8, ఫిబ్రవరి 2020, శనివారం

ఊరకే రామభక్తి యుబికి వచ్చేనా


ఊరకే రామభక్తి యుబికి వచ్చేనా మంచి
దారిచూప రాముడే తలచిన గాక

వినినంతనె చదివినంతనె వేదాంతము నీ
మనసు కెక్కేనా తరింప మనసు పుట్టేనా
మనసును మరి రాముడే మంచిదారిలోన
జనునట్లు చేయదలచుకొనినప్పుడు కాక

పదుగురితో కలిసి రామభజన చేయగానే
మదిలోని పాపచింతన మాయమయ్యేనా
పదేపదే భజనచేయు వలపు నీ బుధ్ధిలో
నుదితమగు నట్లు రాము డొప్ప జేయక

రాముడే దయచూపక రామభక్తియన్నది
ఏ మాత్రము కలుగదని యెఱుగ వలయును
రామరామ రామ యనుచు నేమరక పలికితే
ఏమో యేనాటికైన రాముని దయరాదా