హరినామములు లిట్టి వని

హరినామములు లిట్టి వని యన రానివి
తరచుగ పలుకుడయ్య హరినామములు

నరజాతికి పెన్నిధులు హరినామములు
నిరుపమాన శుభదములు హరినామములు
పరమసుఖదాయకములు హరినామములు
పరమశివ సన్నుతములు హరినామములు

హరియించును పాపముల హరినామములు
పరమార్ధ బోధకములు హరినామములు
విరచును భవచక్రమును హరినామములు
కరుణించును మోక్షమును హరినామములు

అరయ ననంతములైన హరినామములు
నరుల కొఱకు సులభమాయె హరినామములు
హరిని శ్రీరామరామ యనుచు పిలచిన
నరుడు పలికినటులె వేల హరినామములు