30, జులై 2013, మంగళవారం

రామకీర్తనలు - 7 బెత్తాల వాళ్ళెవ్వరూ మిమ్ము మొత్తరు లోనికి రండు

బెత్తాల వాళ్ళెవ్వరూ మిమ్ము మొత్తరు లోనికి రండు
ఉత్తుత్తి భయమేలను రామ భక్తులందరు రండు  

శ్రీరామచంద్రులు సీతమ్మతల్లితో
పేరోలగంబుండి పిలువనంపిరి గాన
మీరెల్ల వారలు మిగుల ముదము తోడ
పారిషదులౌట పరమోత్సవము గాన  ॥ బెత్తాల ॥

కనకాసనము మీద కారుణ్యమూర్తులు
జనకసుతా రామచంద్రులు కూర్చుండి
కనులపండువ సేయ గలరంత కంటెను
మనకేమి వలయును మహితాత్ములార ॥బెత్తాల ॥

కలనైన రాముని తిలకించి మురిసేరు
తిలకించ రమ్మని దేవుడే పిలిచేను
తిలకించు వారికి తిరిగి జన్మము లేదు
బిలబిల రండయ్యా విష్ణుభక్తులార  ॥ బెత్తాల ॥

(జూలై 2013)

2 వ్యాఖ్యలు:

  1. బెత్తాల వారు ఎవ్వరూ మిమ్ము మొత్తరు, భయాలు వద్దే వద్దు , నిర్భయ ఆగమనానికి ఈ ఆహ్వానం బాగున్నది శ్యామలీయం గారూ! ఇంతకీ ఈ పాట ఎక్కడిది? కోలాటం ఆట వారిదా?

    ప్రత్యుత్తరంతొలగించు
  2. స్వాగతం అనిల్ గారూ,
    నేను రాముడిపైన వ్రాస్తున్న కీర్తనలన్నీ నా రచనలేనండి. మీకు నచ్చినందుకు చాలా సంతోషం.

    ప్రత్యుత్తరంతొలగించు

కం. పలుకుడు పలికెడు నెడలను
పలుకుల విలువలకు మురిసి పలికెడు కళలో
నిల గడుగడు నిపుణులు తగ
పలికెడు తెఱగిటుల ననుచు పలుకగ విబుధుల్

(తెలుగులో వ్రాయటానికి అవసరమైతే లేఖిని సహాయం తీసుకోండి. Windows వాడేవారు ప్రముఖ్ IME డౌన్ లోడ్ చేసుకోవచ్చును )

గమనిక: అమోదించబడిన వ్యాఖ్యలు మాత్రమే ప్రచురించబడతాయి.