామా యెంతకాలమని నేను

భూమిమీద నవుకుదేహమును మోయవలయును

బంగారు దేహమనుచు భ్రమపడుచును దీనిని

సింగారించుచు నేను చేసితి సేవలు దీని

సంగతి యించుకయు తెలియ జాలని వెఱ్ఱినై

మింగి ముప్పూటల యిది మిక్కిలి ముదుకాయె

భయము లేక తనయంత వారులే రనుచు తిరిగె

వయసు మీదపడు వరకు పలుకలేదు నీనామము

నయము నేటి కైనను నీ నామమును పలుకదొడగె

స్వయముగా నీతనువునకు వచ్చినదా బుధ్ధి

పగవారట తనవారట బంధువులట మిత్రులట

జగమంతయు తనకొరకే జనియించి యున్నదట

జగదీశ్వర యీతనువున చాల గర్వ ముండినది

దిగిపోవుచు నుండిన దిక దిగినది చాలునా